Abasaga 170 bakurikiranyweho kunyereza miliyari 1,3Frw y’amakoperative mu Rwanda

Yanditswe na Evariste Nsengimana
Kuya 8 Gashyantare 2019 saa 09:58
Yasuwe :
0 0

Minisitiri w’Ubucuruzi n’Inganda, Soraya Hakuziyaremye, yatangaje ko abantu 174 bakurikiranywe n’ubutabera bw’u Rwanda, bakekwaho kunyereza amafaranga y’amakoperative angana na miliyari 1,3Frw yaburiwe irengero guhera mu 2012 kugeza 2018.

Iyi mibare yayigaragarije Inteko Ishinga Amategeko Umutwe w’Abadepite kuri uyu wa Gatanu.

Minisiteri y’Ubucuruzi n’Inganda n’iy’Ubuhinzi n’Ubworozi zatangaga ibisobanuro ku bibazo byagaragajwe na raporo ya Komisiyo y’Ubuhinzi, Ubworozi n’Ibidukikije, mu rwego rw’ubuhinzi, ubworozi, ubucuruzi n’inganda.

Kimwe mu bibazo byabajijwe Minisiteri y’ubucuruzi n’inganda ni imicungire idahwitse y’amafanga y’amakoperative na za Sacco, aho hakomeje kumvikana ko hari abayobozi n’abakozi bazo banyereje imitungo yazo, ikaba yarabuze abayishyura.

Depite Uwimanimpaye Jeanne d’Arc yabwiye Minisitiri Hakuziyaremye ko hakwiriye gufatwa ingamba zirambye ku bayobozi n’abakozi b’amakoperative banyereza imitungo yazo.

Depite Uwamariya yabajije niba Minicom n’inzego bifatanya mu gucunga amakoperative, ko hari inyigo bakoze igaragaza umubare w’abayanyereje, igihe bayanyerereje n’amaze kugaruzwa.

Minisitiri Hakuziyaremye yavuze ko raporo z’Urwego rufite mu nshingano amakoperative (RCA), zigaragaza ko hari abayanyereje bakurikiranywe n’ubutabera.

Ati “Ubu muri Koperative zitari Sacco, hari abantu 174 bakurikiranywe mu rwego rw’ubutabera kuko byagaragaye ko hagati ya 2012 na 2018 hari amafaranga ageze kuri miliyari 1,3Frw yanyerejwe.”

Yakomeje agira ati “Abo 174 bose bashyikirijwe ubutabera, baracyakorwaho iperereza, hari n’amafaranga macye yashoboye kugarurwa muri Koperative ariko ku rwego rukiri hasi cyane angana n’ibihumbi 214 Frw.”

Muri za Sacco, Minisitiri Hakuziyaremye yavuze ko inzego zitandukanye z’igihugu zahagurikiye kubikurikirana kuko zari zifite amafaranga yanyerejwe menshi, arenga miliyari 1,7Frw.

Ati “Kuri ubu, bamaze kugaruza amafaranga agera kuri miliyoni 240Frw, ikaba yaratangiye mu kwezi kwa 12 umwaka ushize kandi ikaba igikomeje, intego bafite ni uko 60% y’ayo mafaranga yibwe muri za Sacco azaba yagarutse mbere y’uko uku kwezi kwa Kabiri kurangira.”

Minisitiri Hakuziyaremye yavuze ko amafaranga yo muri Sacco namara kugaruzwa, no mu makoperative hazashyirwaho itsinda ryihariye, rizafasha kugaruza ayahanyerejwe, n’abayanyereje bagacibwa imanza.

Minisitiri Hakuziyaremye yavuze ko bantu basaga 170 bakurikiranyweho kunyereza miliyari 1,3Frw y’amakoperative mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza