Amateka mashya nyuma y’uko urukiko rwemereye umuryango gutwita igi rizavamo umwana w’undi muryango

Yanditswe na Rabbi Malo Umucunguzi
Kuya 12 Nzeri 2020 saa 11:05
Yasuwe :
0 0

Kuri uyu wa Gatanu nibwo Urukiko Rwisumbuye rwa Nyarugenge rwemeje ishingiro ry’amasezerano imiryango ibiri yumvikanyeho, ko umwe uzatwitira undi mu rwego rwo gukemura ikibazo cyo kutabyara cyabaye kuri umwe muri iyo miryango.

Mu minsi ishize umugabo w’imyaka 40 n’umugore we wa 33 bagannye Urukiko rw’ibanze rwa Kicukiro, basaba icyemezo cyerekana uzaba umubyeyi w’umwana nyuma y’uko babisabwe n’ibitaro bya Gisirikare bya Kanombe, bagannye babisaba guhuriza intanga zabo mu wundi mugore, ariko umwana akazaba uwabo.

Ni igitekerezo bagize nyuma yo kumara imyaka 10 bashakanye ariko barabuze urubyaro, bumvikana n’undi muryango w’umugabo n’umugore, ngo umugore w’uwo muryango abatwitire.

Inteko y’abacamanza batatu iyobowe n’Umucamanza Udahemuka Adolphe, kuri uyu wa Gatanu yemeje ko impungenge z’umuganga wo ku Bitaro bya Kanombe zari zifite ishingiro, kuko ubundi umwana uvutse ahita yandikwa kuri nyina umwibarutse. Ariko nyuma yo gusuzuma impande zose, urukiko rwategetse ko urubanza rwaciwe n’Urukiko rw’Ibanze rwa Kicukiro ruhinduka mu ngingo zarwo zose.

Rwategetse ko amasezerano yabaye hagati y’imiryango yombi yo kwemera gutwita igi rizavamo umwana, "yubahirizwa uko yakabaye", ku buryo umwana navuka azahita yandikwa ku batanze intanga, aho kuba uwamugiriye ku bise.

Mu rwego rwo kwita ku burenganzira bw’umwana, urukiko rwategetse ko umwana uzavuka "azabana" n’umuryango yavukiyemo "mu gihe cy’amezi atandatu akimara kuvuka," mbere yo gushyikirizwa umuryango we mu buryo bwemewe.

Ni urubanza rushobora gukingurira amarembo n’umuntu wese uzakenera gutwitira cyangwa gutwitirwa n’undi muryango, kuko amayira yaharuwe mu buryo bw’amategeko.

Me Habimana Pie wo muri Amicus Law Chambers, yabwiye IGIHE ko uru rubanza ari ubwa mbere rubaye, ariko mu itegeko risanzwe byemewe ko umuntu ashobora kubyara hakoreshejwe ikoranabuhanga.

Ati "Ikiba gisigaye rero ni ukureba ngo ese niba itegeko ryemera ko umuntu ashobora kubyara hakoreshejwe uburyo bw’ikoranabuhanga, ni ubuhe buryo bwemewe, ni ubuhe buryo butemewe, ni uguhera he ukageza hehe."

Yavuze ko uru rubanza ruzanye impinduka, kuko abandi bazakenera gukoresha ubu buryo bizaborohera, bakabisaba bafite icyo bashingiraho.

Yakomeje ati "Buriya mu mategeko umuntu ashobora gusaba ikintu ashingiye ku itegeko cyangwa agasaba ikintu ashingiye ku rubanza rundi rwabaye. Iyo ushingira ku rubanza rundi rwabaye ugaragaza ko ibihe urimo bimeze kimwe n’ibyo bariya bari barimo. Ni ukuvuga ngo n’undi muntu waba atabyara, akumvikana n’undi, yaza avuga ati ‘ariko n’abandi barabikoze murabibemerera, nanjye nimubimenyemerere’."

Me Habimana ibyo yabihuje n’uko umucamanza wemereye bamwe kugirana n’abandi amasezerano yo gutwita igi rizavamo umwana, n’abandi baje yabibemerera ashingiye ku ngingo zagendeweho mbere.

Umuganga w’indwara z’abagore, Dr Victorien Ndacyayisenga ukorera muri Hôpital La Croix du Sud, yabwiye IGIHE ko aho ibihe bigeze, uretse kuba ari abantu babuze urubyaro bakeneye gutwitirwa, hari n’ababikora ku zindi mpamvu nubwo mu Rwanda bitarahagera.

Bishobora guterwa n’uko umuntu adashaka gusa kubyara ngo wenda umubiri we udahinduka, amabere akaba yagwa, inda igakweduka cyangwa akabyibuha cyane, agahitamo gutanga intanga, inda igatwarwa ndetse ikabyarwa n’undi mugore, ariko umwana ari uwe. Habaho ariko n’impamvu z’uburwayi.

Dr Ndacyayisenga yakomeje ati "Umwe ashobora kuba afite indwara wenda ishobora kumubuza kubyara kandi bashaka kuzabyara umwana wabo, nk’abantu barwara umutima burya kenshi dushobora kubabwira umugore ntazigere atwita kubera ko bishobora kuba bibi cyane, cyangwa se afite izindi ndwara zibibuza, bagashobora guhitamo ko bashaka ubabyarira, nta kibazo kirimo."

"Niho iterambere rigeze, kera ntabwo byashobokaga ariko ubu ufite umuntu ubikwemerera, nta kibazo ni ubushake bw’abantu, ubushobozi baba bifitiye n’icyizere bagirirana."

Dr Ndacyayisenga ariko avuga ko mu gihe amaze avura abagore, abo bakira aba ari abantu nk’igihe usanga umugore akuze kandi akeneye kubyara, agasanga intanga ze zitagifite ubushobozi bwo kuvamo umwana, agashaka uwamuha intanga igahura n’iy’umugabo we, hanyuma "we akitwitira ku giti cye."

Yakomeje ati "Ariko abasaba ko batwitirwa n’abandi ntabwo bukunze kubaho, nta n’uwo ndabona njyewe.”

Hari impamvu nyinshi zituma urubyaro rubura

Dr Ndacyayisenga avuga ko uretse kuba umuntu umwe muri babiri bashakanye yaba afite ikibazo gituma atabyara, binashoboka ko buri umwe yaba ari muzima, ariko bagerageza bikanga.

Gusa kenshi ntabwo byanga burundu, nubwo hari igihe bifata imyaka myinshi kugira ngo umugore abashe gutwita. Icyo gihe hashobora kwifashishwa uburyo bwo gufata intanga zikaba zahuzwa zigashyirwa mu mugore akaba yasama, ariko kenshi hakabaho imbogamizi ku bushobozi bw’abantu, bwo gushaka abaganga b’inzobere.

Yakomeje ati "Ariko hari abo byanga rwose nta n’ikindi kibazo bafite kandi bombi ari bazima. Ni ibintu bigomba gukorerwa icumbukura kugira ngo umenye impamvu, ntabwo byapfa kwanga gutya gusa, haba hari akantu gato cyane gatuma bidakunda."

"Ushobora gusanga harimo ukudahura mu buryo intanga zabo zagombye guhura, wenda ugasanga nk’umugore afite amatembabuzi mu mura we atorohera intanga z’umugabo we, zageramo zigahita zitakaza ubushobozi bwo kuba zahura n’igi ngo asame, cyangwa se ugasanga n’umugabo intanga ze ntabwo zibasha kumara umwanya zigeze mu mugore. Hashobora kuba utuntu twinshi tudahita tugaragara, ariko haba hari impamvu ibiri inyuma igihe cyose."

Urukiko rwa Nyarugenge rwemeje amasezerano imiryango ibiri yagiranye, umwe ukemera gutwitira undi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .