Abatuye Gatare barashima ubuhinzi bw’icyayi bwabakuye ku kwitwa abo muri "Zedi"

Yanditswe na Sitio Ndoli
Kuya 26 Ukwakira 2020 saa 08:14
Yasuwe :
0 0

Abatuye mu yahoze ari Komini Gatare muri Perefegitura ya Cyangugu, bavuga ko mbere ya Jenoside yakorewe Abatutsi mu 1994 muri ako gace bahitaga muri ’Zedi’ (Z) kuko nta bikorwa remezo byaharangwaga ahubwo hari ibihuru bikikijwe n’amashyamba! Ubu amateka yarahindutse kuko ubuhinzi bw’icyayi bwahinduye imibereho y’abatuye aka gace.

Gatare ahanini igizwe n’igice cy’imisozi yegereye ishyamba rya Nyungwe gihuriweho n’Imirenge ya Karambi na Macuba mu Karere ka Nyamasheke. Abahakuriye bavuga ko iyo bajyaga ahandi bababwiraga ko bavuye muri Zedi (Z) ngo bishatse kuvuga ko ngo bari inyuma mu iterambere.

Umwe mu batuye mu Gatare, Mukantagungira Jeannette, avuga ko mu bijyanye n’ibikorwa remezo aka gace kari inyuma cyane.

Ati “Imihanda y’ino yari mibi cyane ku buryo bukomeye, imodoka yahagendaga yari bisi yonyine, akarere kabarirwaga mu cyo bitaga zone Z, ahantu hari inyuma mu iterambere, impamvu bahitaga muri zedi nuko nta bahagendaga.”

Uwineza Francine we avuga ko mbere ya Jenoside yakorewe Abatutsi “hari ahantu hari ibihuru, nta muriro w’amashanyarazi uhari, nta n’amazi meza” aharangwa.

Abenshi bemeza ko izina ’Z’ ryakundaga gukoreshwa mu bigo by’amashuri aho abanyeshuri babivugaga bashaka guserereza abakomoka muri Komini Gatare, bakavuga ko byabateraga ipfunwe.

Nyirampakaniye Jacqueline ati “Mu by’ukuri twari aba nyuma kuko nta shuri ryisumbuye ryari rihari, niyo mpamvu bavuga ngo turi muri Zedi, ni abanyeshuri bakundaga kubitwita ariko byaje gusakara hose, twabaga dufite ipfunwe ryinshi ku buryo hari n’abangaga kuvuga ko baturutse mu Gatare.’’

Nyuma y’imyaka 26 Jenoside yakorewe Abatutsi irangiye, abatuye Gatare bateye imbere biyambura isura ya Z ndetse bemeza ko bari muri A.

Aba baturage bavuga ko byagizwemo uruhare n’ubuyobozi bwiza kuko mu 2010 batangiye ubuhinzi bw’icyayi bwabagejeje ku kigo cy’imari, ikigo nderabuzima n’uruganda rutunganya icyayi (Gatare Tea Factory).

Nsekukize Innocent yagize ati “Ubu twabonye imihanda, amashanyarazi, amazi yatugezeho ndetse n’ivuriro n’ikigo cy’imari bituri hafi, urumva ko tutakiri muri Z ahubwo turi muri A.”

Sindayigaya Zephaniah we avuga ko icyayi cyamubereye isoko y’iterambere. Ati “Icyayi nakibonyemo byinshi ntagujije, niyubakiyemo inzu, abana banjye babona ibyo barya, nishyura ubwisungane mu kwivuza bw’umuryango wanjye wose kandi turanorora. Buri kwezi nshobora kubona amafaranga ari hagati y’ibihumbi 60 na 80 Frw.”

Bamwe muri aba baturage bibumbiye muri Koperative y’Abahinzi b’Icyayi, COTHEGA (Coperative du Thé de Gatare), ifite abanyamuryango 3124. Buri kwezi yeza toni 600 z’icyayi ku buso bwa hegitari 1412.

Mu buhamya bwabo bavuga ko ubuhinzi bw’icyayi bwabakuye mu bukene bukabijie barimo, kuri ubu barasaba ubufasha kugira ngo bongere ubushobozi bafite babashe kugura umugabane mu ruganda rutunganya.

Perezida wa Koperative COTHEGA, Mukantagungira Jeannette, avuga ko abanyamuryango bifuza ko babona ubundi buso bakongera ingano y’icyayi beza.

Ati “Haramutse habonetse ubundi buso byadufasha tukongera ubuso ariko nibwo dufite twarabwishimiye.”

Iki cyifuzo bafite cyatangiye gushyirwa mu bikorwa n’Akarere ka Nyamasheke aho kiyemeje ko kagiye kongera ubuso buhinzeho icyayi ku mukandara w’ishyamba rya Nyungwe na Gatare ibarizwamo.

Icyayi cyafashije abatuye Gatare kuva mu bukene bwatumaga bitwa abo muri Z
Uruganda rw'icyayi bubakiwe narwo rwatumye aka gace kagira iterambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .