Abikorera biteguye kubyaza umusaruro imurikagurisha Nyafurika rizabera mu Rwanda

Yanditswe na Iradukunda Serge
Kuya 12 Gashyantare 2020 saa 01:07
Yasuwe :
0 0

Urugaga rw’abikorera rwatangaje ko rwiteguye kubyaza umusaruro imurikagurika nyafurika rizwi nka Intra-African Trade Fair (IATF) rizabera mu Rwanda kuva ku wa 1 Nzeri kugeza ku wa 7 Nzeri 2020.

IATF ni imurikagurisha riba buri myaka ibiri rigamije guhuriza hamwe sosiyete, inganda, ibihugu n’abandi bacuruzi nyafurika hagamijwe kongera ubuhahirane hagati y’abatuye umugabane wa Afurika.

Ibi abikorera bo mu Rwanda babitangaje ubwo bahuraga n’ubuyobozi bwa Banki Nyafurika iteza imbere ubucuruzi (African Export-Import Bank, Afreximbank) ari nayo itegura iri murikagurisha.

Mu biganiro abikorera bo mu Rwanda bagiranye n’iyi banki kuri uyu wa 11 Gashyantare yaberetse amahirwe ari mu kwitabira iri murikagurisha Nyafurika, maze abikorera bo mu Rwanda na bo biyemeza kuzayabyaza umusaruro.

Umuyobozi wa gahunda ya IATF muri AfreximBank, Kanayo Awani, yatangiye yereka abikorera bo mu Rwanda amahirwe yavuye mu imurikagurisha ry’ubushize ryabereye i Cairo mu 2018.

Ati “Ntabwo bitangaje kuvuga ko dufite kompanyi ebyiri zo mu Misiri zasinye amasezerano yo kubaka urugomero muri Tanzania, ubu nibwo bwumvikane bwa mbere, bwakozwe n’Abanyafurika, bushyirwamo amafaranga n’Abanyafurika”.

Kanayo yongeyeho ko ibigo byabashize kwagura amasoko yabyo, aho ibigo binini n’ibito byafashijwe kubona amasoko mashya mu bindi bihugu bya Afurika, ubu bikaba byaraguye ubucuruzi bwabyo.

Ati “Hari nk’umugore wakoraga amavuta y’umusatsi byamuhaye amasoko akomeye ubu ubucuruzi bwe bwaragutse”.

Kanayo yabwiye abikorera ko imurikagurisha riheruka ryasize hasinywe amasezerano y’ubucuruzi afite agaciro ka Miliyari zisaga 30 z’Amadorali.

Iri murikagurisha rihuza ibigo bikora ubucuruzi mu nzego zitandukanye zirimo ubuhinzi no gutunganya umusaruro ubukomokaho, ubucuruzi bw’ibinyabiziga, inganda zikora imyenda, ubwubatsi n’ibikorwa remezo, imyidagaduro n’ubuhanzi, uburezi, ingufu, imari, ubuzima n’imiti, ikoranabuhanga no guhanga udushya, ubucukuzi bw’amabuye n’imishinga mito y’urubyiruko.

Visi Perezida w’Urugaga rw’Abikorera mu Rwanda, PSF, Gishoma Eric yavuze ko nk’abikorera iri ari imurikagurisha biteze gukuramo umusaruro.

Ati “Umusaruro uzaba uhari kuko ni imurikagurisha riduhuza n’abandi bacuruzi, iyo duhuye hagati y’abacuruzi buri gihe twungurana inama ku bumenyi bafite cyangwa n’ibyo twabigiraho n’ibyo nabo batwigiraho”.

Gishoma yavuze ko biteguye kwereka bagenzi babo b’Abanyafurika umwihariko w’ibikorerwa mu Rwanda.

Ati “Twebwe dufite Made in Rwanda, tumaze kugira ibintu byinshi bikorerwa mu Rwanda dushobora kuzerekana muri icyo gihe”.

Iri murikagurisha rigiye kuba ku nshuro ya kabiri, aho irya mbere ryabereye mu Misiri mu 2018, u Rwanda rukaba rugiye kwakira irya 2020.

Kabera Eric usanzwe umenyerewe mu gukora no gutunganya amafilimi, asanga iri murikagurisha rizaba uburyo bwiza bwo kuganira ku buryo Abanyafurika babasha kwivugira amateka yabo bakabasha no kwereka abanyamahanga amahirwe ari kuri uyu mugabane.

Ati “Ibintu iri murikagurikasha rikora ni ukwerekana ko muri Afurika hari ikigenda kandi ubushobozi n’amahirwe birahari none rero aho kugira ngo abandi bantu bajye batuvugira inkuru cyangwa ngo batubwire amahirwe dufite natwe tuyabona, ni byiza nk’umuntu w’umuhanzi kuza ahangaha kuko mbibonamo amahirwe”.

Mu 2018 mu Ukuboza ubwo u Rwanda rwatoranywaga nk’igihugu kizakira iri murikagurisha Nyafurika ku nshuro ya kabiri, uwahoze ari Perezida wa Nigeria akaba n’umuyobozi w’Inama ngishwanama ya IATF, Olusegun Obasanjo, yavuze ko iri murikagurisha ari intambwe ikomeye mu gushyira mu bikorwa amasezerano ashyiraho isoko rusange rya Afurika.

Ati “Tugomba gufatanya kugira ngo tugere ku iterambere n’umutekano. Nta shema riba mu bukene, ishema, icyubahiro n’imbaraga biva mu iterambere.”

Ibi Obasanjo yavuze byongeye gushimangirwa n’ubuyobozi bwa Afreximbank bweretse abikorera bo mu Rwanda ko bakwiye kuzamura ubucuruzi bukozwe hagati y’Abanyafurika kuko bukiri hasi ugereranyije n’ubwo Afurika ikorana n’indi migabane.

Mu 2018, ubucuruzi hagati y’Abanyafurika bwari buri kuri 15%, mu gihe ubwa Afurika n’u Burayi bwari ku gipimo cya 59%, Afurika na Aziya bwo bukaba kuri 51%, mu gihe Afurika na Amerika ya Ruguru byari kuri 37 %.

Abikorera bo mu Rwanda basabwe guha agaciro ubucuruzi bukozwe hagati y'abanyafurika
Ibi biganiro byitabiriwe n'abikorera mu nzego zitandukanye
Umuyobozi wa gahunda ya IATF muri AfreximBank, Kanayo Awani, yeretse abikorera bo mu Rwanda amahirwe yavuye mu imurikagurisha ry’ubushize anabasaba kubyaza amahirwe irigiye kuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .