Babuze uko bava i Nyabugogo nyuma yo kugongwa n’ingamba nshya zo kurwanya COVID-19 (Amafoto)

Yanditswe na Nkurunziza Ferdinand
Kuya 27 Kanama 2020 saa 03:34
Yasuwe :
0 0

Ku mugoroba wo kuri uyu wa Gatatu, tariki ya 26 Kanama 2020, Inama y’Abaminisitiri yateranye iyobowe na Perezida Kagame, yavuguruye ingamba zo guhangana n’ikwirakwira ry’icyorezo cya COVID-19, nyuma yo kwiyongera kw’imibare y’abandura mu buryo buteje inkeke mu minsi itambutse.

Zimwe mu ngamba zavuguruwe harimo ko amasaha yo kugera mu rugo kuri buri muturage wese ari saa moya z’umugoroba, bivanywe saa tatu ndetse n’imodoka zitwara abagenzi mu buryo bwa rusange hagati y’Umujyi wa Kigali n’intara zirahagarikwa.

Bamwe mu bari bateguye ingendo ziberekeza mu ntara, ariko ntibamenye ibyanzuwe n’Inama y’Abaminisitiri hakiri kare kuko byatangajwe ahagana 04:53’, batunguwe no gusanga imodoka rusange zerekeza mu ntara zahagaritswe, ndetse babwirwa ko nta buryo na bumwe bushoboka bwabafasha gukomeza urugendo bari bateguye.

Bamwe bafashe umwanzuro wo gukomeza guhatiriza baguma muri Gare ya Nyabugogo, ahasanzwe hategerwa imodoka zerekeza mu ntara, ngo barebe niba hari uburyo bushoboka bwabafasha kugenda, cyane ko hari ababwirwaga ko nibabasha kugera mu bice biri mu nkengero z’umujyi, bari buhasange imodoka zibajyana mu ntara.

Nganyirende Pascal, ukomoka mu Karere ka Nyamasheke ni umwe mu bari babukereye basubiye mu cyaro, ariko aza kuzitirwa no gusanga imodoka zitwara abagenzi mu buryo bwa rusange zose zahagaritswe.

Ati “Twageze hano saa mbili, tugeze muri Gare dusanga nta modoka zirimo, turavuga ngo reka dutegereze turebe uko bigenda. Ariko abayobozi bari kutubwira ngo nitujye gutegera ku Ruyenzi, turabona imodoka zitugeza aho turi kwerekeza mu ntara.”

Mu gitondo cyo kuri uyu wa Kane, moto zari bimwe mu binyabiziga byifashishijwe n’abatari bake berekeza mu nkengero za Kigali, aho bari bafite ibyiringiro byo kubona imodoka zibajyana mu ntara.

Mu bagaragaye muri Gare ya Nyabugogo, benshi ntibari bafite igitekerezo cyo gusubira aho baturutse ngo bategereze igihe aya mabwiriza mashya yo guhagarika ingendo zihuza Umujyi wa Kigali n’intara zose azongera guhindurirwa.

Gufatwa kw’ingamba nshya zirimo guhagarika ingendo zerekeza mu ntara no kugabanya amasaha ntarengwa yo kugera mu rugo byongereye impungenge ku batari bake, bavuga ko na Guma mu Rugo ishobora kugaruka bitewe n’uko imibare y’abandura n’abahitanwa na COVID-19 mu Rwanda ikomeje kwiyongera.

Muri Kigali niho hakomeje kugaragara umubare munini w’abantu banduye by’umwihariko abakorera mu masoko atandukanye, cyane iryo mu Mujyi rwagati rizwi nka Kigali City Market n’iry’i Nyabugogo ahazwi nko kwa Mutangana byanatumye yombi afungwa.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda ku wa 14 Werurwe 2020, hamaze kuboneka 3625 banduye mu bipimo 383 481, abagera ku 1810 barayikize mu gihe 1800 bakitabwaho n’abaganga naho 15 bitabye Imana.

Inkuru wasoma: imyanzuro y’Inama y’Abaminisitiri ku buryo burambuye hano

Abazindutse bashaka kujya mu ntara basanze imiryango ikoreramo ibigo bitwara abagenzi hanze ya Kigali ifunze
Bamwe bakomeje guhatiriza bibwira ko bari bufashwe kubona imodoka zibajyana mu ntara
Hari n'abari bafite imizigo, bari biteguye gusubira mu ntara zitandukanye
Mu masaha ya nyuma ya saa yine, abantu bari bagabanutse cyane muri Gare ya Nyabugogo
Nganyirende Pascal, ukomoka mu Karere ka Nyamasheke ni umwe mu bari babukereye basubiye mu cyaro
Mu gitondo cyo kuri uyu wa Kane, moto zari bimwe mu binyabiziga byifashishijwe n’abatari bake berekeza mu nkengero za Kigali, aho bari bafite ibyiringiro byo kubona imodoka zibajyana mu ntara.
Benshi bitabaje moto kugira ngo zibageze mu nkengero z'Umujyi
Hari abahise bafata icyemezo cyo gusubira aho bari baturutse nyuma yo kubura imodoka ziberekeza mu Ntara

Amafoto:Moïse Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .