00:00:00 IGIHE NETWORK KN KINYARWANDA EN ENGLISH FR FRANCAIS

Akeneye ubufasha bwa Perezida wa Repubulika ngo ahabwe imitungo ye

Yanditswe na

Gaston Rwaka

Kuya 26 December 2013 saa 12:03
Yasuwe :

Umukecuru Mukarubayiza Margueritte w’ imyaka 84, aratabaza Perezida wa Repubulika amusaba kumurenganura agasubizwa imitungo ye ikubiyemo isambu nini ifite hegitari zisaga 30 iri mu Kagari ka Mataba mu Murenge wa Mageragere mu Karere ka Nyarugenge n’inka 70.
Amakuru dukesha bamwe mu baturage b’uyu mukecuru bo mu Kagari ka Mataba yemeza ko imitungo ya Mukarubayiza yagiye isaranganywa n’imiryango y’abari bashinzwe kuyirinda nyuma y’ umwaka wa 1959.
Mu kiganiro kirambuye na IGIHE, (…)

Umukecuru Mukarubayiza Margueritte w’ imyaka 84, aratabaza Perezida wa Repubulika amusaba kumurenganura agasubizwa imitungo ye ikubiyemo isambu nini ifite hegitari zisaga 30 iri mu Kagari ka Mataba mu Murenge wa Mageragere mu Karere ka Nyarugenge n’inka 70.

Amakuru dukesha bamwe mu baturage b’uyu mukecuru bo mu Kagari ka Mataba
yemeza ko imitungo ya Mukarubayiza yagiye isaranganywa n’imiryango y’abari bashinzwe kuyirinda nyuma y’ umwaka wa 1959.

Mu kiganiro kirambuye na IGIHE, Mukarubayiza yavuze ko ababajwe no kubona agiye gusazira ku mukwe we umucumbikiye kuva yataha mu Rwanda mu 1994, kandi afite umutungo yasigiwe na se umubyara Rudatsikira Benedigito mwene Kayondo wahoze ari umutware ku ngoma y’Umwami Mutara III Rudahigwa.

Mukarubayiza ati “Nubwo nari narahunze mu Rwanda sinigeze ndeka gukurikirana imitungo yanjye kuko ndibuka nko mu 1988 naraje i Mataba nishyura imisoro y’ inka ndetse na nyuma y’aho abo bagabo bigabanyije ibyanjye bazaga no kunsura banzaniye impapuro ngomba gusinya. Ndasaba rwose kurenganurwa.”

Uyu mukecuru avuga ko kuva na kera leta ari yo yageneraga ingungu zayo (abakene) aho gutura, ikaba ikwiye kumufasha kubona imitungo ye ikita ku bayifite ikabagenera icyasimbura imitungo bafite atari iyabo aho kugira ngo bamutwarire imitungo.

Mukarubayiza yabwiye IGIHE ko asaba kurenganurwa agasubizwa imitungo ye mu maguru mashya, byaba ngombwa akaba ari we ugenera abayifuza bitandukanye n’uko bashaka kumugenera mu bye.

Nyiramivumbi Catherine, umugore wa Nyamurinda wari umukozi wa se wa Mukarubayiza, yemera ko umugabo we kimwe na Figi bari abakozi ba Rudatsikira (se wa Mukarubayiza) banarindishwa imitungo ye yari igizwe ahanini n’isambu ngari n’ inka.

Nyiramivumbi yemera ko umugabo we na Figi barengereye bakagabanyiriza abavandimwe babo ku mitungo ya Rudatsikira mwene Kayondo bitwaza ko abagize umuryango we (Mukarubayiza) bapfiriye gushira.

Imyanzuro y’ inama y’ umutekano y’Umurenge wa Mageragere yo ku wa 27 Kanama 2008 yari yategetse ko Kimonyo Xavier na Nyirabukara Marceline bari mu isambu ya Mukarubayiza bayimusubiza, ariko na we akoroshya ku kibazo cy’ inka ze zariwe akanagenera abahagarariye imiryango ya Figi na Nyamurinda aho gutura no guhinga nk’uko byanditswe mu ibaruwa IGIHE ifitiye kopi.

Iyi myanzuro yari yemeje ko ahabwa imitungo ye ariko si ko byagenze

Mu gihe Mukarubayiza amaze imyaka igera kuri itanu aharanira gusubizwa imitungo ye ntibimukundire, arasaba Perezida wa Repubulika y’ u Rwanda ko akoresheje ububasha ahabwa n’amategeko yamurenganura akamukemurira ikibazo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .