00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yashimiye abamwifurije isabukuru y’amavuko nziza

Yanditswe na Iradukunda Serge
Kuya 24 Ukwakira 2022 saa 02:04
Yasuwe :

Perezida Paul Kagame yashimiye abantu bose bamwifurije isabukuru nziza y’amavuko ubwo yizihizaga imyaka 65 ishize abonye izuba.

Ku Cyumweru tariki 23 Ukwakira nibwo Perezida Kagame yizihiza isabukuru. Kimwe no mu bihe byashize, uyu mwaka abantu benshi biganjemo Abanyarwanda babinyujije mu butumwa butandukanye bashyize ku mbuga nkorayambaga, bagaragaje ko batewe ibyishimo no kuba Perezida Kagame yujuje imyaka 65.

Kuri uyu wa Mbere, abinyujije kuri Twitter, yashimiye aba bantu bose bafashe umwanya wabo bakamwifuriza isabukuru nziza.

Ati "Mfashe uyu mwanya ngo nshimire byimazeyo abanyoherereje ubutumwa bwiza ku isabukuru yanjye y’amavuko."

Yakomeje avuga ko "Nabashije gutsinda no kugira ibyo ngeraho kubera mwe cyangwa kubera ko ko nari ndi kumwe namwe, aho natsinzwe byatewe nanjye ku giti cyanjye, ntacyo mbashinja!!! Imigisha myinshi kuri mwe."

Mu bifurije isabukuru nziza Perezida Kagame harimo na Madamu Jeannette Kagame ndetse n’ubuheta bwabo, Ange Kagame.

Madamu Jeannette Kagame yavuze ko "Buri gihe aba ari umugisha kukwizihiza @PaulKagame! Isabukuru nziza cyane ku muyobozi mwiza, umubyeyi wacu, sekuru w’abana ndetse n’umugabo mwiza. Imyaka 65 ni intambwe ikomeye. Ntewe ishema n‘umuryango twahawe. Uri impano kuri twese!!"

Ange Kagame we yavuze ko aterwa ishema n’uburyo Perezida Kagame ari sekuru mwiza ku bana be, yemeza ko ari inshingano akora neza nk’izindi zose asanganywe.

Ku wa 24 Werurwe 2000 ni bwo Paul Kagame yagizwe Perezida wa Repubulika muri Leta y’Inzibacyuho, asimbuye Pasteur Bizimungu wari umaze kwegura ndetse mu 2003 aza gutorerwa n’abaturage gukomeza izi nshingano.

Perezida Kagame yabonye izuba ku wa 23 Ukwakira 1957, avukira ku musozi wa Tambwe, ubu ni mu Karere ka Ruhango. Ni umuhererezi mu muryango w’abana batandatu, bavuka kuri Rutagambwa Deogratias na Rutagambwa Asteria.

Mu 1959, ubwo yari afite imyaka ibiri, umuryango wa Kagame wahungiye mu Majyaruguru y’Iburasirazuba bw’u Rwanda, aho wamaze imyaka ibiri mbere yo kwerekeza muri Uganda.

Kimwe n’abandi Banyarwanda benshi, ubuzima bwe bwo mu buto yabubaye mu buhunzi muri Uganda kuko ariho yize amashuri abanza n’ayisumbuye.

Perezida Kagame yayoboye urugamba rwo kubohora igihugu ndetse baza kubigeraho mu 1994, nyuma yo guhagarika Jenoside yakorewe Abatutsi.

Perezida Paul Kagame yashimiye abantu bose bamwifurije isabukuru nziza y'amavuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .