Amajyaruguru: Kuba nta mabagiro y’ingurube ahari, bituma bakemanga ubuziranenge bw’akabenzi

Yanditswe na N.Kubwimana Janvière
Kuya 10 Gashyantare 2020 saa 02:55
Yasuwe :
0 0

Bamwe mu bakunzi b’inyama z’ingurube, bakunze kwita akabenzi, baracyakemanga ubuziranenge bwako, bitewe n’uko nta amabagiro yazo agezweho azwi mu Ntara y’Amajyaruguru, bigatuma abenshi bazibagira mu ntoki no mu bigunda.

Iki kibazo cyo kutagira amabagiro ahagije agezweho yo kubagiramo ingurube, kinabangamiye bikomeye aborozi bazo, kuko ngo iyo babonye isoko rigari ryo kugemura inyama z’ingurube bibasaba kujya kuzibagishiriza ku ibagiro rya Rubavu, abandi bakazijyana mu Karere ka Gakenke, gusa bakavuga ko bamwe hababera kure, bigatuma inyugu babonamo iba nke cyane ugereranyije n’ibyo bashoye.

Bimwe mu bituma abakunda akabenzi bavuga ko batizera neza ubuziranenge bwako, ni uko iyo bazibagiye mu ntoki, mu bigunda n’ahandi nta muganga w’amatungo uba wazigezeho ngo azisuzume niba nta burwayi zifite.

Ndikumwenayo Didier yagize ati "Tujya tubona amabagiro menshi y’inka kandi agezweho, ariko sindabona iry’ingurube, kandi akabenzi gakunzwe kurusha izindi nyama muzi. Akenshi bazibagira mu ntoki no mu bigunda nta na muganga w’amatungo uhageze ngo nibura ayisuzume, ubu se twabura gute kwandura indwara tutazi? Nibashyireho ibagiro rimeze neza abe ariho bazajya bazibagira banazisuzume mbere yo kuzigemura aho zikenewe".

Uhagarariye ishyirahamwe ry’aborozi b’ingurube mu Rwanda, Shirimpumu Jean Claude ,na we avuga ko usibye kuba zibagirwa ahantu hatizewe ngo haracyari n’ikibazo gikomeye mu mitwarire y’inyama zazo, aho ngo zitwarwa mu mifuka ku magare, mu ndobo, ndetse hakaba n’abazikorera ku mutwe.

Ati "Turacyafite ikibazo gikomeye mu gihugu cyo kutagira amabagiro agezweho, bituma isuku mu gutegura inyama z’ingurube iba nke cyane, ku buryo zigera ku muturage zitujuje ubuziranenge. Ubu 90% by’ingurube tugurisha mu mahanga zigenda ari nzima kandi biragoranye mu buryo bwo kuzitwara, hakiyongeraho kuba iyo zibazwe zitwarwa mu buryo bugayitse, bazipakira ku magare, kuri moto. Hari n’abazitwara ku mutwe, byose bikuraho ubuziranenge bwazo, ariko habonetse amabagiro ahagije iki kibazo cyakemuka".

Shirimpumu asaba aborozi b’ingurube kwishyira hamwe, kugira ngo ubworozi bakora burusheho kugenda neza kuko bizabafasha kubona amakuru yizewe ku bucuruzi bwazo, ku biryo byazo n’ibindi, ndetse ikaba n’imwe mu nzira yo guhangana na bimwe mu bibazo bikigaragara muri ubu bworozi harimo no gugabanya iki kibazo cyo kutagira amabagiro.

Umukozi muri Minisiteri y’ubuhinzi n’ubworozi, uyobora ishami ricunga ubuziranenge bw’ibikomoka ku matungo n’ubuhinzi, Uwumukiza Béatrice, yavuze ko amabagiro y’ingurube akiri make cyane ugereranyije n’umubare wazo, gusa akavuga ko iki kibazo kizaganirwaho hagati ya Leta n’abikorera, kigashakirwa umuti.

Yaboneyeho kuburira abatita ku buziranenge bw’inyama bitwaje ubuke bw’amabagiro, avuga ko bazabihanirwa.

Ati " Abo bo itegeko rirahari kandi bazabihanirwa, ariko na ba veterineri b’imirenge n’uturere badufashe kubigenzura. Naho icy’amabagiro y’ingurube cyo aracyari make, ariko tugiye kuganira hagati ya Lela n’abikorera hongerwe amabagiro."

Minisiteri y’ubuhinzi n’ubworozi ifatanije n’ibindi bigo biyishamikiyeho iteganya ko mu myaka 10 iri imbere, inyama zizajya zikoreshwa 80%, zizaba zituruka ku matungo magufi arimo inkoko n’ingurube, ingurube zikaziharira 48%.

Imibare igaragaza kandi ko mu gihugu habarurwa ingurube ziri hagati ya miliyoni 1.6 na miliyoni 1.8.

Nubwo inyama z'ingurube ari zimwe mu zikunzwe mu Majyaruguru, nta bagiro ryazo rihaba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza