00:00:00 IGIHE NETWORK KN KINYARWANDA EN ENGLISH FR FRANCAIS

Amajyaruguru: Hatangijwe gahunda yo gusubiza mu ishuri abarenga 3600 baritaye

Yanditswe na Claude Bazatsinda
Kuya 26 April 2022 saa 02:54
Yasuwe :

Ubuyobozi bw’Intara y’Amajyaruguru bwatangiye gahunda ikomatanyije buzahuriraho n’ababyeyi n’abarezi mu gukemura ibibazo byose byatumaga abana bata amashuri, bwiyemeza gufasha abana bagera ku 3639 bataye ishuri kurigarukamo.

Ubu bukangurambaga bwatangiye kuri uyu wa Mbere tariki 25 Mata 2022, buzakorerwa mu bigo by’amashuri, amasoko, mu nama no mu makoraniro atandukanye hagamijwe gusobanura ibyo amategeko n’ibihano biteganya ku bantu bose bagira uruhare mu gutuma abana bata amashuri ndetse no gushakira ibisubizo ibibazo byose bituma abana bata amashuri.

Umuyobozi w’Intara y’Amajyaruguru, Nyirarugero Dancille, yavuze ko mu busesenguzi bwakozwe ku kibazo cyo guta amashuri mu Ntara y’Amajyaruguru basanze gishingiye ku bibazo bitandukanye birimo iby’ababyeyi birengagiza inshingano zabo, kubyara abo badashoboye kurera, ubukene, abana bashorwa mu bikorwa byo gukorera amafaranga mu ngo z’abifite no mu bucuruzi buciriritse n’ibindi.

Yagize ati “Mu mpamvu twabonye zatumye abo bana bata ishuri harimo, aho ababyeyi bagikoresha abana imirimo yo mu ngo, hari imyumvire mibi y’ababyeyi no guta inshingano za kibyeyi, hari bamwe mu bana basoza ibyiciro by’amashuri bakumva ko bayarangije, hari n’amakimbirane yo mu ngo."

"Mu mpamvu kandi twabonye harimo no kuba hari abanyeshuri bajya mu bucuruzi bw’ibisheke, gukora mu yindi mirimo yo gusoroma icyayi no gutunda amatafari, hari abatsindwa ntibagire umurava wo gukomeza hari n’ubukene bw’ababyeyi batabonera abana babo ibyangombwa nkenerwa ku ishuri."

Guverineri Nyirarugero yakomeje avuga ko bafashe ingamba zizabafasha kugarura abo bana mu mashuri ariko agahamya ko kugira ngo bigerweho buri wese agomba kubigira ibye.

Ati “Twafashe ingamba zo gukora ubukangurambaga urugo ku rundi bwo kugarura abataye ishuri, kumenya umubare w’abataye ishuri bari mu mirimo yo mu ngo bakarigarurwamo tukigisha abakibakoresha byaba ngombwa bakanabihanirwa, hari kandi no kwigisha ababyeyi uruhare rwabo mu myigire y’ababa babo."

Bamwe mu babyeyi bafite abana bakiri mu mashuri, nabo bemeza ko uruhare rwa buri wese arirwo rizabafasha mu kurandura ibibazo biri mu burezi birimo n’ibituma abana bata amashuri ariko cyane cyane urwabo n’ubwo hari n’abavuga ko bakibangamiwe n’ubukene.

Rubikiye Xaveri ni umwe muri bo, yagize ati" Ababyeyi nitwe tugomba kubigiramo uruhare abana bacu tukabaha ibyangombwa bakenera ngo bige ndetse tukanabakangurira kujya kwiga, tukabaha ibyo kurya, tukabagirira isuku ndetse n’ibindi bakenera ngo bige. Ababyeyi bafite ibyo kurya bakabitanga ku ishuri noneho n’abandi batabifite bakaboneraho bityo tugatera imbere twese."

Nyirakamana Venantie nawe yagize ati" Abana sinabasibya ishuri n’ubwo nta bushobozi dufite kandi abanjye ntabwo bari babirukana. Ku ishuri twe tudafite ubushobozi ntabwo baduha akazi ngo dukore kuko baba bafite abakozi babo bagakora, bazadutekerezeho twe tudafite ubushobozi bajye baduha imirimo dukore."

Mu bana bagera ku 10 906 bo mu mashuri abanza bari barataye amashuri mu Ntara y’Amajyaruguru abagera ku 9 027 bamaze kurisubizwamo naho abagera ku 1 879 baracyashakishwa ngo barigarurwemo mu gihe 3940 bari barayataye mu mashuri yisumbuye 2180 baragaruwe naho 1760 baracyashakishwa ngo bagarurwemo.

Mu Majyaruguru hatangijwe icyumweru cy'uburezi hagamijwe kugarura mu ishuri abarenga 3600 baritaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .