Amajyepfo: RGB yasabwe kuvugurura uburyo ikoramo ubushakashatsi bwa ’CRC’

Yanditswe na Prudence Kwizera
Kuya 11 Ugushyingo 2020 saa 08:06
Yasuwe :
0 0

Nyuma yo kumurikirwa ibyavuye mu bushakashatsi bwakozwe n’Urwego rw’Igihugu rw’Imiyoborere (RGB) bugaragaza igipimo cy’imitangire ya serivise n’imiyoborere mu Rwanda, bamwe mu bayobozi bo mu turere tugize Intara y’Amajyepfo basabye ko ubutaha bwazakorwa mu buryo bwimbitse bukajya bwerekana aho izingiro ry’ikibazo riri aho kuvuga muri rusange gusa.

Ubwo bushakashatsi bwa RGB buzwi nka CRC (Citizen Report Card) bukorwa buri mwaka hagamijwe kugaragaza ishusho y’uko imiyoborere ihagaze mu gihugu mu byiciro bitandukanye no kugaragaza ingamba mu gushyiraho politiki mu nzego zitandukanye z’igihugu.

Kuri uyu wa 10 Ugushyingo, ubwo mu Ntara y’Amajyepfo hamurikwaga ibyavuye mu bushakashatsi bwa Karindwi bwa RGB bw’umwaka wa 2019/2020, bamwe mu batanze ibitekerezo basabye ko hari ibikwiye kuvugururwa.

Bagaragaje ko akenshi ubwo bushakashatsi bukunze kuvuga ko abaturage batishimiye ikintu runaka muri rusange ariko ntibugaragaze neza izingiro ry’ikibazo.

Bavuze ko budatanga amakuru yizewe ashobora kugaragaza aho izingiro ry’ibibazo biba byagaragajwe n’abaturage riri, kugira ngo bishakirwe ibisubizo.

Urugero ni nko mu Karere ka Nyaruguru aho ubwo bushakashatsi bwerekana ko hari abaturage benshi bagaragaje ko batishimiye uburyo umuriro w’amashanyarazi ubageraho kandi nyamara imibare yerekana ko ingo ziyafite muri ako karere ziri ku kigero cya 93%.

Umuyobozi w’Akarere ka Nyaruguru, Habitegeko François, yafashe ijambo asaba RGB kujya inoza ayo makuru kugira ngo abaturage bagaragaze icyo bashingiraho batishimira amashanyarazi.

Yagize ati “Ahongaho niho nagira ngo tuganire na RGB turebe niba nta vugurura ryabaho muri ibi bipimo kuko buri gihe ikigaragara nyine ni ishusho, hari amakuru itanga ariko hari n’ayo idatanga, twifuza ko mu bibazo bibazwa hakwiye kubaho ikintu kibazwa ngo ni ukubera iki utishimiye iki kintu, impamvu ibitera ni iyihe.”

“Niba atishimiye amashanyarazi, ese ni uko aza acika, ese ni uko atamugeraho, ese ni uko umuturanyi we yayabonye we ntiyayabona? Ni iki atishimiye? icyo kintu kigomba kuba kigaragara noneho tugakuramo isomo ridufasha gufata ibyemezo hakagira igihinduka.”

RGB yagaragaje ko ikora ubushakashatsi yabajije abaturage basaga 2000 gusa, bituma bamwe mu bayobozi b’inzego z’ibanze bifuza ko uwo mubare nawo ukwiye kongerwa kugira ngo amakuru atangwa abe yizewe.

Umuyobozi w’Akarere ka Nyanza, Ntazinda Erasme, yagize ati “Icyo umuntu yavuga bakongeramo imbaraga mbona ari uko bakongera umubare w’ababazwa nicyo mbona cyaba kizima, kuko habazwa abantu bakeya bikaba byatanga wenda ishusho idahagije.”

Umunyamabanga Mukuru wa RGB, Kalisa Edouard, yavuze ko ibitekerezo bahawe n’abayobozi mu Ntara y’Amajyepfo bazabizirikana mu bundi bushakashatsi buzakorwa ubutaha.

Yagize ati “Icyo twakongeramo twumvise ni uko ari byiza ko abaturage bagaragaza ibitagenda ariko tuba dukeneye no kumenya impamvu babivuga, ngira ngo ako ni akantu twagira umwihariko. Turumva dushobora kongeramo andi makuru atuma ibyo byashoboka.”

“Ubwo rero icyo turi burebe ni ukureba icyakongerwamo kugira ngo hajyemo amakuru y’inyongera azafasha abayobozi gushaka umuti w’ibibazo.”

RGB kandi yavuze ko haramutse hari akarere kifuza kumenya amakuru arambuye ku bushakashatsi bwagakozweho kayitumira ikaza kububasobanurira mu buryo bwimbitse.

Abayobozi b'uturere two mu Ntara y'Amajyepfo bagaragarijwe ibyavuye mu bushakashatsi bwa RGB, basaba ko uburyo bukorwamo bwavugururwa
Guverineri w'Intara y'Amajyepfo Kayitesi Alice yasabye abayobozi ku nzego z'ibanze ubufatanye muri byose
Umuyobozi w'Akarere ka Nyaruguru, Habitegeko ni umwe mu bari bitabiriye iri murikwa ry'ubushakashatsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .