00:00:00 IGIHE NETWORK KN KINYARWANDA EN ENGLISH FR FRANCAIS

Abasaga 100 batojwe guhangana n’icyorezo cy’ihomba ry’imishinga y’urubyiruko

Yanditswe na

Twizeyimana Fabrice

Kuya 16 Werurwe 2015 saa 06:11
Yasuwe :

Urubyiruko 116 basoje amasomo arutyaza gukora ubucabitsi (Business) bukoranywe ubuhanga n’ubushisho hirindwa ibihombo ibyo ari byo byose, mu mahugurwa yatanzwe n’umuryango w’abanya-Canada Dot-Rwanda.

Aya mahugurwa y’ibyumweru 10 aje akurikira ihomba ry’urudaca ry’imishinga itandukanye ihangwa n’urubyiruko, aho Leta y’u Rwanda yagaragazaga ko ihangayikishijwe no kuba imishinga y’urubyiruko isaga 80% ihomba igitangira.

Mu mpera z’umwaka ushize, Minisitiri w’Urubyiruko n’ikoranabuhanga mu isakazabumenyi (MYICT), Jean Philbert Nsengimana, yagaragaje ko nubwo urubyiruko rw’u Rwanda rushyize umutima ku kwihangira imirimo, rufite ikibazo cy’ingutu kuko imishinga mito n’iciriritse rwihangira hafi ya yose ihomba bidatinze.

Urubyiruko rusaga 100 rwahuguwe ku kwigangira imirimo itazahomba igitangira

Mu nama yiga ku iterambere ry’urubyiruko yateguwe na Sena y’u Rwanda yabaye mu Ukwakira umwaka ushize, Minisitiri Nsengimana yahishuye ko 80% by’imishinga y’urubyiruko igwa mu gihombo mu mwaka umwe gusa. Ngo ibi bica intege cyane gahunda yo kwihangira imirimo hagamijwe kugabanya umubare w’abategera ibiganza abatanga akazi.

Minisitiri Nsengimana yagize ati “Urubyiruko mu by’ukuri rugerageza kwihangira imirimo, ariko igiteye impungenge ni uko 80% by’ibikorwa by’ubucuruzi cyangwa kwihangira imirimo mbere y’uko umwaka urangira biba byahombye byavuye ku isoko. Icyo ni ikibazo gikomeye cyane.”

Uyu muyobozi yagaragaje ko ibihombo biri mu mishinga y’urubyiruko binarenze kuba ikibazo ahubwo ari “Icyorezo” cyateye ku Isi yose, ariko ku ruhande rw’u Rwanda ngo uko biri kose hagomba kuvugutwa umuti uboneye.

Umuyobozi wa Dot-Rwanda, Nzeyimana Emmanuel, asobanura ko ukudasobanukirwa gutegura no gucunga imishinga mu rubyiruko ari bimwe mu bituma abagerageza kwihangira imirimo bahomba.

Nzeyimana asobanura ko ibyo abarangije amasomo bize bizabagirira umumaro ufatika, uzabafasha gutera imbere mu buryo bufatika.

Ati “Amahugurwa duheraho ni abafasha kwimenya no kwigirira icyizere, bikavaho tukabaha amahugurwa ku ikoranabuhanga nyuma tukanabahugura ku gukora ubucabitsi (Business) no gucunga neza umutungo. Twabahaye kandi ubumenyi buhagije ku gucunga amafaranga atari ayawe (Inguzanyo) no kuyabyaza umusaruro nka kimwe mu bintu by’ingenzi benshi mu bakora ubucabitsi baba Babura.”

Umwe mu barangije aya masomo witwa Muvara Muhizi Valens yabwiye itangazamakuru ko aya mahugurwa yamubereye nk’indorerwamo aabasha kumenya aho afite imbaraga nke, zirongerwa ku buryo yizeye gutera imbere ntakimukoma mu nkokora.

Yagize ati “Aya mahugurwa njye nabonye ari nko kugutereka imbere indorerwamo ukibona, ukamenya icyo ushoboye n’icyo udashoboye mu ruhando rw’ubucabitsi. Ubu icyo numva nshoboye ni uko amafaranga yose naba mfite nayabyaza umusaruro kandi nkashobora guhatana ku isoko ry’umurimo simpombe.”

Umuyobozi w’Akarere ka Nyarugenge ushinzwe Ubukungu n’iterambere, Kagisha Felicien, avuga ko aya masomo uru rubyiruko rwahawe akuyeho zimwe mu nzitizi zabananizaga mu gukora ubushabitsi.

Kagisha yasabye uru rubyiruko kwishyira hamwe kugira ngo bakureho ibibazitira kubona inguzanyo zo kwiteza imbere, anabasezeranya ubufasha bw’inzego z’ubuyobozi.

Ati “Ntabwo navuga ngo tugiye kubasabira ingwate aho icyo tugiye kubasaba ni ukwishyira hamwe. N’ubusanzwe hari ibigo by’imari bifasha abishyize hamwe kubona ingwate iyo bafite ibitekerezo by’imishinga myiza.”

Dot-Rwanda iteganya gufasha kwiteza imbere urubyiruko rusaga 7500 rusanzwe ruri mu bushomeri, abataragize amahirwe yo kwiga, abakora imirimo itandukanye ariko badafitiye ubumenyi n’abandi. Abasoje amasomo bafite imyaka iri hagati ya 18 na 30.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .