Akarere ka Burera kahagurukiye ikibazo cy’abana barazwa irondo

Yanditswe na N.Kubwimana Janvière
Kuya 16 Nzeri 2019 saa 08:32
Yasuwe :
0 0

Ubuyobozi bw’akarere ka Burera bwahagurikiye ikibazo giherutse kugaragazwa n’abaturage bo mu murenge wa Gitovu by’umwihariko mu kagari ka Runoga, cy’abana barazwa irondo bataragira imyaka y’ubukure.

Iki kibazo cyo kuraza abana irondo cyagaragaye mu kagari ka Runoga, kivugwa mu midugudu ya Gitwe, Mubuga na Siganiro, aho abana barazwa irondo nk’igihano cy’uko bataye ishuri, n’abandi barangwaho n’imyitwarire mibi irimo ubujura.

Hagenimana Jean Paul w’imyaka 17, wo mu mudugudu wa Mubuga ni umwe mu barajwe irondo.

Yagize ati “Umuntu aba atarafata indangamuntu bakamupanga ku irondo, ubu maze imyaka ibiri ndirara, baduhora ko tutiga kandi bitaraduturutseho ari ubushobozi buke, ntibita ku myaka n’abafite 13 bararirara ngo ni uko tutiga, imbeho iradukubita tukaba twanarwara, ubundi ugasanga twasinziriye.”

Haginimana yavuze ko icyo bakeneye ari ugufashwa gusubira ku ishuri no gukurwa mu barara irondo.

Ntabanganyimana Adrien na we w’imyaka 17 yagize ati “Iyo ngezeyo ndahunyiza, imbeho yarangagaje naba nasibye ngo nintange ibihumbi bitatu nta n’aho mbikura. Turasaba ubuvugizi nk’abana batudohorere natwe tuzarirare twakuze kuko ntitwanze kwicungira umutekano”

Bamwe mu bararana irondo n’aba bana bavuga ko bidakwiye kuko babona ko ari nko kubangamira uburenganzira bw’umwana

Umwe muri bo yagize ati “Hari ubwo tubona kurarana n’abana bato ku irondo bitubangamiye. Kuba barataye ishuri ntabwo byatuma bahanishwa ibi bihano ahubwo bakaze ingamba zo kuribasubizamo, bitabaye ibyo byaba ari ukubangamira uburenganzira bwabo. Hari n’abigendeye kubera kubarazwa irondo”

Umuyobozi w’Akarere ka Burera Uwambajemariya Florence yavuze icyo kibazo bakimenyeshejwe, gusa akanavuga ko ikosa ridahanishwa irindi ariyo mpamvu iki kibazo bagihagurukiye

Yagize ati “Iki kibazo cy’abana barazwa irondo twarakimenyeshejwe, ndetse n’uyu mudugudu twarawusuye, batubwiye ko impamvu yabyo ari uko bataye ishuri. Twabasobanuriye ko ikosa ridahanishwa irindi, ariyo mpamvu iki kibazo twagihagurukiye, byanatumye dusaba abo bireba kujya bakora urutonde rw’abarara irondo bakongeraho n’imyaka yabo kugira ngo hatazongera kugaragara urara irondo atujuje imyaka, kuko byaba ari imirimo mibi ikoreshwaabana bato.”

Uwambajemariya yavuze ko abana bataye ishuri bagiye kurisubizwamo mu maguru mashya.

Umubare w’abana baazwa irondo bakiri munsi y’imyaka 18, nturamenyekana gusa ubuyobozi bw’Akarere ka Burera bwiyemeje kubikurikirana abataye ishuri bakarisubizwamo n’abakigaragarwaho n’imyitwarire mibi hakarebwa uburyo bagororwa.

Umuyobozi w'Akarere ka Burera Uwambajemariya Florence yahagurukiye ikibazo cy'abana bakirazwa irondo bataragira imyaka 18

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza