00:00:00 IGIHE NETWORK KN KINYARWANDA EN ENGLISH FR FRANCAIS

Abatangabuhamya bajijinganyije ku ruhare rwa Rutunga Venant muri Jenoside yakorewe Abatutsi

Yanditswe na Ntabareshya Jean de Dieu
Kuya 11 Mutarama 2023 saa 09:14
Yasuwe :

Urugereko rwihariye rushinzwe kuburanisha Ibyaha Mpuzamahanga n’Ibyambukiranya Imipaka ruri i Nyanza mu Majyepfo y’u Rwanda rumaze iminsi ibiri rwumva abatangabuhamya bavuga uruhare Venant Rutunga yagize muri Jenoside yakorewe Abatutsi.

Guhera tariki ya 10 Mutarama no ku wa 11 Mutarama 2023 urukiko rwumvise abatangabuhamya mu rubanza ruregwamo Dr. Rutunga Venant wahoze ari umuyobozi mu Kigo cya ISAR Rubona.

Aba batangabuhamya bafungiye muri Gereza ya Huye, ubwo bari imbere y’urukiko bagaragaje ko batazi Venant Rutunga mu bikorwa bya Jenoside yakorewe Abatutsi gusa bemeza ko bamuzi muri icyo kigo cya ISAR Rubona yayoboraga.

Habimana yavuze ko yari azi Dr. Venant Rutunga nk’uwahoze ayobora Ikigo cy’Ubushakahastsi mu by’Ubuhinzi n’Ubworozi, ISAR Rubona kuko mbere ya Jenoside yari umudozi w’imyenda muri icyo kigo.

Yabwiye urukiko ko ubwe atakurikiranye niba Rutunga yaragize uruhare muri Jenoside kuko yamubonaga yicaye mu biro.

Uyu mugabo wakatiwe gufungwa imyaka 15 muri gereza ku cyaha cya Jenoside yemeza ko nta gikorwa cya Jenoside yiboneye kibera mu Kigo ISAR Rubona kubera intege nke zatumaga ahora iwe mu rugo.

Nzeyimana Jean de Dieu wakatiwe gufungwa imyaka 19 yabwiye urukiko ko ntaho azi uyu mugabo.

Yavuze ko inzego z’ibanze mu gace k’iwabo muri Mugogwe zabasabye kugota imbibi za ISAR kugira ngo Abatutsi bari bahahungiye batabona uko batoroka.

Yavuze ko abo Batutsi barashwe n’abasirikare abandi bakicwa n’abaturage babisabwe n’ubuyobozi bwariho bityo ko atazi uruhare Rutunga Venant muri Jenoside yakorewe Abatutsi.

Mwitende Vianney we uri gukora igihano cye cy’imyaka 30 muri gereza ku cyaha cya Jenoside, yahakaniye urukiko ko atazi uregwa uretse kumwumva ku izina. Gusa yemeza ko yagiye mu gitero cyishe Abatutsi bari mu Kigo ISAR Rubona.

Undi wumviswe ni Nkunda Jacques wemereye urukiko ko yari umukozi wa ISAR- Rubona ashinzwe ubushakashatsi bwitaga ku gihingwa cy’ibishyimbo.

Yabwiye urukiko ko yamenye amakuru ko hari abakozi bakoranaga b’Abatutsi biciwe muri ISAR Rubona ariko ko nta ruhare rwa Rutunga azi muri Jenoside yakorewe Abatutsi kuko icyo gihe yari iwe mu rugo atakiri mu kigo.

Yavuze ko hari inama yayobowe na Rutunga igaruka ku bibazo by’umutekano muke. Gusa avuga ko mu rubanza rwe yumvise ko abajandarume bo kurindira umutekano ISAR batumijwe na Rutunga.

Nkunda avuga ko mu myaka 10 yamaze akorera muri ISAR Rubona ntaho yigeze abona Rutunga agira uwo abanira nabi.

Bitewe no kuba yarakatiwe gufungwa burundu, Nkunda yafashwe nk’umutangamakuru aho kuba umutangabuhamya.

Undi mutangabuhamya ni Mweretsende Damascène wakatiwe igifungo cy’imyaka 30, yavuze ko hari Abatutsi biciwe muri ISAR-Rubona kandi ko iyo hataba abasirikare, abapolisi batashoboraga kubica ngo babarangize.

Uyu mugabo wemeza ko yari umuhinzi, yavuze ko yaboneye Rutunga mu rukiko. Yabwiye umucamanza ko nta ruhare rw’uregwa azi muri Jenoside yakorewe Abatutsi mu 1994.

Byukusenge Alphonse na we yahamije ko ari bwa mbere abonye Venant Rutunga avuga ko yajyaga yumva ko ari we uyobora ISAR- Rubona ariko atamuzi.

Nubwo bimeze bityo ariko Ubushinjacyaha burega Rutunga ko ari we wajyanye abajandarume n’abasirikare mu mugambi wo gutsemba impunzi z’Abatutsi zari zahungiye muri ISAR Rubona nubwo we abihakana akavuga ko yabajyanye ngo bacungire umutekano icyo kigo n’abari bagihungiyemo.

Mu kwisobanura kwe Rutunga ashimangira ko kuba abajandarume barakoze ibinyuranye n’ibyo yari yabahamagariye atagombye kubiryozwa.

Akurikiranyweho ibyaha birimo ubufatanyacyaha mu cyaha cya Jenoside no kurimbura nk’icyaha cyibasiye inyokomuntu. Yagejejwe mu Rwanda mu 2021 yoherejwe n’u Buholondi.

Abatangabuhamya bavuze ko batazi uruhare rwa Rutunga muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .