00:00:00 IGIHE NETWORK KN KINYARWANDA EN ENGLISH FR FRANCAIS

Abarya ruswa bagaragajwe nk’abanzi b’igihugu bakwiriye kuvirwaho inda imwe

Yanditswe na Uwase Divine
Kuya 26 January 2022 saa 12:38
Yasuwe :

Umuvunyi Mukuru Wungirije, Mukama Abbas, yagaragaje ko uretse kuba ruswa imunga ubukungu bw’igihugu ariko ari n’umwanzi ukomeye ukwiriye kurwanywa na buri Munyarwanda wese.

Yabigarutseho ku wa Kabiri tariki 25 Mutarama 2022, ubwo hamurikwaga ku mugaragaro ubushakashatsi bwa CPI 2021 [Corruption Perception Index 2021], bugaragaza uko ruswa ihagaze mu bihugu byo ku Isi birimo n’u Rwanda.

Ubushakashatsi bwa CPI 2021 bwagaragaje ko mu myaka yashize ikigero cya ruswa mu Rwanda kitahindutse cyane kuko rufite amanota 53% mu mwaka wa 2021 rukaba rwaravuye ku manota 54% mu mwaka wa 2020.

U Rwanda kuri ubu ruri ku mwanya wa 52 ku Isi rukaba aru rwa gatanu mu bihugu byo munsi y’Ubutayu bwa Sahara.

Umuvugizi wa RIB, Dr Murangira B Thierry yavuze ko ruswa iba mu nzego zose kandi ari uruhare rw’abantu bose mu kuyirwanya muri rusange.

Yagize ati “Urwego rw’Igihugu rw’Ubugenzacyaha rwagenjeje ibyaha bijyanye na ruswa n’ibifitanye isano nayo, muri 2018 byari magana 983, muri 2019 bigera kuri 955, muri 2020 biba 959, muri 2021 bigera kuri 815.”

Umuvunyi Mukuru wungirije, Mukama Abbas yibukije Abanyarwanda bose gufata ibikorwa byo kurwnaya ruswa nk’inshingano.

Ati “Ruswa ikorerwa mu gihugu cyacu ntabwo twayihashya turi twenyine turi hano, ni ubukangurambaga busaba Abanyarwanda guhindura imyumvire kuko ruswa nituyireberera, nkayirwanya uriya ntayirwanye kiraba ari ikibazo. Umwanzi w’Igihugu cyacu n’umuntu wese urya ruswa, ni umwanzi w’igihugu tugomba kuyirwanya twese tukamurwanyiriza icya rimwe.”

Ubushakashasi bwa CPI2021 bugaragaraza ko mu myaka yashize, ikigero cya ruswa mu Rwanda kitagiye gihinduka cyane mu bijyanye no kwiyongera cyangwa kugabanyuka kuko ubu rufite amanota 53%mu 2021 ruvuye kuri 54% rwariho mu 2020.

Muri rusange ubushakashatsi bugaragaza ko kuva mu 2012, u Rwanda rwari rufite amanota 54%, mu kurwanya ruswa.

Ku rundi ruhande ariko CPI 2021, igaragaza ko u Rwanda rwaje ku mwanya wa 52 ruvuye kuri 49 rwariho umwaka ushize. Ni ukuvuga ko rwasubiye inyuma ho imyanya itatu yose.

Ni mu gihe kandi rwashyizwe ku mwanya wa Gatanu mu bihugu byo munsi y’Ubutayu bwa Sahara. Umwaka ushize u Rwanda rwari ku mwanya wa kane.

N’ubwo u Rwanda rwasubiye inyuma ku rwego rw’Isi na Afurika muri rusange , ku bijyanye n’Akarere ka Afurika y’Uburasirazuba rwakomeje kuba ku mwanya wa mbere.

Muri Afurika y’Iburasirazuba, u Rwanda rukurikirwa na Tanzania iri ku mwanya wa kabiri, Kenya ndetse na Uganda, mu gihe u Burundi na Repubukika Iharanira Demukarasi ya Congo zinganya amanota.

Abarya ruswa bagaragajwe nk’abanzi b’igihugu bakwiriye kuvirwaho inda imwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .