Amajyaruguru: Bamwe mu banyeshuri biga bacumbikirwa bamara igihembwe batazi aho igihugu kigeze

Yanditswe na N.Kubwimana Janvière
Kuya 23 Gicurasi 2019 saa 11:58
Yasuwe :
0 0

Bamwe mu banyeshuri biga mu mashuri yisumbuye biga bacumbikiwe ku mashuri, bemeza ko kudahabwa umwanya ngo bakurikirane amakuru kuri radiyo cyangwa televiziyo, bituma igihe bamara ku ishuri batamenya aho Isi igeze.

Aba banyeshuri bavuga ko baba bafite radiyo na televiziyo ku mashuri ariko bigakunda gukoreshwa muri gahunda z’imyidagaduro gusa ntibahabwe umwanya wo kureba no kumva amakuru.

Bamwe mu banyeshuri bagiranye ikiganiro na IGIHE bagaragaza ingaruka bagirwaho no kuba batamenya amakuru.

Ndatira Bertrand wiga muri Regina Pacis i Musanze yagize ati “Ku ishuri iwacu tuba dufite radiyo na televiziyo ariko usanga zikoreshwa mu myidagaduro. Na yo ni ngombwa ariko icyambere ni amakuru. Hari ubwo Perezida wacu asura ahantu ntitubimenye kandi tuba dukeneye kumva impanuro ze”.

Akomeza agira ati “Hari ubwo bahindura abayobozi ntitubimenye, mbese iyo tugiye mu biruhuko dusanga turi nk’abashyitsi kuri gahunda za leta”.

Mucyombwe Beatrice, wiga muri APAPEKI Cyuru, nawe ati “Aho niga tureba televiziyo rimwe mu gihembwe nabwo turangije ibizamini [chômage], kandi tukareba amafilime gusa, amakuru yo tuyumva dutashye. Nubwo twaje guhaha ubumenyi ntibihagije tutazi amakuru ku gihugu cyacu n’Isi muri rusange”.

Mu bigo bimwe na bimwe habamo amatsinda y’itangazamakuru (Media Club), ageza amakuru ku banyeshuri ariko nayo atangaza ayo abona mu kigo kuko nta mwanya utangwa wo kumva amakuru y’igihugu n’Isi muri rusange.

Umunyamabanga Nshingwabikorwa umuryango w’abakoranabushake b’urubyiruko baharanira iterambere ry’itangazamakuru no kuvugira mu ruhame, Ishimwe Fabrice, avuga ko kuba abanyeshuri baragiye guhaha ubumenyi ngo bazavemo abayobozi b’ejo hazaza bitaborohera badakurikira gahunda za leta.

Ati “Biragoye ku munyeshuri wagiye guhaha ubumenyi ngo azavemo umuyobozi w’ejo hazaza h’igihugu cye yabigeraho atazi gahunda za leta kuko no muri gereza ubwaho bakurikirana amakuru umunsi ku wundi”.

Akomeza avuga ko barimo gutegura uburyo bagirana ibiganiro n’abashinzwe uburezi hakarebwa uko iki kibazo cyabonerwa umuti urambye.

Umuyobozi w’ishuri rya G.S Kampanga, mu Karere ka Musanze, Twagirimana Jean de Dieu, avuga ko nubwo amakuru akenshi atambuka abanyeshuri bari mu masomo, umwanya baba bagiye gufata ifunguro bawuhuza no kubafasha bagakurikirana amakuru.

Ati “Nubwo amakuru akenshi akunze gutambuka abanyeshuri barimo gusubira mu masomo, ariko iyo bagiye mu karuhuko ko gufata ifunguro amakuru yo ku manywa aba atambuka, hanyuma bagafata ifunguro ariko banumva amakuru. Twebwe uwo mwanya turawukoresha, ariko n’aho batabikora babishyira muri gahunda kuko biba no mu mabwiriza yacu”.

Umukozi ushinzwe imibereho myiza, imiyoborere n’ibigo by’amashuri mu Ntara y’Amajyaruguru, Mukansaga Solange, avuga ko iki kibazo kigomba kurangirana no muri Kamena uyu mwaka.

Ati “Nibyo koko abanyeshuri baba bagiye ku mashuri gushaka ubumenyi, ariko nabwo ntibabugeraho badakurikira amakuru ngo bamenye gahunda z’amakuru acicikana hirya no hino ku Isi”.

“Nubwo akenshi baba bari mu masomo ariko mu gihe bagiye gufata ifunguro bashyira radiyo mu cyumba mberabyombi [sale] bakumva amakuru, ku cyumweru nabwo hatambuka amakuru y’ingenzi yaranze icyumweru nabwo bashyira televiziyo mu cyumba abana bagakurikira amakuru, bakamenya gahunda zitandukanye za leta”.

Mukansanga avuga ko bagiye kuganira n’abashinzwe uburezi bakosore iki kibazo, kandi bizera ko abanyeshuri mu ntangiro za Kamena uyu mwaka bazajya bakurikirana amakuru.

Bamwe mu banyeshuri biga bacumbikirwa bavuga ko hari ubwo bamara amezi atatu batazi aho igihugu kigeze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza