00:00:00 IGIHE NETWORK KN KINYARWANDA EN ENGLISH FR FRANCAIS

Abashinzwe umutekano basabwe kutazajenjeka mu bihe bya CHOGM

Yanditswe na Kanamugire Emmanuel
Kuya 10 June 2022 saa 07:55
Yasuwe :

Mu gihe hasigaye iminsi ibarirwa ku ntoki kugira ngo inama ya CHOGM ibe, abashinzwe umutekano muri GardaWorld, sosiyete irinda amahoteli akomeye na za ambasade mu Rwanda, basabwe kutazajenjeka mu nshingano zabo mu gihe bazaba bakira abashyitsi.

Ni ubutumwa bahawe ubwo basozaga amahugurwa yateguwe ku bufatanye bwa Polisi y’u Rwanda kuri uyu wa 9 Kamena 2022, ngo bamenyeshwe ibyo bakwiye kwitondera bizatuma umutekano usagamba.

Mu byo bahuguwemo harimo gusaka mu buryo bw’umwuga, gukumira iterabwoba, gutanga serivisi nziza n’ibindi.

Icyari kigamijwe ni ukuzamura amakenga y’aba basekirite nk’uko byavuzwe na Superintendent Alphonse Sinzi wasoje aya mahugurwa mu izina rya Komiseri ushinzwe ibikorwaremezo by’umutekano n’ibigo byigenga bishinzwe umutekano muri Polisi y’u Rwanda, ACP Jean Nepo Mbonyumuvunyi.

Yagize ati “Icyo mwabonye uyu munsi ni uko utuntu duto mwajyaga musuzugura dushobora kuvamo intwaro. Mwabonye ko abo mutakekaga ko bashobora gukora ikintu kibi bagikora.”

Yakomeje agira ati “Mwize uburyo umuntu akumira iterabwoba, musake mutarebye isura, mumenye ko umuntu wese yaba icyihebe. Ntimukagire uwo mureka, nta muntu udasakwa. Mutangire musake mutajenjetse, mujye musaka umuntu yivovote.”

Ibyo byose ariko basabwe kubikora mu kinyabupfura, bubaha abashyitsi kandi babaha serivisi nziza birinda gusiga igihugu umugayo n’isura mbi.

Superintendent Sinzi yongeyeho ati “Mwize gutanga serivisi nziza. Icyo nabawira ni uko uko witwaye bibasha kugira ingaruka ku gihugu cyane cyane ko mwebwe mwakira abantu buri munsi.”

“Ni mwe mwakira abanyamahanga, abantu basuye igihugu ni mwe ba mbere babona. Ushobora kwitwara nabi ku munyamahanga akakubonamo isura y’Abanyarwanda bose. Mwubahe, musake mu kinyabupfura, nakubaza umusubize neza, ajyane ishusho y’igihugu cyiza.”

Umuyobozi wa GardaWorld Rwanda, William Gechohi, yavuze ko amahugurwa yateguwe hagamijwe gufasha abasekirite kwitegura gutanga serivisi nziza mu by’umutekano nk’uko bikwiye.

Yijeje abakiliya b’iyi sosiyete ko yiteguye kubaha serivisi nziza n’umutekano wabo ukaba wizewe.

Yashimiye abitabiriye amahugurwa ku mwanya batanze abasaba ko ibyo bungutse bazabisangiza bagenzi babo batagize amahirwe yo kwitabira kandi bakabishyira mu mahugurwa.

Gasana Emmanuel uri mu bahuguwe akaba akorera kuri Ambasade ya Amerika mu Rwanda, yavuze ko hari icyo yungutse cyiyongera ku bumenyi yari asanganywe.

Ati “Twbonye ko abagizi ba nabi bashobora gukoresha amayeri menshi cyane.Nk’umusekirite w’umwuga nkuyemo ko ngomba kugira amakenga menshi. Nta kwizera uwo ari we wese, ntiwamureba isura ngo uvuge ngo ‘uyu nta kibazo afite, nta mpungenge yantera, bivuze ngo ikintu binyongereye ni uko ngomba kuba maso igihe cyose ndi mu kazi.”

Uwimbabazi Henriette, we yavuze ko yiteguye kwitwara neza kurushaho ku buryo abashyitsi bazava mu Rwanda bavuga ko basanze abashyitsi bakirwa neza.

Komiseri ushinzwe ibikorwaremezo by’umutekano n’ibigo byigenga bishinzwe umutekano muri Polisi y’u Rwanda, ACP Jean Nepo Mbonyumuvunyi ni we watangije aya mahugurwa
Komiseri ushinzwe ibikorwaremezo by’umutekano n’ibigo byigenga bishinzwe umutekano muri Polisi y’u Rwanda, ACP Jean Nepo Mbonyumuvunyi hamwe n'Umuyobozi wa GardaWorld Rwanda, William Gechohi ku munsi wo gutangiza amahugurwa
Abitabiriye amahugurwa bakurikiye impanuzo za polisi
Abasekirite ba GardaWorld ni bo barinda amahoteli akomeye n'ibindi bigo mu Rwanda
Aba basekirite basabwe kutazajenjeka mu gihe bazaba bacunga umutekano mu bihe bya CHOGM
Umuyobozi w’ishami ry’amahugurwa n’ibikorwaremezo by’ibigo byigenga bishinzwe umutekano muri Polisi y’u Rwanda, Superintendent Alphonse Sinzi
Superintendent Sinzi ati “Icyo mwabonye ni uko utuntu duto mwajyaga musuzugura dushobora kuvamo intwaro"
Abasekirite ba GardaWorld basabwe kutihererana ubumenyi bungukiye mu mahugurwa
Umuyobozi wa GardaWorld Rwanda, William Gechohi, yavuze ko amahugurwa yateguwe hagamijwe gufasha abasekirite kwitegura gutanga serivisi nziza mu by’umutekano nk’uko bikwiye
Gasana Emmanuel uri mu bahuguwe yavuze ko hari icyo yungutse cyiyongera ku bumenyi yari asanganywe
Uwimbabazi Henriette, we yavuze ko yiteguye kwitwara neza kurushaho ku buryo abashyitsi bazava mu Rwanda bavuga ko basanze abashyitsi bakirwa neza

Amafoto: Munyakuri Prince


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .