00:00:00 IGIHE NETWORK KN KINYARWANDA EN ENGLISH FR FRANCAIS

Amasomo y’ubumenyingiro yashyiriweho kuziba icyuho cy’ubushomeri-Perezida Kagame

Yanditswe na

Deus Ntakirutimana

Kuya 16 Werurwe 2015 saa 09:26
Yasuwe :

Perezida wa Repubulika y’u Rwanda Paul Kagame yeretse amahanga akamaro k’amasomo y’ ubumyingiro, aho u Rwanda rwayashyizemo imbaraga ngo ruhangane n’ikibazo cy’ubushomeri no kutiga ibikenewe ku isoko ry’umurimo.

Nyuma yo kuva mu Misiri mu nama yigaga ku ishoramari , Perezida Kagame yerekeje mu bihugu byunze Ubumwe by’Abarabu, i Dubai mu nama yiga ku burezi n’ubumenyingiro.

Mu ijambo yagejeje ku bari aho, Perezida Kagame yagaragaje akamaro k’uburezi, amasomo y’ubumenyingiro n’icyo Isi yagombye kwitaho mu burezi. Yavuze ko u Rwanda rwakoze ibishoboka byose aya masomo y’ubumenyingiro afashe abenegihugu guhangana n’ikibazo cy’ubushomeri.

Ati “Twanashyizeho amasomo ajyanye n’ubumenyingiro kugira ngo abantu babugire, binyuze mu bumenyi bahabwa, aho kwigishwa gusa mu mashuri abanza, ayisumbuye na kaminuza warangiza ugasanga bwa bumenyi ufite ntacyo wabukoresha. Ni yo mpamvu hagati aho twashyizeho amasomo y’ubumenyingiro kandi ndatekereza ko agamije kuziba icyuho cy’ubushomeri kandi ndatekereza, turagenda tubona umubare w’urubyiruko rwize amasomo y’ubumenyingiro rwiyongera, rufite ubushobozi bwo kugira icyo bikorera bifite icyo birwinjiriza, na mbere y’uko batangira kwiga kaminuza.”

Mbere ya byose ariko ngo u Rwanda rwatangiye rushyira mu bikorwa intego z’ikinyagihumbi ndetse n’icyerekezo 2020 igihugu cyihaye, ubumenyi butangwa bukajyana n’ikoranabuhanga.

Ni muri urwo rwego muri iki cyerekezo, u Rwanda rwihaye intego yo kubaka ubukungu bushingiye ku bumenyi n’ubumenyingiro nk’uko Umukuru w’Igihugu yakomeje abivuga.

Ati “Twaje gusanga ikoranabauhanga rifite umwanya w’ibanze muri izo nzego uko ari ebyiri, by’umwiharaiko mu bijyanye no kwigisha cyangwa mu kuryifashisha kugira ngo umuntu abashe kwiga amasomo y’ubumenyingiro.”

Yakanguriye ibihugu gushora imari mu bijyanye n’ubu bumenyingiro kubera ko ibihugu byageze ku ntera ishimishije y’aya amsomo usanga byaranateye imbere mu buryi bugaragara.

Perezida Kagame yavuze ko nta mpamvu n’imwe uburezi butagombye kugera ku bana bose , ku Isi kuko hari n’ubushobozi bwo kubaha ubufite ireme. Yatanze rugero rwo mu Rwanda.

Yeretse amahanga ko umubare w’abitabira kwiga amashuri abanza mu Rwanda uri ku kigero cya 97%, kandi ko hatibagiranye no kwita ku burezi bw’amashuri yisumbuye amakuru na za kaminuza kuko n’ireme ry’uburezi riganda ryitabwaho umunsi ku wundi.

Yashimye akamaro k’abarimu, yasabye kugakorana ubwitange n’umurava. Yatanze urugero aho bigaga muri Uganda mu nkambi z’impunzi; abana bamwe bigiraga mu nsi y’ibiti abandi bakabibura, abarimu babigishaga badahembwa bakitangira ubwo burezi, bajyaga ku nzu ya buri mpunzi bayisaba kuzana umwana wayo ku ishuri.

Iki gikorwa ngo cyagombye gukoranwa ubwitange busesuye. Yashimye mwarimu Nyabutsitsi Augustin wamwigishaga mu mashuri abanza n’ubu akaba akigisha, urugero rwiza yamuhaye muri aka kazi akomeje kwitangira.

Yavuze ko aba barimu bigisha ubwitange, kwigira no kubahiriza inshingano, buri wese akabibakomoraho kandi bikamugirira akamaro mu buzima.

Yasabye n’abahabwa ubumenyi kudakorera kubona umushahara w’ukwezi ahubwo bakarazawa ishinga no gufasha abandi kugira imibereho myiza.

Iyi nama ibaye ku nshuro ya gatatu izamara iminsi ibiri, yateguwe n’ishami rya Loni ryita ku burezi n’umuco, UNESCO n’abandi baterankunga batandukanye.
Yitabiriwe n’abasaga igihumbi baturutse mu bihugu isaga 50.Irimo kwiga no ku ntego zirambye mu myaka 15 iri imbere, barebera hamwe ibyakwibandwaho mu kunoza uburezi bubereye bose.

Andi mafoto menshi kanda hano

Amafoto: Village Urugwiro

[email protected]
twitter:@NtakirutaDeus


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .