00:00:00 IGIHE NETWORK KN KINYARWANDA EN ENGLISH FR FRANCAIS

Abashoramari bibukijwe uruhare rwabo mu guhangana n’ibiza byibasira Akarere ka Ngororero

Yanditswe na Akimana Jean de Dieu
Kuya 21 July 2022 saa 10:23
Yasuwe :

Minisitiri w’Ibikorwa by’Ubutabazi, Kayisire Marie Solange, yabwiye abashoramari bo mu Karere ka Ngororero ko bakwiye guhangana n’ibiza cyane muri aka gace kari ku buhaname bwo hejuru.

Ni ubutumwa yatanze ubwo abafatanyabikorwa n’abashoramari bahuriraga mu imurikabikorwa ry’abari muri DJAF Isangano rya Ngororero ryafunguwe ku wa 19 Nyakanga 2022.

Yagize ati “Bashoramari namwe bafatanyabikorwa mukwiye kudufasha guhangana n’ibiza bikunze gutwara ubuzima bw’abantu ndetse bikanangiza ibikorwaremezo birimo amateme n’ibiraro kuko bihagarika ubuhahirane bw’abaturage. Nk’uko mufasha abaturage kwivana mu bukene nimubafashe no guhangana n’isuri kuko yangiza imitungo yabo kandi bakahaburira ubuzima.’’

Minisitiri Kayisire yibukije abaturage ko bakwiye gutera icyayi ahashoboka hose kuko byatuma biteza imbere bakanarinda ubutaka gutwarwa n’isuri.

Yavuze ko iki gihingwa cyanabateza imbere mu bukungu mu gihe bagikoreye neza cyane ko gifite isoko mu Rwanda no mu mahanga.

Perezida wa DJAF Isangano ya Ngororero akaba n’Umuyobozi wa Cartas ya Diyosezi ya Nyundo, Padiri Rutakisha Jean Paul, yavuze ko mu bafatanyabikorwa bafite hari abibanda mu kubungabunga ibidukikije kandi babikora neza.

Yagize ati “Mu bafatanyabikorwa bacu dukorana hari abafite inshingano zo kubungabunga ibidukikije kandi bafatanya n’abaturage rimwe na rimwe bakabigisha uko bagomba guhinga neza bityo ubuhinzi bakora ntibwangize ibidukikije. Hari n’abandi batera amashyamba cyangwa bakayasazura ariko tuzajya dukomeza kubaganiriza no kureba ahatashyizwemo ingufu ngo binozwe neza.’’

Munyarubuga Thomas utuye mu Murenge wa Gatumba yavuze ko hari abagira uruhare mu kwangiza ibidukikije biha urwaho isuri kubera kutabungabunga neza aho bakorera.

Ati “Icyo gihe iyo haje isuri, yangiza imitungo y’abaturage n’ibikorwaremezo bitandukanye.’’

Guverineri w’Intara y’Iburengerazuba, Habitegeko François, yavuze ko ibiza bikunze kwibasira Akarere ka Ngororero bituruka ku buhaname bw’imisozi ikagize.

Yavuze ko hakwiye kugira igikorwa ngo isuri n’iyangizwa ry’ibidukikije rituruka ku bacukura amabuye y’agaciro rirwanywe kuko ritwara ubuzima bw’abaturage rikanangiza ibikorwaremezo biba byatwaye amafaranga menshi.

Yakomeje avuga ko icyo ubuyobozi butabyifasha bwonyine ahubwo bukeneye “aba bashoramari n’abafatanyabikorwa kugira ngo duhangane n’ibiza byangiza imitungo y’abaturage.’’

Mu mwaka ushize, mu Karere ka Ngororero haguye imvura nyinshi yangije imihanda, ihagarika ubuhahirane bwa tumwe mu duce duhana imbibi, inangiza ibiraro n’amateme.

Mu mwaka ushize w’Imihigo 2021/2022, muri Ngororero hakoreshejwe asaga miliyari 1,354 Frw mu bikorwa byo guca amaterasi. Muri uyu mwaka iyi ngengo y’imari yariyongereye iba miliyari 2,447 Frw azifashishwa mu bikorwa byo guhangana n’isuri.

Abayobozi batandukanye basura uduce twibasirwa n'imyuzure kubera amazi y'imvura yuzura mu bishanga
Mu mwaka ushize, mu Karere ka Ngororero haguye imvura nyinshi yangije imihanda, ihagarika ubuhahirane bwa tumwe mu duce duhana imbibi, inangiza ibiraro n’amateme
Akarere ka Ngororero gakunze kwibasirwa n'ibiza bitewe n'imiterere yako
Minisitiri w’Ibikorwa by’Ubutabazi, Kayisire Marie Solange, yabwiye abashoramari bo mu Karere ka Ngororero ko bakwiye gutanga umusanzu wabo guhangana n’ibiza
Guverineri w'Intara y'Iburengerazuba, Habitegeko François, yavuze ko kurwanya ibiza atari urugamba rwa Leta gusa
Abafatanyabikorwa n’abashoramari bahuriye mu imurikabikorwa ry’abari muri DJAF Isangano mu Karere ka Ngororero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .