00:00:00 IGIHE NETWORK KN KINYARWANDA EN ENGLISH FR FRANCAIS

Abarimu basabye Nkunganire kugira ngo batunge mudasobwa

Yanditswe na Ndikumwenayo Thierry
Kuya 22 September 2022 saa 07:57
Yasuwe :

Nk’uko habaho nkunganire ku bahinzi, abayobozi b’ibigo by’amashuri basabye ko Leta yashyiriraho nkunganire ku barimu hagamijwe kubafasha gutunga mudasobwa bihuse.

Kuva mu mwaka wa 2021 Minisiteri y’uburezi ibinyujije mu kigo cy’igihugu gishinzwe uburezi (REB), yatangiye gutanga mudasobwa ku barimu (One Laptop per teacher). Gusa mudasobwa zimaze gutangwa ni nkeya ugereranyije n’umubare w’abarimu bari mu gihugu.

Abayobozi b’ibigo by’amashyuri mu ntara y’Amajyaruguru basanga hari uburyo byakorwamo mwarimu akabasha kubona mudasobwa kandi abigize mo uruhare.

Ngo ibi byakorwa mwarimu ahabwa inguzanyo na Umwali Sacco ariko na Leta igashyiraho uruhare rwayo mucyo aba bayobozi bise nkunganire.

Tharcisse Turatsinze uyobora G.S Byumba EAR yagize ati“Igihugu cyacu kirakataje mu ikoranabuhanga. Rero mwarimu utamuhaye ubushobozi bwatuma yisanga mu ikoranabuhanga, byazadufata umwanya munini kugira ngo tugere ku iterambere ry’ikoranabuhanga. Bashyize inguzanyo mu Umwalimu Sacco bagashyiraho ibwiriza abarimu bagafata imashini bazajya bishyura gake gake, ariko na Leta igashyiramo nkunganire nk’uko ibikora mu zindi gahunda zizamura abaturage.”

Mugabire Bonaventure uyobora ikogo cy’amashuri abanza cya Kabeza, yagize ati “hari amasomo twigisha arimo ibijyanye n’ikoranabuhanga, rero ntabwo mwarimu yategura isomo ry’ikoranabuhanga adafite iyo mudasobwa. Iki ni icyifuzo cyiza, mwarimu ahawe inguzanyo na Leta ikamwunganira byadufasha kugera ku ikoranabuhanga mu buryo bwihuse.”

Nyundo Olivier uyobora APEKI Tumba TVET School mu karere ka Rulindo avuga ko we abarimu b’ikigo cye bamaze kuboma izi mudasobwa muri gahunda ya One Laptop per Teacher, gusa akemeza ko igitekerezo cya bagenzi be ari cyiza kuko buri mwarimu wese afite ubushake bwo gutunga iyo mudasobwa.

Niyotubikesha Jean Nepomusène wigisha mu karere ka Rulindo avuga ko mwarimu aramutse agize uruhare mu kuboneka kw’iyi mudasobwa, byafamusha kuyibungabunga kuruta uko yaba yitwa iya Leta nk’uko bimeze kuzitangwa ubu.

Ati “Kuba izi mudasobwa zitangwa kuri bamwe abandi bagategereza hari icyo bidindiza kuko uwayibonye mbere akazi ke kihuta. Mu rwego rwo guharanira inyungo z’umunyeshuri, abarezi bose bakaziboneye rimwe. Leta itanze uruhare rwayo umwarimu nawe agatanga nka 2% by’umushahara; nkeka ko bitarenza umwaka n’igice atararangiza kwishyura.”

Umunyamabanga uhoraho muri Minisiteri y’uburezi, Charles Karakye yavuze ko muri gahunda ya Leta hari ingengo y’imari igenewe kugura mudasobwa haba ku banyeshuri ndetse no ku barimu, avuga ko iki gitekerezo cy’aba bayobozi b’ibigo by’amashuri ari cyiza bityo ko bagiye kugisuzuma bakareba niba gishoboka.

Ati “Hasanzwe hari gahunda yo gushyira za mudasobwa mu bigo by’amashuri ndetse hari n’izihabwa abarimu kandi Leta izakomeza gushyira ingengo y’imari mu guteza imbere ikoranabuhanga mu kwigisha. Icyifuzo cyabo cy’uko hazamo nkunganire tuzagisuzuma nidusanga gishoboka hazabeho kugishyira mu bikorwa, kandi nidusanga hari izindi mpamvu zatuma kidakunda, tuzakomeza dushyire imbaraga muri gahunda yari isanzweho.”

Gahunda yo gutanga mudasobwa ku barimu (One Laptop per Teacher) yatangiye muri Werurwe 2021. Kugeza muri Mutarama 2022 abarimu bari bamaze kuzihabwa ni 15,039.

Icyifuzo cya Tharcisse Turatsinze cy'uko habaho nkunganire mu kubonera abarimu mudasobwa, cyakiriwe na benshi mu bayobozi b'ibigo by'amashuri
Nyundo Olivier uyobora APEKI Tumba TVET School ashigikiye igitekerezo cya bagenzi be cyo kubona Nkunganire ku bakeneye mudasobwa
Umunyamabanga uhoraho muri Minisiteri y’uburezi, Charles Karakye yavuze ko muri gahunda ya Leta hari ingengo y’imari igenewe kugura mudasobwa haba ku banyeshuri ndetse no ku barimu, avuga ko iki gitekerezo cy’aba bayobozi b’ibigo by’amashuri ari cyiza bityo ko bagiye kugisuzuma bakareba niba gishoboka.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .