Amateka yihariye ya Jenoside yakorewe Abatutsi mu yari Gikongoro

Yanditswe na Prudence Kwizera
Kuya 23 Mata 2019 saa 07:59
Yasuwe :
0 0

Umunyamabanga Nshingwabikorwa wa Komisiyo y’Igihugu yo Kurwanya Jenoside, CNLG, Dr Bizimana Jean Damascène, yatanze ikiganiro ku mateka ya Jenoside agaruka ku mwihariko w’ubwicanyi bwibasiye abatutsi mu yahoze ari Perefegitura ya Gikongoro.

Yagitanze ku Cyumweru tariki ya ya 21 Mata 2019 i Murambi mu Karere ka Nyamagabe mu muhango wo kwibuka ku nshuro ya 25 Jenoside yakorewe Abatutsi no gushyingura mu cyubahiro imibiri 294.

Yavuze ko Jenoside yakorewe Abatutsi muri Gikongoro yatangiye gutegurwa kuva mu 1959 kugeza ubwo mu 1994 habaye umusozo wo gushyira mu bikorwa ubwicanyi bukomoka ku rwango n’ingengabitekerezo ya Jenoside byabibwe mu banyarwanda.

Ati “Jenoside yakorewe Abatutsi mu 1994 yaje isoza mu by’ukuri izindi za Jenoside zari zaragiye ziba mu bihe bitandukanye.”

Yavuze ku mateka ya bamwe mu banyapolitike bashinjwa kubiba urwango barimo Kayibanda Grégoire wabaye Perezida wa Repubulika ya mbere, Joseph Gitera washyizeho amategeko 10 y’abahutu n’abandi ndetse n’aho amashyaka ya politike yavomye urwango.

Ati “Ibaruwa ya Musenyeri Perraudin yanditswe ku itariki 11 Gashyantare 1959 yari mbi, ni yo Gitera na Kayibanda buririyeho kuko ni bwo amashyaka ya politike yemerewe gukora.”

Yasobanuye ko iyo baruwa ya Musenyeri Perraudin wabaye Arikiyepisikopi wa Diyoseze ya Kabgayi yerekanaga ko akarengane n’ubusumbane bwose bwari mu Rwanda byaturukaga ku batutsi kuko ngo bari bihariye byose abahutu nta cyo bafite.

Yagarutse ku bwicanyi bwakozwe mu 1963 mu yari Gikongoro nyuma y’inama yahuje Perefe Nkeramugaba n’abandi bategetsi iyobowe n’uwari Minisitiri w’Ubutegetsi bw’Igihugu Rwasibo Jean Baptiste.

Ati “Kuri 24 Ukuboza ni bwo ubwicanyi bwatangiye gukorwa ku batutsi bari muri za Paruwasi nijoro birakomeza ku itariki 25 no kuri 26 noneho batangira no kurya inka za bo izo bagiye baragiza bagasaba ko baziranga aho ziri; icyo gikorwa kirakorwa muri aya makomini yahoze ari Ubufundu, Nyaruguru n’Ubunyambiriri.”

Akomeza avuga ko ubwicanyi bwakajije umurego abatutsi baricwa bajugunywa mu migezi.

Ati “Iyo ugiye muri raporo zakozwe n’Ababiligi n’Abapadiri icyo gihe bari kuri Paruwasi Cyanika na Kaduha bagaragaza ko kuri 26 na 27 Ukuboza 1963 ari ho ubwicanyi bwabaye bwinshi kandi bubi kuko zigaragaza ko Abatutsi batawe mu migezi babahambiriye amaboko inyuma kugira ngo badashobora koga bakabata mu Migezi ya Mwogo na Rukarara ari bazima.”

Yavuze ko abandi barimo abana n’abakuru bagiye babashyira mu nzu za bo kuko inyinshi zari ibyatsi bakabatwikiramo.

Ubwo bwicanyi bwo mu 1963 muri Gikongoro yavuze ko bwabaye bubi bwitwa Jenoside kuko burangwa n’ibintu bitatu byihariye.

Icya mbere ngo ni bwo hatangiye umuco wo guhemba abicanyi kuko ababaga bagize uruhare mu bitero bakica abatutsi benshi bahabwaga inka z’abatutsi kugira ngo bazitware bazirye bikozwe na perefe na ba burugumesitiri be.

Icya kabiri ngo ni uko ubwo bwicanyi bwamenyekanye mu mahanga bugahabwa inyito ya Jenoside. Icya gatatu ni uko ngo ari bwo hatangiye umuco wo gupfobya Jenoside bikozwe na Leta ndetse na Kiliziya.

Dr Bizimana yavuze ko muri Mutarama 1964 nyuma y’ibyumweru bitatu ubwo bwicanyi bubaye muri Gikongoro, Musenyeri Perraudin yandikiye Papa Yohani wa 23 na Radiyo Vatican abihakana.

Ati “Yanditse ababwira ko ibyavuzwe mu mahanga ko hari Jenoside yabaye mu Rwanda ko ari ibinyoma; ko yego hari abantu bake bishwe ariko byaturutse ku gitero bo ubwabo bateye kandi Perezida Kayibanda nta ruhare abifitemo adashobora kwica kuko ngo ari umuperezida w’umukirisitu.”

Yavuze ko tariki ya 29 Mutarama 1964 Perezida Kayibanda yanditse ibaruwa ivuga ko abatutsi bishwe kuko ari ibyitso by’inyenzi kuko zari zaracengeye zikagera mu Cyanika na Kaduha hari gutegurwa gahunda yo kwica abahutu bityo abahutu baritabara.

Dr Bizimana avuga ko ibyo byerekana ko ipfobya n’ihakana rya Jenoside yakorewe Abatutsi rigaragara muri iki gihe ryatangiye kuva kera.

Kayitaba Michel watanze ubuhamya yavuze ko muri Gikongoro Jenoside yatangiye mu 1959, avuga uko abatutsi batangiye guhigwa gutotezwa no kwica.

Yavuze ko mu 1960 iwabo hagabwe igitero barabatwikira, ariko ku bw’amahirwe ntibashya. Ubwicanyi no gutoteza abatutsi muri Gikongoro ngo byarakomeje mu 1963, 1973 no mu 1990 kugeza mu 1994 Jenoside ishyizwe mu bikorwa.

Minisitiri w’Ubutabera akaba n’Intumwa Nkuru ya Leta, Busingye Johnston, yijeje ko u Rwanda ruzakomeza gushyira imbaraga mu gukurikirana abantu bose bakekwaho kugira uruhare muri Jenoside yakorewe Abatutsi aho bari hose.

I Murambi mu Karere ka Nyamagabe ahahoze ari muri Perefegitura ya Gikongoro hari Urwibutso rwa Jenoside yakorewe Abatutsi ruruhukiyemo imibiri irenga ibihumbi 50.

Imibiri 294 iherutse gushyingurwa mu cyubahiro mu rwibutso rwa Murambi
Umunyamabanga Nshingwabikorwa CNLG, Dr Bizimana Jean Damascène, atanga ikiganiro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza