Abashinjwa ibyaha byo gucuruza abantu mu Rwanda bashobora kujya baburanishirizwa mu ruhame

Yanditswe na Evariste Nsengimana
Kuya 28 Ukwakira 2019 saa 09:20
Yasuwe :
0 0

Minisiteri y’Ubutabera yatangaje ko igiye kwiga uburyo yashyiraho ibwiriza rishya, abantu bafatiwe mu cyuho cyo gucuruza abantu bakazajya baburanishirizwa mu ruhame kugira ngo bibere urugero ababikora kandi binasigire isomo Abanyarwanda kugira ngo batazabishorwamo.

Byatangajwe n’Umunyamabanga wa Leta ushinzwe Itegeko Nshinga n’andi Mategeko, Uwizeyimana Evode, kuri uyu wa Mbere ubwo yaganiraga na Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside.

Impande zombi zaganiriye ku bibazo byagaragaye ubwo Komisiyo yasesenguraga itegeko ryerekeye kurengera umwana n’iryerekeye gukumira, kurwanya no guhana icuruzwa ry’abantu no gushakira inyungu mu bandi.

Minisiteri y’Ubutabera igaragaza ko mu 2017 hakiriwe dosiye 42, mu 2018 hakirwa 49 naho kugera uyu munsi mu 2019 hamaze kwakirwa 38 ndetse ko imibare y’abacyurwa igenda yiyongera kuko mu 2018 hagarujwe 19 naho mu 2019 hamaze kugaruzwa 25.

Depite Niyitegeka Winifred yabajije Minisitiri Uwizeyimana ati “Nagira ngo ntange icyifuzo ko imanza zabo zajya zibera mu ruhame. Niba umwana yaragiye kumufata Kimironko, bakamujyana kuburanishirizwayo rugatangazwa nk’uko imanza nyinshi zitangazwa. Nibaza ko abana benshi baza kubikurikirana.”

Uyu mudepite avuga ko byabera isomo abandi bana ku buryo ntawabashukisha akazi n’ibindi bikunze gushukishwa abantu nko kwiga, ubuzima bwiza n’ibindi.

Minisitiri Uwizeyimana yahise amusubiza ati “Igitekerezo twacyakiriye kandi ndagira ngo nkwizeze ko bizakorwa. Ni ukuvugana n’Ubushinjacyaha, Ubutabera hanyuma na Minisitiri w’Ubutabera, ibyo turabikoraho rwose..Twizere ko amadosiye yose y’abashinjwa gucuruza abantu aburanishirizwa mu ruhame.”

Yakomeje avuga ko byanafasha mu bukangurambaga, ku bantu bagifite ubujiji n’ubumenyi buke ku mayeri abantu bakoresha bagiye kujyana abantu kubacuruza.”

Ubushakashatsi buheruka gutangazwa n’Umuryango Never Again Rwanda muri Nyakanga 2019 bwerekanye ko mu birego by’abantu 515 bacurujwe hagati ya 2017 na 2018 harimo Abanyarwanda 70 (13.6%), Abarundi 323(62.7%), Abanye-Congo 77(15%) n’abandi 45 (8.7) bo mu bindi bihugu. Ab’igitsina gore bihariye 77.67% (400) naho ab’igitsina gabo ni 115 (22.33%).

Ku ruhanda rw’u Rwanda, ubu bushakashatsi bwerekana ko mu bacurujwe, 95.24% ari ab’igitsina gore, 87.01% ari urubyiruko naho 18.8% bari munsi y’imyaka 18.

Minisitiri Uwizeyimana yatanze icyizere ko abafatiwe mu bikorwa byo gucuruza abantu mu Rwanda bazajya baburanishirizwa ku karubanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .