Akarere ka Bugesera kamaze kwinjiza miliyoni 11 Frw kaciye abatubahiriza amabwiriza yo kwirinda Coronavirus

Yanditswe na Evariste Nsengimana
Kuya 2 Nyakanga 2020 saa 07:41
Yasuwe :
0 0

Ubuyobozi bw’Akarere ka Bugesera bwatangaje ko bumaze kwinjiza amafaranga arenga miliyoni 11 Frw y’amande yaciwe abantu barenze ku mabwiriza yo kwirinda icyorezo cya COVID-19 barimo abakomeje gucuruza inzoga mu tubari, abacuruzi batateganyije aho abakiliya bakarabira n’abandi.

Muri Werurwe 2020 nibwo mu Rwanda habonetse umurwayi wa mbere wa COVID-19 bituma Leta ifata ingamba zo kuyikumira zirimo gufunga utubari, kubuza abantu guhurira ahantu hamwe, kubasaba kwambara udupfukamunwa, gukaraba intoki n’amazi meza n’isabune n’ibindi.

Gusa hirya no hino mu gihugu hakomeje kugaragara abantu barenga kuri ayo mabwiriza barimo abakomeje gucuruza mu tubari rwihishwa, abakomeje guhurira ahantu mu bikorwa binyuranye, abacuruzi batateganyije aho ababagana bakarabira n’ibindi bishobora kongera umuvukudo w’iki cyorezo kitarabonerwa umuti n’urukingo.

Mu kiganiro Umuyobozi w’Akarere ka Bugesera, Mutabazi Richard, yagiranye n’abanyamakuru bagize Ihuriro ry’abanyamakuru barwanya icyorezo cya Sida (Abasirwa) kuri uyu wa 1 Nyakanga 2020, yavuze ko hirya no hino muri ako Karere hakiboneka abantu batubahiriza amabwiriza yashyizweho mu kwirinda no gukumira Coronavirus.

Yavuze ko kuva Leta yashyiraho amabwiriza arimo kubuza abantu gupima inzoga, kudahuriza abantu benshi ahantu hamwe n’ayandi, abantu bakomeje kwigishwa ariko hari abatabyubahirije ndetse bacibwa amande asaga miliyoni 11 Frw.

Ati “Abarenga ku mabwiriza turabafite benshi. Ntabwo twavuze abatambara udupfukamunwa, ntabwo twavuze abacuruza utubari, murabizi ko tudakora ariko turabagira, n’icyokezo rwose, n’umwotsi tukawubona, abandi bakabyimurira mu ngo zabo ugasanga ngo basuwe ariko ugasanga mu by’ukuri ni utubari.”

Mutabazi yavuze ko abayarenzeho bari mu byiciro bitandukanye ariko biganjemo abacuruzi b’Utubari, abacuruzi batashyizeho aho abantu bakarabira n’abandi.

Ati "Hari abo twagiye duhana, dufite nk’abo twaciye amande arenze miliyoni 11 Frw mu gihe cy’amezi macye ashize. Umwe usanga akora ibitemewe tukamuca ibihumbi 50 Frw, ariko ugasanga ni ukugenda tugoragoza ngo turebe. Hari abo dufungira, utubari cyangwa amaguriro (Alimentation) kubera bacururizamo inzoga, bataha ugasanga za nzoga bazikuyemo bazicururiza mu rugo tukajya kubafata."

Uyu muyobozi avuga ko ikigamijwe atari uguhana abaturage ahubwo ari ukubigisha ariko ko abagaragaza kutubahiriza ibyo babwirwa hakabaho kubafatira ibihabo.

Mu Rwanda hamaze kuboneka abantu 1042 banduye Coronavirus mu bipimo 147 904 byafashwe mu gihe abantu 480 bakize naho 559 bakaba bakiri kwitabwaho mu bitaro naho abanyarwanda imaze kwica ni batatu.

Umuyobozi w'Akarere ka Bugesera, Mutabazi Richard, yavuze ko kamaze kwinjiza miliyoni 11 Frw zaciwe abatubahiriza amabwiiza yo kwirinda ikwirakwira rya COVID-19
Umuyobozi w'Akarere ka Bugesera, Mutabazi Richard, aganira n'abanyamakuru bagize Ihuriro ryo kurwanya Sida

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .