00:00:00 IGIHE NETWORK KN KINYARWANDA EN ENGLISH FR FRANCAIS

Abarenga ibihumbi 25 bayizemo: Imyaka 25 irashize UNILAK itanga uburezi

Yanditswe na Balinda Yvette
Kuya 16 September 2022 saa 03:10
Yasuwe :

Kaminuza y’Abarayiki b’Abadivantisite ya Kigali, UNILAK yizihije isabukuru y’imyaka 25 imaze ibayeho, mu birori byabereye ku ishami ry’iyi kaminuza riri i Nyanza.

Ibirori byo kwizihiza iyi sabukuru y’imyaka 25 byabaye kuwa Kane tariki 15 Nzeri 2022.

UNILAK yatangijwe mu 1997 n’umuryango w’ababyeyi b’Abadivantisite baharanira iterembere ry’uburezi (FAPADER).

Bashinze ibigo by’amashuri abanza n’ayisumbuye nyuma yo kubona ko abana babo basozaga amashuri yisumbuye bakabura aho bakomereza kaminuza.

Nyuma y’imyaka 25 iyi kaminuza yaragutse aho kuri ubu ifite amashami abiri mu Karere ka Rwamagana n’i Nyanza ndetse n’icyicaro gikuru kiri i Kigali.

Kugeza ubu itanga amasomo mu bijyanye n’Amategeko, Ubukungu n’Icungamutungo, Kwita ku bidukukije ndetse n’Ikoranabuhanga.

Mu myaka 25 UNILAK imaze itanga ubumenyi n’uburere bushingiye ku ndangagaciro za gikirisitu, abanyeshuri barenga ibihumbi 30 bamaze guca muri iyi kaminuza mu cyiciro cya kabiri ndetse n’icya gatatu cya kaminuza mu ma shami yose.

Imaze gutanga impamyabushobozi zirenga ibihumbi 25, ikaba isohora abanyeshuri bari hagati ya 500 ni 1000 buri mwaka.

UNILAK ifitanye ubufatanye n’amashuri makuru yo mu bihugu bitanduka arimo ayo mu Bushinwa aha amahirwe abanyeshuri ba UNILAK yo kujya kwiga muri iki gihugu nk’uko byavuzwe n’Umuyobozi w’iyi Kaminuza, Prof Ngamije Jean.

Ati “Mu myaka 25 ishize kaminuza yagiye yaguka, yagura n’umubano n’ibindi bihugu ubu dufite abagera kuri 17 bari muri masters na 16 Phd n’abandi basoje bari mu kazi ahantu hatandukanye bitewe n’uwo mubano mwiza dufitanye na kaminuza zo mu bushinwa ndetse n’ahandi.”

Yaguye imbibi

UNILAK kuri ubu isigaye yakira n’abanyeshuri b’abanyamahanga, aho ifite abarenga 290 baturutse mu bihugu 18 bitandukanye.

Uhagarariye UNILAK mu mategeko, Ruhaya Ntwali Assiel yavuze ko kuba uyu munsi batanga n’ubumenyi ku banyamahanga biri mu bibatera ishema.

Ati “Ikiduteye ishema kurenza ibindi kuri uyu munsi ni uko kaminuza yacu itigisha abana b’u Rwanda gusa ahubwo n’abaturutse hirya hino mu bihugu bidukikije baza kuhigira, dufite abaturutse mu bihugu bigera kuri 18 bikaba ari ishema kuko yarenze imbibi z’u Rwanda.”

Elizabeth Yambabariye wize muri iyi kaminuza mu cyiciro cya gatatu mu shami ry’Ibidukikije n’iterambere ubu akaba ari umukozi w’Umuryango w’Abibumbye ushinzwe ingufu no kubungabunga ibidukikije wari witabiriye ibirori yavuze ko kuba UNILAK ifite ikigo cy’ubushakashatsi bifasha cyane mu myigire.

Ati “Kubera ikigo cy’ubushakashatsi ku bidukikije n’amashyamba bafite bituma gukora ubushakashatsi byoroha, ni kaminuza iri ku rwego rwiza nashishikariza umuntu wese wifuza kunguka ubumenyi bufitiye umuryango nyarwanda n’Isi akamaro kuko nk’ibyo nize bijyanye n’ibidukikije n’ibibazo bihangayikishije Isi muri rusange.”

Umuyobozi w’Intara y’Amajyepfo, Kayitesi Alice yashimiye UNILAK ku myaka 25 imaze itanga uburezi bufite ireme kandi avuga ko umusaruro ugaragara abasaba kujyana n’icyerekezo kigari cy’Igihugu.

Ati “Twishimiye isabukuru y’imyaka 25 UNILAK imaze itanga umusanzu mu burezi hakozwe byinshi ariko turacyafite urugendo rwo kugenda tubasaba ko bajyana n’icyerekezo kigari cy’igihugu 2035-2050 bareba aho Igihugu cyifuza kugera mu bijyanye n’uburezi.”

UNILAK iteganya gutangiza amasomo mashya ku byiciro byose ndetse n’ay’igihe gito batibagiwe n’ayerekeye ikoranabuhanga rigezweho.

Ifite kandi gahunda yo kwagura ibikorwa byayo mu bice by’Igihugu itarageramo no gukomeza kongerera ubumenyi abarimu bagura n’ubufatanye.

Umuhango wo kwizihiza imyaka 25 ishize UNILAK ishinzwe wabereye ku ishami ry'iyi kaminuza riri i Nyanza
Uyu muhango wabereye mu nzu mberabyombi ya UNILAK i Nyanza
Ibirori by'isabukuru y'imyaka 25 ishize UNILAK ishinzwe byari byitabiriwe n'abayizemo, abarimo bayigishamo n'abayobozi bayo
UNILAK yagaragaje ko ifite intego zo kuba kaminuza y'icyitegererezo mu karere
Guverineri w'Intara y'Amajyepfo, Kayitesi Alice yaje kwifatanya na UNILAK muri ibi birori
Pasiteri Ezra Mpyisi yari muri ibi birori byo kwizihiza imyaka 25 ishize UNILAK ishinzwe
Abagize uruhare mu iterambere rya UNILAK barashimiwe
Ezra Mpyisi yahawe ishimwe nk'umuntu wagize uruhare mu itangira rya UNILAK
Imiryango y'abagize uruhare mu ishingwa rya UNILAK yarashimiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .