Akamaro kihariye gusoma bifitiye ireme ry’uburezi bw’umwana

Yanditswe na Evariste Nsengimana
Kuya 6 Ugushyingo 2018 saa 02:04
Yasuwe :
0 0

Abakurikiranira hafi iby’uburezi bemeza ko gutoza umwana gusoma bimubera ishingiro ryo kumenya n’andi masomo yigishwa, bityo akazavamo ingirakamaro ku giti cye, umuryango n’igihugu muri rusange.

Umunyamabanga wa Leta muri Minisiteri y’uburezi, ushinzwe amashuri abanza n’ayisumbuye, Dr. Isaac Munyakazi, yibukije abatuye ku kirwa cya Nkombo n’ababyeyi muri rusange aka kamaro ko gusoma.

Ni mu ruzinduko yagiriye ku kirwa cya Nkombo mu Karere ka Rusizi kuri uyu wa Mbere, rugamije kumenyekanisha ‘akamaro k’uburezi bw’ibanze.’

Dr Munyakazi yavuze ko ‘Guverinoma ishaka ko abana bakurana umuco wo gusoma, kandi bihereye ku kirwa cya Nkombo, kiri mu Kiyaga cya Kivu.’

Ati “Ni ikintu dushimira abafatanyabikorwa ko kizatugeza kuri byinshi kuko iyo wateguye umwana neza ukamwigisha gusoma, bimuha urufunguzo rumufasha no kwiga, akiga neza n’andi masomo atandukanye.”

Yababwiye ko ‘Leta yifuje gushyira imbaraga zidasanzwe mu burezi bw’abana bayo kuko nta wundi murage ifite wo kubaha.’ Kandi ari n’uburenganzira bwa buri wese.

Umuyobozi wa Building Learning Foundation, Anders Lönnnqvist, yavuze ko ‘Umwana wize amasomo y’ikinyarwanda, Icyongereza n’imibare neza bimufasha kuva mu cyiciro cya mbere cy’amashuri abanza afite ubumenyi bw’ibanze.’

Umuyobozi ushinzwe ibikorwa bya USAID mu Rwanda, Leslie Marbury, yavuze ko ‘Inkunga batanga mu kuzamura umuco wo gusoma, bizeye ko izafasha abana kubaka ejo heza h’igihugu.’

Muhize André, ufite umwana wiga mu mwaka wa mbere, yabwiye IGIHE ko ‘ababyeyi dukwiye kumeya akamaro ko gusoma, tukabigiramo uruhare dufasha n’abana bacu.’

Dr. Munyakazi kandi yanasoje Ukwezi kwahariwe gusoma no kwandika kwatangijwe ku wa 7 Ukwakira, gufite intego yo kubikangurira abanan’abakuru.’

Yanatangije irushanwa ‘Andika Rwanda 2019, rihamagarira abanyarwanda kwandika inkuru n’imivugo bizasomwa n’abana b’abanyarwanda, kugira ngo batozwe gukunda gusoma bakiri bato.’

Gahunda yo gusoma Guverinoma iyishyira mu bikorwa ifatanyije n’abafatanyabikorwa, barimo ‘Usaid Soma Umenye’ gahunda ikorera mu mwaka wa mbere kugera mu wa gatatu w’amashuri abanza yose ya Leta. Ifite intego yo kuzamura ubushobozi bwo gusoma bw’abana nibura miliyoni imwe.

Building Learning Foundations, gahunda igamije kuzamura ireme ry’uburezi mu masomo y’Icyongereza n’Imibare muri icyo cyiciro, ‘Mureke Dusome’ umushinga ukorera mu muryango, wimakaza umuco wo gusoma bigizwemo uruhare n’abagize umuryango.

Hari kandi VVOB, umushinga w’Ababiligi ugamije kongera ubwiza n’ubushobozi uburezi, binyuze mu mahugurwa uha abarezi n’abandi bafite uburezi mu nshingano.

Ababyeyi bibukijwe akamaro kihariye gusoma bifitiye ireme ry’uburezi bw’umwana
Abana bo ku Nkombo bari kwigishwa gusoma
Dr Munyakazi hamwe n'abandi bayobozi bari mu cyumba cy'ishuri bagenzura uko abana bo mu cyiciro cya mbere cy'amashuri abanza bigishwa mu buryo bugezweho
Abayobozi batandukanye bari basuye umurenge wa Nkombo
Umunyamabanga wa Leta muri Minisiteri y’uburezi, ushinzwe amashuri abanza n’ayisumbuye, Dr. Isaac Munyakazi, yibukije abatuye ku kirwa cya Nkombo n’ababyeyi muri rusange ko gusoma ari ryo shingiro ryo gutsinda andi masomo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza