Amajyepfo: Huzuye imihanda ya kaburimbo yatwaye miliyari 29.8 Frw

Yanditswe na Prudence Kwizera
Kuya 16 Nzeri 2020 saa 08:15
Yasuwe :
0 0

Minisiteri y’Ibikorwa Remezo (Mininfra) yatangaje ko hasojwe ibikorwa byo kubaka no gusana imihanda ya kaburimbo irimo uwa Huye- Kitabi, Huye-Gisagara na Nyamagabe-Murambi yatwaye amafaranga y’u Rwanda angana na miliyari 29.8 Frw.

Ibinyujije ku rukuta rwayo rwa Twitter, Mininfra yavuze ko iyo mihanda yose yuzuye ku kigero cya 100%.

Yagize iti “Ibikorwa byo kubaka no gusana umuhanda wa kilometero 53 wa Huye-Kitabi uhuza Uturere twa Huye na Nyamagabe na Rusizi na Nyamasheke; ukongeraho n’umuhanda wa Huye-Gisagara wa kilometero 13.8 hamwe n’umuhanda Nyamagabe-Murambi wa kilometero 2.8 yose yuzuye ku kigero cya 100%. Ikiguzi yatwaye ni miliyari 29.8 Frw.”

Umuhanda wa Kaburimbo Huye-Gisagara ureshya na kilometero 13.8 uturuka i Huye ukagera ku Biro by’Akarere ka Gisagara; abaturage bawemerewe na Perezida Kagame Paul. Watangiye kubakwa tariki ya 8 Ukwakira 2018 wuzura utwaye asaga miliyari 6.5Frw.

Ni igikorwa remezo gikomeye abaturage bishimiye bavuga ko cyongereye agaciro ibyo bakora.

Mukamusoni Marie Claire aheruka kubwira IGIHE ko “Aho dukorera hongerewe agaciro kuko batuzaniye kaburimbo. By’umwihariko nk’abagore twishimiye ko iterambere rigeze iwacu kandi bitwongerera imbaraga mu byo dukora.”

Kuri ubu uwo muhanda wamaze gushyirwaho amashanyarazi awucanira.
Umuyobozi w’Akarere ka Gisagara, Rutaburingoga Jérôme, avuga ko batangiye kureshya abashoramari kugira ngo umuhanda wa kaburimbo uzagire ibikorwa by’amajyambere bijyana nawo.

Ibyo bikorwa birimo gare n’inzu zigezweho zizubakwa mu Murenge wa Ndora, imidugudu y’icyitegererezo, amahoteli n’amabanki.

Yakomeje ati “Mu by’ukuri hakenewe ibikorwa remezo byinshi nka gare kandi twatangiye kuvugana n’abashoramari barimo n’amabanki kuko hano hari ibikorwa byinshi abantu bakungukiramo.”

Yakomeje avuga ko batangiye no kugurisha ibibanza ahazubakwa Umujyi wa Ndora ndetse no gufasha ababiguze kubona ibyangombwa byo kubaka mu buryo bwihuse.

Umuhanda wa kaburimbo Huye- Kitabi ufite ibilometero 53 uva mu Mujyi wa Huye werekeza i Nyamagabe ukagera mu Murenge wa Kitabi watangiye gusanwa no kwagurwa muri Kanama 2018. Uwo muhanda uhuza Uturere twa Huye na Nyamagabe two mu Majyepfo ndetse ugakomeza uduhuza n’utwa Rusizi na Nyamasheke two mu Ntara y’Iburengerazuba.

Bamwe mu batwara ibinyabiziga bawunyuramo baherutse kubwira IGIHE ko bishimira ko waguwe ukanasanwa kuko wari muto mu bugari kandi urimo ibinogo byinshi bikaba byateza impanuka kuko imodoka zitari zikibasha kubisikana uko bikwiye.

Umushoferi utwara ikamyo witwa Harerimana Jean Paul yagize ati “Uyu muhanda wahoze ufite imbogamizi nyinshi kuko byaragoranaga ko imodoka ebyiri zibisikana, byabaga ngombwa ko umwe abanza guhagarara akareka undi agahita. Hahozemo n’ibinogo byinshi ku buryo kuwugendamo byari ikibazo. Kuri ubu waguwe turi kuwunyuramo nta kibazo kuko ibibazo wari ufite byakemutse.”

Ubwo ibikorwa byo kuwusana byari birimbanyije Umuyobozi w’Akarere ka Nyamagabe, Uwamahoro Bonaventure, yabwiye IGIHE ko nurangira bizarushaho kwihutisha iterambere kandi bizafasha no guteza imbere ubukerarugendo by’umwihariko ku basura Pariki y’Igihugu ya Nyungwe.

Yagize ati “Ni umuhanda twizeye ko mbere na mbere uzadufasha guteza imbere ubukerarugendo muri Pariki y’Igihugu ya Nyungwe ariko ukadufasha no mu kongera ubucuruzi cyane cyane kugeza imyaka ku isoko.”

Ibilometero 53 by’umuhanda Huye-Kitabi byatwaye amafaranga y’u Rwanda asaga miliyari 22.

Umuhanda wa kaburimbo Nyamagabe-Murambi wa kilometero 2.8 waje ukenewe kuko byagoraga abantu kwerekeza ku Rwibutso rwa Jenoside yakorewe Abatutsi rwa Murambi.

Ni igisubizo ku baturage bo mu Karere ka Nyamagabe n’abandi bakunze kujya i Murambi kwibuka Jenoside yakorewe Abatutsi no gusura urwibutso kugira ngo bimenyere amateka y’u Rwanda rubitse.

Kuri ubu mu Karere ka Nyaruguru ko mu Ntara y’Amajyepfo harimbanyije ibikorwa byo kubaka umuhanda wa kaburimbo Huye-Kibeho-Munini-Ngoma wa kilometero 66 uzatwara agera kuri miliyari hafi 70 Frw. Mu kuwubaka kandi hazashyirwamo n’imihanda yo mu Mujyi wa Kibeho ingana na kilometero zirindwi.

Ibilometero 53 by’umuhanda Huye-Kitabi byatwaye amafaranga y’u Rwanda asaga miliyari 22
Mu Karere ka Nyaruguru mu Ntara y’Amajyepfo harimbanyije ibikorwa byo kubaka umuhanda wa kaburimbo Huye-Kibeho-Munini-Ngoma wa kilometero 66
Umuhanda Huye-Gisagara watangiye kubakwa mu Ukwakira 2018
Umuhanda Huye-Kitabi uhuza Uturere twa Huye na Nyamagabe two mu Majyepfo ndetse ugakomeza uduhuza n’utwa Rusizi na Nyamasheke two mu Ntara y’Iburengerazuba
Umuhanda wa kaburimbo Huye-Gisagara wamaze gucanirwa
Umuhanda wa kaburimbo Huye-Kitabi ufite ibilometero 53 uva mu Mujyi wa Huye werekeza i Nyamagabe ukagera mu Murenge wa Kitabi watangiye gusanwa no kwagurwa muri Kanama 2018
Umuhanda wa kaburimbo Huye-Kitabi wamaze kuzura

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .