00:00:00 IGIHE NETWORK KN KINYARWANDA EN ENGLISH FR FRANCAIS

Agahinda k’abagore batagihazwa n’abagabo babo bashegeshwe n’’ibikwangari’

Yanditswe na Prudence Kwizera
Kuya 18 July 2022 saa 09:22
Yasuwe :

Inzoga z’inkorano zitemewe zakomeje kwamaganwa kenshi kuko zangiza ubuzima bw’abazinywa ariko usanga hirya no hino hari abakomeza kuzenga no kuzicuruza rwihishwa.

Ni inzoga zengwa hakoreshejwe ibitoki bike bikavangwamo isukari, umusamburo, kanyanga, ifu y’amatafari, itabi, umubirizi, umuravumba n’ibindi.

Zizwi ku mazina ya muriture, igikwangari, nyirantare, dundubwonko, yewemuntu, umunamurajipo, igiswika n’ayandi bitewe n’agace runaka zibonekamo.

Usibye abagaragara zabaryamishije mu mihanda no mu tuyira hari n’abo zivutsa ubuzima cyangwa zikabatera uburwayi bwo mu nda no mu mutwe.

Inzego zitandukanye zirimo iz’ibanze, iz’umutekano n’iz’ubutabera zahurije hamwe imbaraga mu kurwanya izo nzoga zifatwa nk’ibiyobyabwenge, hamwe na hamwe zigacika ariko hari aho zikiri.

Abagabo ntibakibasha gutera akabariro neza

Bamwe mu bagore bo mu Karere ka Huye bavuga ko abagabo batakibasha kwitwara neza mu buriri iyo bageze mu gikorwa cyo gutera akabariro kuko inzoga zitemewe zabacite intege.

Umugore wo mu Kagari ka Rukira mu Murenge wa Huye mu buhamya bwe, yavuze ko umugabo we yatangiye kuzinywa babyaranye kabiri.

Ati “Kuva yatangira kubinywa nta nshingano zo mu rugo yongeye kwitaho, haba guhahira abana, kubabonera ibikoresho by’ishuri, haba n’izindi gahunda zose urabyumva n’izo mu buriri nta gahunda uretse kuza yiryamira nk’intumbi.”

Yakomeje avuga ko umugabo we izo nzoga zamuhinduye akajya ataha avuga nabi ndetse amutererana mu kubaka urugo bituma abana babyaranye bacikiriza amashuri kuko buri wese yajyaga kwirwanaho ashakisha icyo akora kimubeshaho.

Ati “Umwana yarazaga saa sita yabura ibiryo nagiye guca inshuro, ntasubire ku ishuri; bigera igihe kwiga barabireka.”

Uyu mugore yavuze ko mbere we n’umugabo we bageraga mu buriri bagatera akabariro bishimye ariko nyuma yo kunywa izo nzoga umugabo atabikora neza kuko ahita acika intege.

Ati “Muri uko gutera akabariro, njyewe yarangizaga nkibishaka bitewe n’uko yangiyeho tutabyumvikanye. Nasigaranaga ikibazo cy’uburibwe. Urumva nari ntangiye ubuzima bwiza ariko birangiye we amvuyeho agiye. Mbese ku buryo wanamuhendahenda ngo ‘mbabarira wongere’ akakubwita ati ‘nta mbaraga mfite’ agahita abyuka yigendera.”

Ashimangira ko ibiyobyabwenge n’inzoga z’inkorano biri gusenya ingo cyangwa bigatuma abagore baca inyuma abagabo babo kuko batabasha kubamara ipfa mu buriri.

Undi mugore wo mu Karere ka Huye na we yavuze ko umugabo we yacitse intege mu gutera akabariro abanza kugira ngo ni uko aba avuye mu bandi bagore ariko nyuma asanga byaratewe no kunywa inzoga z’inkorano zitemewe n’amategeko.

Ati “Nyine hari igihe abikora [gutera akabariro] agatangira afite imbaraga noneho nawe mugore ukumva ubushake buraje ariko umugabo agahita acika intege, noneho ahubwo ugasigarana uburibwe wamubwira ngo mukomeze akanga kuko aba yacitse intege. Wumva wamuca inyuma ariko njyewe sinigeze mbikora nahisemo kwihangana.”

Inzego zarahagarutse

Umuyobozi w’Akarere ka Huye Wungirije Ushijwe Imibereho Myiza y’Abaturage, Kankesha Annonciata, yavutse ko bakomeje kongera imbaraga mu kurwanya ibiyobyabwenge n’inzoga zitemewe n’amategeko.

Ati “Ikiyobyabwenge kituzahaje cyane ni ibi biyoga by’ibikorano. Ariko iyo ntambara [yo kubirwanya] turimo turayirwanira mu masibo no mu midugudu. Ingamba tubifatira ahanini ni ukwigisha abaturage ni ukubereka ububi bwabyo hanyuma na wa wundi wari warazahajwe nabyo akaza gutanga ubuhamya mu nteko z’abaturage cyangwa mu isibo atuyemo.”

Yavuze ko abenga izo nzoga bazwi kuko hakozwe urutonde rwabo ku buryo uwongeye kubifatirwamo ahanwa. Ababyenga bafite amayeri menshi kandi barahishirana ku buryo byageze n’aho abaturage batora mutwarasibo ubakingira ikibaba kugira ngo batazajya bafatwa.

Yagaragaje ko biri guteza ingaruka mbi zirimo amakimbirane yo mu ngo, kwicana, gusambanya abana n’izindi. Kuri ubu hari abarenga 180 bafashwe kubera kwenga izo nzoga zitemewe.

Ati “Kugeza ubu ngubu hari hafi abagera ku 180 bari mu kigo ngororamuco bazamaramo amezi atatu bazacibwa n’amande kubera kwenga ibyo biyoga by’ibikorano.”

Kankesha yavuze ko ari ikibazo gikomeye kuba hari abagabo batakibasha kunezeza abagore babo mu buriri kubera ko bazahajwe n’inzoga z’inkorano zitemewe abasaba kwisubiraho bakazireka.

Ati “Iyo ayo makuru yamenyekanye tugira imigoroba y’imiryango tukagira n’umwihariko kuri uwo muryango. Ni inshingano zacu nk’abayobozi kugera muri urwo rugo tukabigisha ububi bw’ibiyobyabwenge kuko biriya biyoga bikoze mu bintu byinshi no kwicara arica agasinzirira aho ari. Urumva umuntu usinzirira aho ari n’izindi nshingano ntiyazuzuza.”

Abenga izo nzoga bakunze kubikomeza kuko zibungura amafaranga menshi bitewe n’ibyo bazikoramo bitabahenze naho abazinywa bazikundira ko zidahenda.

Inama Njyanama y’Akarere ka Huye yemeje ko ufashwe yenga inzoga z’inkorano zitemewe acibwa amande y’ibihumbi 500 by’amafaranga y’u Rwanda.

Inzoga z'inkorano zikomeje kwangiza ubuzima bwa benshi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .