00:00:00 IGIHE NETWORK KN KINYARWANDA EN ENGLISH FR FRANCAIS

Amajyepfo: Barindwi bafatanywe inyandiko mpimbano bashaka gukorera impushya zo gutwara ibinyabiziga

Yanditswe na Prudence Kwizera
Kuya 11 Mutarama 2022 saa 07:02
Yasuwe :

Abantu barindwi bafatiwe mu turere twa Nyamagabe na Huye ahakorerwa ibizamini by’impushya zo gutwara ibinyabiziga, aho bakurikiranyweho ibyaha byo gucura inyandiko mpimbano birimo guhimba ubutumwa bugaragaza ko batanduye Covid-19, naho abandi bahimbye indangamuntu za bagenzi babo kugira ngo babakorere ikizamini.

Abagera kuri bane barimo umugore umwe bafatiwe mu Karere ka Nyamagabe kuri uyu wa 10 Mutarama 2022 bahimbye indangamuntu za bagenzi babo kugira ngo babakorere ikizamini.

Abandi batatu bafatiwe muri Stade ya Huye kuri uyu wa Kabiri tariki ya 11 Mutarama 2022 ahakorewe ibizamini by’impushya z’agateganyo zo gutwara ibinyabiziga bahimbye ubutumwa bw’Ikigo cy’igihugu cy’Ubuzima, RBC, bugaragaza ko bipimishije Covid-19 bagasanga ari bazima nyamara baranduye.

Umuvugizi wa Polisi y’u Rwanda mu Ntara y’Amajyepfo, SP Kanamugire Theobald, yabwiye IGIHE ko bafatiwe mu igenzura ryakoze na Polisi y’Igihugu.

Ati “Abo mu Karere ka Nyamagabe bafashwe ejo ari bane bahimbye indangamuntu za bagenzi babo kugira ngo babakorere ikizamini. Mu Karere ka Huye hafashwe batatu bahimbye ubutumwa bugaragaza ko batanduye Covid-19.”

Yakomeje avuga ko abafatiwe mu Karere ka Huye bari bafite ubundi butumwa bugaragaza ko bipimishije icyorezo cya Covid-19 basanga bataracyanduye, nyamara ahubwo bari bakirwaye. Abo bahise bashyirwa ku ruhande mu kato.

Bose hamwe uko ari barindwi bakimara gufatwa bashyikirijwe Urwego rw’Igihugu rw’Ubugenzacyaha, RIB, kugira ngo bakorerwe dosiye ishyikirizwe ubushinjacyaha ku cyaha bakurikiranyweho cyo gucura inyandiko mpimbano.

Yasabye abakorera impushya zo gutwara ibinyabiziga kwirinda ibyaha kuko bihanwa n’amategeko.

Yagiriye inama abasanga baranduye Covid-19 ko bakwiye kwirinda guhimba ubutumwa ahubwo ko bagomba kujya kwa muganga bakavurwa, bakazaza gukora ibizamanini nyuma bamaze gukira.

Icyaha cyo gukoresha inyandiko mpimbano gihanishwa igifungo kuva ku myaka itanu kugera kuri irindwi ndetse n’ihazabu y’amafaranga atari munsi ya miliyoni 3 Frw ariko atarenze miliyoni 5 Frw cyangwa kimwe muri ibyo bihano.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .