Abasirikare baregwa gukoresha abakobwa imibonano mpuzabitsina ku gahato baburanye: Uko iburanisha ryagenze

Yanditswe na Philbert Girinema
Kuya 11 Gicurasi 2020 saa 09:04
Yasuwe :
0 0

Urukiko rwa Gisirikare i Kanombe rwatangiye kuburanisha abasirikare batanu b’u Rwanda n’umusivili umwe baregwa ibyaha birimo kurema umutwe w’abagizi ba nabi no gukoresha imibonano mpuzabitsina ku gahato, bashinjwa ko bakoreye mu Mudugudu wa Kangondo ya II mu Murenge wa Remera mu Karere ka Gasabo.

Abaregwa bose bitabye urukiko mu mpuzankano ya gisirikare usibye umusivili umwe wari wambaye imyenda iranga imfungwa za gisirikare. Bari bunganiwe usibye umusivili wavuze ko aza kwiburanira

Abaregwa ni Pte Ndayishimiye Patrick, Pte Nishimwe Fidèle, Pte Gatete François, Pte Gahirwa John, Pte Twagirimana Theonetse n’umusivile witwa Ntakazirabo Donat.

Bamwe bakekwaho ibyaha birimo icyo gushyiraho umutwe w’abagizi ba nabi no kuwujyamo, gukoresha undi imibonano mpuzabitsina ku gahato, gukubita no gukomeretsa ku bushake, kwinjira aho umuntu atuye mu buryo butemewe n’amategeko, kwiba no guta izamu no kudakurikiza amabwiriza y’izamu.

Aba basirikare bashinjwa guhohotera abatuye mu Mudugudu wa Kangondo II ahazwi nko muri Bannyahe. Mu minsi ishize abo baturage bumvikanye bavuga ko hari abasirikare bari mu bikorwa byo gucunga umutekano babahohoteye, harimo abavuga ko bakubiswe n’abakoreshejwe imibonano mpuzabitsina ku gahato.

Abaturage bavuze ko abagize uruhare muri ibyo bikorwa biyoberanyaga, bagakura ku myambaro yabo ibirango bigaragaza amazina yabo, ariko bakagumana impuzankano y’Ingabo z’u Rwanda, RDF.

Tariki ya 2 Gicurasi nibwo aba basirikare batawe muri yombi, ndetse batangira gukorwaho iperereza.

UKO IBURANISHA RYAGENZE UMUNOTA KU WUNDI

13:00:Urukiko ruvuze ko ku wa Gatatu tariki 13 Gicurasi saa munani aribwo hazasomwa umwanzuro ku ifungwa n’ifungurwa

12:55: Umwunganizi w’abaregwa yavuze ko nubwo impamvu zikomeye zaba zihari zituma bakekwa, nta hame ko bakurikiranwa bafunzwe. By’umwihariko, Pte Twagirimana we yasabiwe kurekurwa kuko ngo nta hantu na hamwe hagaragaza uruhare rwe.

12:55: Pte Ndayishimiye yavuze ko yumva yafungurwa by’agateganyo kuko ngo igihe cyose yasabwa kuboneka yazaboneka. Pte Nishimwe we yavuze ko yarekurwa ry’agateganyo kuko ngo aheruka iwabo mu 2019 ubwo yajyaga mu myitozo, asaba ko yarekurwa akabonana n’umuryango we kuko utazi ko anafunzwe.

Pte Gatete nawe yasabye ko yakurikiranwa ari hanze akabonana n’umuryango we kuko amaze igihe kinini batabonana. Pte Gahirwa we yasabye ko yarekurwa akabonana n’umuryango kuko aho abarizwa hazwi ku buryo igihe cyose yaboneka.

Yasabye kandi urukiko ko “ibyacu mwabikurikirana neza mu by’ukuri tukarenganurwa”.

Pte Twagirimana we yavuze ko nawe yari amaze igihe atagera iwabo ku buryo arekuwe waba ari umwanya mwiza wo kubonana n’umuryango ndetse ko kuko aho aba hazwi, igihe yajya akenererwa yazaboneka.

Ntakaziraho we yavuze ko yarekurwa agasubira mu kazi kuko anafite n’umugore utwite ku buryo waba umwanya mwiza wo kujya kumufasha.

12:50: Ubushinjacyaha bwasabye urukiko ko nyuma y’impamvu zikomeye zagaragajwe, rwazafata umwanzuro wo kubafunga mu gihe cy’iminsi 30 kugira ngo hategurwe urubanza, by’umwihariko kuri Pte Ndayishimiye we ukaba waba umwanya mwiza wo kugira ngo yitekerezeho adakomeza gukora ibyaha bya hato na hato dore ko ngo mu 2018 nabwo yari yahamwe n’icyaha cyo guhishira ibintu byibwe.

12:45: Pte Ndayishimiye Patrick yabajijwe ibyo yavuze mu nyandiko mvugo zo mu bugenzacyaha no mu Bushinjacyaha aho yemeraga ibyo ashinjwa, yavuze ko atigeze ahabwa umwanya wo gusoma ibyo yanditse ahubwo ko kuva ku munsi wa mbere yahakanaga ibyaha.

Pte Ndayishimiye mu nyandiko mvugo yavugaga ko bari bumvikanye, ko impamvu uwo basambanye yamureze ari uko ngo atamuhahiye mu isoko rya gisirikare. We yabwiye urukiko ko “nta nyandiko n’imwe nigeze nemera ko narongoye umugore ndi mu kazi”.

Ngo bitewe n’uko “twari tumerewe i Kami”, iyo nyandiko bayikoreshejwe ku gahato ndetse ko bakubitiwe imbere y’abandi, bayandika kugira ngo birengere.

12:35: Urukiko rwabajijwe niba usibye ibyavuzwe n’abavuga ko basambanyijwe ku gahato hari ibindi bimenyetso ubushinjacyaha bufite, bwavuze ko urukiko rukwiye gusoma neza inyandiko mvugo za Pte Ndayishimiye avuga uko yasambanyije umukobwa umwe, naho Pte Nishimwe agasambanya babiri, ari ibimenyetso bihagije mu gihe hari kuburanwa ibijyanye n’ifungwa n’ifungurwa ry’agateganyo.

12:25:Ubushinjacyaha bwavuze ko nko ku cyaha cyo gukoresha undi ku gahato imibonano mpuzabitsina, uretse n’imvugo z’abakorewe icyaha, mu bakekwa harimo n’ababyiyemereye. Yatanze urugero ku nyandiko mvugo za Pte Ndayishimiye Patrick wemeye ibyaha byose mu bugenzacyaha, avuga uruhare rwe n’urwa bagenzi be.

12:15: Uwunganira abaregwa yavuze ko nta na hamwe hagaragazwa uruhare rwa Pte Twagirimana, ku buryo nta mpamvu zihari zigaragaza ko yakurikiranwa afunzwe. Yavuze imyanzuro y’ubwunganizi yakozwe mu nyandiko ari nayo iri buze gushyikirizwa urukiko, ko ibisobanuro yatangaga ari ibitashyizwe mu myanzuro

12:05: Umwunganizi w’abaregwa yavuze ko nta kintu na kimwe kigaragaza intego yo kurema umutwe w’abagizi ba nabi aba basirikare baba bafite, bityo ko nta mpamvu n’imwe ubushinjacyaha bugaragaza bubahamya iki cyaha.

Ku cyaha cyo guta izamu, yavuze ko kuba iperereza ry’igisirikare ritarigeze rimenya ko habayeho guta akazi, ibyo ubushinjacyaha buvuga bitaba impamvu zikomeye zishingirwaho mu kubarega iki cyaha.

Ku cyaha cyo gusambanya ku gahato, yavuze ko ukurikije uko iperereza riteye, bemeranya n’ibyo ubushinjacyaha bwabonye, ashingiye ku biri mu nyandiko mvugo by’abakorewe ibyaha, aho asanga ko iperereza rigikomeje rikazagaragaza ibimenyetso byisumbuyeho bishinja cyangwa bishinjurwa.

11:30: Tariki 30 Werurwe, ngo Pte Ndayishimiye yaje ari kumwe n’umupolisi wambaye imyenda y’abasivile. Icyo gihe ngo bari [abanyerondo] ku kagari bafashe umuntu ufite urumogi bategereje imodoka y’Umurenge ngo ize imutware.

Ngo iyo modoka yarahageze ihura na Pte Ndayishimiye muri ayo masaha ya saa saba z’ijoro. Bari kumwe n’umukobwa witwa Mama Mutoni n’abandi basirikare atabashije kumenya ariko uyu Pte Ndayishimiye we yaramumenye kuko ari ubwa kabiri bari bahuye.

Pte Ndayishimiye ngo yababwiye ko abo bantu babafatanye urumogi bagahita baruta mu musarane. Ngo Pte Ndayishimiye yabasabye ko basaka aho hantu, basaka ingo eshanu ntarwo babona.

Yavuze ko atigeze abona umukobwa afatwa ku ngufu cyangwa se umusirikare uri kwiba ahubwo ngo icyo yabonye ni umusirikare uri gukubita umuturage.

11:20: Ntakaziraho Donat we yavuze ko atari kujya kurema umutwe w’abagizi ba nabi ari kumwe n’abantu bataziranye. Yavuze ko yabonye Pte Ndayishimiye umunsi umwe ahagana saa tanu n’igice. Icyo gihe nk’ukora irondo, ngo yari mu kazi.

Yavuze ko bamanutse bageze ahantu hari restaurant muri Kangondo ya II, “dusanga inkoni iri kurisha”. Ngo yarahengereje asanga Pte Ndayishimiye ari gukubita abantu, undi ngo aramubaza ati “uri umunyerondo”? undi ati yego. Ngo Pte Ndayishimiye amubaza impamvu muri uwo mudugudu borora abajura.

Ngo yahasanze na Pte Gatete ari kumwe na Pte Gahirwa. Yavuze ko yahageze Pte Gatete ari kubwira Pte Ndayishimiye ati “rekeraho gukubita bingana gutya”. Ngo kuko bo bari abanyerondo, ngo bumvise ko uwo mwana koko yibye kwa “major”, niko kureba abasirikare baramutwara.

11:20: Pte Twagirimana yavuze ko yakoranye na Pte Gahirwa John i Batsinda. Ngo bitewe n’uko aribwo bari bagisoza amasomo, bajyaga aho Pte Ndayishimiye ababwiye, ndetse ngo ibyaha ntazi uburyo bwakozwe. Yasabye urukiko ko rwamurekura ku buryo yabonana n’umuryango we kuko ngo n’ubu utazi aho aherereye.

11:10: Pte Gahirwa yavuze ko tariki 1 Mata aribwo yafashwe kandi nabwo ngo byari bigendeye ku muntu wese wakoranye na Pte Ndayishimiye. Ngo babajyanye i Kami, maze ngo abaturage bakabereka abasirikare bose, buri wese akazajya akora k’uwa mukoreye icyaha. Uwitwa Shema niwe ngo wamukozeho avuga ko yamuhohoteye.

Amatariki avugwa ko aribwo yahohoteye uwo Shema, ngo yari amaze iminsi mu bari bari gutekerera aba ofisiye.

11:05: Pte Gatete yavuze ko yageze mu kigo cya Gisirikare cya Kami tariki ya 03 Werurwe. Ngo bahise bahabwa ikiruhuko kuko aribwo bari basoje amasomo, noneho umunsi yahaweho akazi yari kumwe na Pte Ndayishimiye bajya gukorera kuri MTN Center.

Ngo nta munsi n’umwe yigeze akora akazi saa sita z’ijoro nk’amasaha abashinja bavuga ko barerwaho ibyaha. Umunsi wa kabiri yahawe akazi, ngo hari kuri Mata, ari nabwo ngo yafashwe.

Ngo yashyizwe muri “Mabuso” i Kami nyuma ahavanwa ajyanwa ku Murindi muri Gereza. Ngo yaje kujyanwa i Kami we n’abandi benshi babashyira ku murongo, aho ngo nta muntu n’umwe wigeze amushinja ko yamukoreye icyaha.

11:00: Pte Nishimwe yavuze ko ibyaha aregwa atazi n’aho byakorewe kuko n’uduce tuvugwamo ko ariho byakorewe atatuzi kuko aribwo yari agisoza amasomo, ngo ku buryo atari yakabonye n’uruhushya rwo kujya iwabo mu rugo.

Yavuze ko umukobwa wasambanyijwe ku gahato yabajijwe niba uwamusambanyije amuzi, avuga ko ngo amuzi kuko ngo ari umusirikare muremure wajyaga akunda kuhanyura. We yavuze ko atari we ngo kuko aho hantu atigeze ajyayo mu kazi.

10:57:Pte Nishimwe yavuze ko ku matariki ashinjwaho ibyaha byo gukoresha imibonano mpuzabitsina ku gahato, atari yagatangiye kujya ku burinzi. Yavuze ko tariki ya 14 na 30 Werurwe atigeze akorana na Pte Ndayishimiye.

10:55: Kujyayo ngo ni uko abaturage baho bigeze gusenyerwa, yumva induru y’abaturage bari kwigaragambya, ajyayo gusa agiye kureba icyabaye. Yavuze ko icyo gihe mu bo bareganwa nta n’umwe wari wagasoje amasomo kuko ngo bayasoje ku wa 29 Gashyantare, bagera mu kigo cya Gisirikare cya Kami ku wa 03 Werurwe.

10:50: Pte Ndayishimiye yavuze ko ku munsi w’ifatwa rye yafatanywe na Pte Nishimwe, ngo ako gace yakajyagamo agiye gutembera bisanzwe ku munsi yabaga adafite akazi, ariko ngo ntiyigeze ajyayo ari mu kazi. Ngo kubera ko yakundaga kuhajya, “abantu baho benshi turaziranye”.

Ngo mu kwezi kwa Gatatu ntiyagiyeyo, ahubwo ngo yagiyeyo mu kwezi kwa Mbere n’uwa Kabiri nabwo ari mu kazi.

10:45: Yavuze ko mu matariki aregwaho ko yakoreye ibyaha, hari abasirikare bareganwa batari bagatangiye gukora. Avuga ko muri dosiye, havugwamo ko umuyobozi yari umusirikare muremure w’igikara, kandi muri aba “simbonamo umusirikare muremure w’urukara”, akavuga ko ahubwo hakwiye gushaka uwo ariwe, aho gukomeza “kwitwaza izina Patrick”.

10:40: Mu kwisobanura, Pte Ndayishimiye yavuze ko abo bagore bo muri Kangondo ya II bamushinja ko “tuza tukabarongora hanyuma tukagenda”. Yavuze ko ngo abo bagore bavuze ko ngo bajyaga “kubarongora babakuye ku bagabo babo”, akavuga ko bitumvikana uburyo abagabo babo babimukiraga umunsi ku wundi.

10:35: Abashinja aba basirikare ni abaturage barenga 20, bose hasomwe amazina yabo mu rukiko umwe ku wundi.

10:30: Ubushinjacyaha buvuga ko mu nyandiko mvugo z’abaregwa, bose bemera ko bagiye mu mudugudu wa Kangondo. Pte Ndayishimiye ngo yemeye ko hari abaturage yakubise barimo uwitwa Ngabonziza Shema.

Undi ureganwa n’aba, ni umunyerondo witwa Mukamurisa Diane [utari mu rukiko kuko afite uruhinja], yashinje abasirikare, avuga ko bajyaga mu nzu bavuga ko bari gusaka urumogi kandi nta muntu wabibahereye uburenganzira.

Pte Ndayishimiye ngo yashinje Pte Nishimwe ko yakubise abantu “anasambanya abakobwa babiri”

10:15: Ku wa 14 Werurwe, ngo Pte Nishimwe yari kumwe na bagenzi be bajya ku rugo rwabagamo abakobwa babiri, bageze ku nzu yabo, barabakomangira, basohora umwe bamukubita, undi nawe bamukubita ku bibero n’ahandi.

Ngo baje kugaruka bwa kabiri, Pte Nishimwe asambanya ku gahato umwe “inshuro ebyiri zose”. Pte Ndayishimiye nawe ngo yaje gukoresha imibonano mpuzabitsina ku gahato n’undi utari muri abo babiri babana. Ubushinjacyaha buvuga ko muri icyo gihe, abandi basirikare batatu n’abanyerondo babiri, babaga bari hanze babacungiye umutekano.

10:10: Uwitwa Pte Nishimwe na Pte Ndayishimiye, ngo bafashe umukobwa bamujyana mu nzu y’umutage wo muri ako gace, nyirayo bamusohoramo bamukubita maze Pte Nishimwe ayisambanyirizamo uwo mukobwa, naho Pte Ndayishimiye we asigara ari gukubita nyir’iyo nzu.

Havuzwe kandi undi muturage wakubiswe na Pte Ndayishimiye kugeza ubwo bimugizeho ikibazo mu matwi. Ngo yaje kandi gukubita akanakomeretsa uwitwa Shema.

10:00: Ubushinjacyaha buvuga ko mu matariki atandukanye ya Werurwe 2020, aba basirikare batanu bagiye bahabwa akazi ko gukora izamu n’irondo mu bice bitandukanye by’Akarere ka Gasabo ariko byagera mu saha y’ijoro, bo bakahava bakajya gukorera aho batabwiwe.

Ngo ni muri ubwo buryo bajyaga mu Mudugudu wa Kangondo ya II mu Murenge wa Remera, akaba ariho bakorera ibyaha bakekwaho.

Ubushinjacyaha buvuga ko kuba barataye izamu, bakajya ahandi, niho hashingiye icyaha cyo guta izamu.

Bwavuze ko hari n’ikindi gihe aba basirikare bajyaga muri uwo mudugudu nta n’ahandi bapanzwe akazi aho ariho hose. Uwari ubayoboye muri ibyo bikorwa, bwavuze ko ari Pte Ndayishimiye.

9:55: Abaregwa bose babajijwe niba bemera ibyaha bakekwaho, maze umwe ku wundi asubiza ati “ntabwo mbyemera”.

9:45: Ubushinjacyaha buhawe umwanya kugira ngo buvuge ibyaha bukurikiranyeho abaregwa uko ari batandatu.

Pte Ndayishimiye na Nishimwe bakekwaho ibyaha birimo icyaha cyo gushyiraho umutwe w’abagizi ba nabi no kuwujyamo, gukoresha undi imibonano mpuzabitsina ku gahato, gukubita no gukomeretsa ku bushake, kwinjira aho umuntu atuye mu buryo butemewe n’amategeko, kwiba no guta izamu no kudakurikiza amabwiriza y’izamu.

Bagenzi babo Pte Gahirwa, Gatete na Twagirimana bo bakekwaho ibyaha birimo guta izamu no kudakurikiza amabwiriza y’izamu, kujya mu mutwe w’abagizi ba nabi, kuba icyitso mu gukoresha undi imibonano mpuzabitsina ku gahato, kuba icyitso mu gukubita no gukomeretsa abantu ku bushake ndetse no kuba icyitso mu kwiba.

Umunyerondo witwa Ntakaziraho Donat we akekwaho icyaha cyo kujya mu mutwe w’abagizi ba nabi, ubufatanyacyaha mu gukubita no gukomeretsa, kuba icyitso mu gukoresha undi imibonano mpuzabitsina ku gahato, kuba icyitso mu kwiba no kwinjira aho umuntu atuye mu buryo butemewe n’amategeko.

9:30: Urukiko rukomeje kubaza imyirondoro abaregwa bose, ni mu gihe hashize iminota mike uwunganira abasirikareageze mu rukiko. Usibye abasirikare baregwa, umusivile umwe Ntakazirabo Donat avuze ko yari asanzwe ari umukarani ariko anakora irondo ry’umwuga. Anavuze ko aza kwiburanira, ko nta mwunganizi afite.

9:20: Urukiko rwatangiye rubaza umwirondoro wa buri umwe, ruhera kuri Pte Ndayishimiye, abazwa niba atarigeze akatirwa n’urukiko. Mu gusubiza yavuze ko mu 2018 yakatiwe n’Urukiko rwa Gisirikare i Nyamirambo ku cyaha cy’ubufatanyacyaha ku bwo guhishira umujura, ahabwa igifungo cy’umwaka.

9:15: Abaregwa barimo umugore umwe w’umusivili witwa Mukamurisa Diane. We ntiyagaragaye mu rukiko kuko ngo yarekuwe nyuma y’aho bigaragaye ko afite uruhinja. Abandi baregwa ni abasirikare Pte Ndayishimiye Patrick, Pte Nishimwe Fidèle, Pte Gatete François, Pte Gahirwa John, Pte Twagirimana Theonetse n’umusivile witwa Ntakazirabo Donat.

9:00: Nyuma y’iminota 15 abandi bageze mu rukiko, hazanywe undi muntu wa gatandatu we utambaye impuzankano ya gisirikare ahubwo wambaye imfungwa za gisirikare. Bivuze ko ababuranishwa ari batandatu aho kuba batanu.

8:45: Saa mbili n’iminota 45 nibwo aba basirikare bageze mu rukiko, bari mu modoka imwe ndetse baherekejwe n’abasirikare bo mu mutwe ushinzwe imyitwarire mu gisirikare, Military Police. Bose babajijwe niba bafite abunganizi, basubiza YEGO, gusa ntabwo ababunganira baragera mu rukiko.

Abasirikare batanu n’umusivili umwe bakurikiranyweho ibyaha birimo gukoresha imibonano mpuzabitsina ku gahato abakobwa n’abagore bo mu Murenge wa Remera mu Kagari ka Kangondo II ku wa 13 Gicurasi 2020 bakatiwe gufungwa iminsi 30 y’agateganyo

Amafoto: Hakizimana Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .