Abashoramari bato beretswe uko bakora imishinga y’ubukerarugendo yunguka

Yanditswe na Evariste Nsengimana
Kuya 16 Ugushyingo 2018 saa 04:52
Yasuwe :
0 0

Abashoramari biganjemo abagitangira, basobanuriwe ibyo bakwitaho mu gihe bashaka kubyaza inyungu ibitekerezo by’ubucuruzi bushingiye ku bukerarugendo n’amahoteli bafite.

Ni mu kiganiro bahawe n’abamaze igihe mu ishoramari rishingiye ku bukerarugendo kuri uyu wa Kane, cyateguwe n’ikigo gikorana na ba rwiyemezamirimo cyitwa ‘Inkomoko Enterpreneur Development.’ gifatanyije n’umuryango Mastercard Foundation.

Ni ikiganiro kibanze ku byafasha ‘ishoramari rishingiye ku bukerarugendo n’amahoteli’ bahawe mu gihe Isi yizihiza icyumweru cyahariwe ba rwiyemezamirimo, hagamijwe kubafasha kwagura ibikorwa byabo.

Umwe mu batanze ikiganiro witwa Bamukunde Nicole, washinze ‘4 Blooms Restaurant’ yabahishuriye ko mbere yo gutangira ishoramari rishingiye ku bukerarugendo, umuntu abanza gukora ubushakashatsi, ku buryo azana ikintu gikenewe kandi kidahenze.

Ati “Ni ngombwa gukora ubushakashatsi ku bigo byagize icyo bigeraho ukamenya inzira byaciyemo.”

Yababwiye ko ‘nyuma yo kubukora, umushoramari bumufasha gutangira umushinga mu buryo yawutekereje.’

Sebageni Jacques, washinze ikigo cy’ubukerarugendo cyitwa ‘Thousand Hills Africa’, yababwiye ko ubukerarugendo ari urwego rukomeye mu Rwanda kuko rugendwa n’abanyamahanga benshi kandi rukorohereza ishoramari.

Yakomeje agira ati “Mbere na mbere ni ugufata umwanzuro. Mu buzima iyo ushaka ikintu ugomba kuwufata. Ikindi, birakenewe ko mwizera ko ibihari bikurura abantu bo hanze mu bihugu byose kandi mugashaka abantu mukorana bafite ubushobozi, mushobora kwigiraho.”

Aba bashoramari bagaragaje bimwe mu bibazo bicyugarije abakiritangira n’ababyifuza birimo; amikoro, ubumenyi bucye n’ibindi, basobanurirwa ko icy’ingenzi ari ukugira igitekerezo, gufata umwanzuro, kuganira n’ababimazemo igihe bakabagira inama z’uko babyikuramo.

Umuyobozi w’Ishami ry’ubukerarugendo mu Kigo Gishinzwe Iterambere (RDB), Belise Kariza, yavuze ko ‘Ba rwiyemezamirimo bakwiye kwifashisha ibintu biri mu Rwanda, nyuma y’ubusesenguzi bwabafasha guhangamo udushya, bakegera RDB ikabafasha uburyo babibyaza umusaruro’.

Umuyobozi w’umushinga Hanga Ahazaza wa MasterCard Foundation, Rica Rwigamba, yavuze ko ‘ufite miliyoni 50$ uzafashisha urubyiruko ibihumbi 30 rw’abanyarwanda kubona imirimo ishingiye ku bukerarugendo.’

Uwo mushinga uzafasha ababusanzwemo kongera ubumenyi bwabafasha gushinga ibikorwa byabo no kwigisha mu mashuri, amasomo afasha kwinjira mu ishoramari ribushingiyeho bafite ubushobozi.

Umushinga uwukorana n’abafatanyabikorwa 10 barimo Inkomoko, ifasha abato n’abaciriritse kongera ubumenyi.

Umuyobozi w’Inkomoko, Natalie Niyonzima, yavuze ko iki gikorwa bagiteguye bagamije gufasha ba rwiyemezamirimo kuko aribo byiringiro by’ejo hazaza h’u Rwanda.

Ati “Tuzi neza ko ba rwiyemezamirimo ari ibyiringiro by’ejo hazaza h’igihugu kandi bashoboye kwagura ibikorwa byabo, bigira ingaruka nziza ku bukungu bw’igihugu.”

Mu myaka itandatu imaze ikorera mu Rwanda, Inkomoko imaze gukorana na ba rwiyemezamirimo basaga 3000.

Iki kiganiro cyari kitabiriwe n'abashoramari n'abayobozi batandukanye
Bamwe mu bamaze igihe mu ishoramari rishingiye ku bukerarugendo bari gutanga ikiganiro
Umuyobozi w’Inkomoko, Natalie Niyonzima, yavuze ko iki gikorwa bagiteguye bagamije gufasha ba rwiyemezamirimo kuko aribo byiringiro by’ejo hazaza h’u Rwanda
Umuyobozi w’umushinga Hanga Ahazaza wa MasterCard Foundation, Rica Rwigamba, yavuze ko ‘Ufite miliyoni 50$ uzafashisha urubyiruko ibihumbi 30 rw’abanyarwanda kubona imirimo ishingiye ku bukerarugendo
Umuyobozi w’Ishami ry’Ubukerarugendo mu Kigo cy’Iterambere RDB, Belise Kariza, yavuze ko ba rwiyemezamirimo bakwiye kwifashisha ibintu biri mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza