Amakosa y’imyandikire mu bitabo byigishirizwamo Ikinyarwanda yakuruye impaka

Yanditswe na Ndahayo Emmanuel
Kuya 10 Kanama 2020 saa 07:43
Yasuwe :
0 0

Ikigo cy’Igihugu gishinzwe guteza imbere uburezi mu Rwanda (REB), cyanenzwe cyane n’abakoresha imbuga nkoranyambaga, nyuma y’uko hongeye kugaragara amakosa y’imyandikire mu bitabo by’Ikinyarwanda bitandukanye.

Urugero ni ikosa ryagaragaye ku gifuniko cy’igitabo kirimo inkuru zo gusomerwa abana, aho mu nyuguti zari zashyizwe kuri icyo gifuniko, harimo iya Q na X zidasanzwe ziba mu rurimi rw’Ikinyarwanda, nubwo ziba mu zindi ndimi nyinshi.

Iki gitabo cyakuruye impaka ku mbuga nkoranyambaga, aho benshi bibazaga uburyo ikosa nk’iryo rigaragara rishobora kwihanganirwa, rikanyura mu nzira zose igitabo kinyuramo gikorwa ntawe urirabutswe, kugeza ubwo igitabo kirangira kigahabwa abanyeshuri ngo bakigiremo.

Izi mpaka zatangijwe n’umunyamakuru Niwemwiza Anne Marie, washyizeho ifoto y’icyo gifuniko cy’igitabo, maze ayiherekesha amagambo agira ati “Nsuhuje @REBRwanda by’umwihariko umukozi wayo wakosoye iki gitabo, niba ahari bamumpembere…..Icyumweru cyiza ku bize inyunguti z’Ikinyarwanda mwese”.

REB yahise isubiza ubwo butumwa, iti “Mwaramutse neza Anne Marie, ni byo koko ikosa ryabereye mu icapiro mu gihe cyo gushyiraho igifuniko cy’iki gitabo ariko ubu iki gitabo kiri gusubizwa mu icapiro kugira ngo hahindurwe igifuniko gusa kuko ni cyo gifite ikibazo. Murakoze!”

Ibi bisobanuro ariko ntibyanyuze ababibonye kuko bakomeje kwibaza uburyo igitabo gitegurwa ku rwego rw’igihugu, kigaca mu maso y’abantu benshi bagisuzuma, kikarinda guhabwa umunyeshuri kikirimo amakosa.

Ukoresha izina Bosco RWANDA1, yagize ati “mbega ubusobanuro budafututse! Ubuse igitabo kiva mu icapiro kikagera aho kijya ku karubanda amakosa ataragaragara gute? Noneho ku gifuniko? Ubwo se mo imbere hameze hate? Ikigaragara musohora ibintu bitasuzumwe, icapiro mwirishyiraho amakosa”.

Nizeyimana Alexis yongeyeho ati “Iki gisobanuro wagira ngo muragiha abantu babonye ibitabo bwa mbere! Icapiro se ni ryo ryishakiye igifuniko cyangwa ryahinduye icyo ryari ryahawe? Iyo mugira muti ‘twiseguye ku banyarwanda kubera iri kosa, tugiye kurikosora kandi ubutaha tuzajya tugenzura neza kurushaho’ mwari kuba iki?”

Uwitwa Stephen Blunden, yanditse nk’uwagize uruhare mu isohorwa ry’icyo gitabo, agira ati “@SomaUmunyeRw izi amakosa ari ku bifuniko bine muri uru ruhererekane. Ibyo bitabo byabonetse muri 2017 n’ubwo byatanzwe muri 2019. Twari dufite gahunda yo kubigarura [kugira ngo bisubirwemo] muri Werurwe 2020 ariko byahagaritswe na COVID-19”.

Yongeyeho ati “tuzi ayo makosa kandi azakosorwa. Ni ibitabo byo gusoma miliyoni 1.3 bizatizwa abana bo mu wa mbere kugera mu wa gatatu w’amashuri abanza [P1-P3] bashobora gutira bakitoza kandi bakongera [ubushobozi bwabo bwo] gusoma. Iyo ni ishusho ngari”.

Ibi ariko ntibyahagije inyota y’abari ku rubuga, kuko ibibazo by’uzishyura isubirwamo ry’ibyo bitabo, icyuho bisiga mu ireme ry’uburezi n’ibindi nk’ibyo byakomeje kwiganza ku rubuga.

Bizimana Alphonse yagize ati “rwose ibitabo byanyu bisohoka birimo amakosa, numva mwagashyizeho abazajya bakurikirana imyandikire mbere yo kujya mu icapiro na nyuma y’uko bisohotse. Niba ikosa rigaragaye inyuma ubwo imbere hameze hate? Ireme ry’uburezi burya risuzumirwa mu nguni nyinshi”.

Murinda Dismas yongeyeho ati “byabatwara iki mugiye mubanza kugeza draft (ibyateguriweho) za soft copies (ibitabo bitaracapwa) ku bafatanyabikorwa banyu mbere yo kwihutira mu icapiro? Ese igihombo muteza kibazwa nde? Ate?”

Naho uwitwa Professor yagize ati “Ubu se kopi zacyo si nka miliyoni ra? Ubwo iyo budget [ingengo y’imari] ntipfuye ubusa hejuru y’agakosa k’amafuti kanyuze imbere y’abantu benshi kandi bize?”.

Uwitwa Tom Ndahiro yahise azana ikindi gitabo kirimo amakosa agira ati “Hari umbwiye ko iki gitabo cyakwijwe mu mashuri. Niba gifite amakosa akomeye ku rupapuro rubanza ahandi bimeze bite? Ni uburezi cyangwa ni uburozi?”.

Ikibazo cy’amakosa y’imyandikire cyakomeje kuvugwa mu bitabo by’amashuri cyane cyane abanza mu Rwanda. Mu mwaka wa 2017 nabwo igitabo cy’amasomo y’ubumenyi rusange cyo mu mwaka wa kane w’amashuri yisumbuye cyanditswe n’icapiro ry’abahinde ryitwa LAXMI mu 2016, cyahagaritswe cyari kimaze ukwezi gitanzwe mu mashuri yo mu gihugu.

Icyo gihe cyahagaritswe kuko cyarimo amagambo apfobya Jenoside yakorewe Abatutsi mu Rwanda mu 1994.

Inyuguti z'Ikinyarwanda zashyizwemo Q na X kandi zitabamo
Iki gitabo nacyo cyagaragayemo amakosa ku gifuniko biteza impaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .