Abarenga 1500 bahujwe n’abatanga akazi, abenshi babyiganira gukorera uruganda Inyange

Yanditswe na Iradukunda Samson
Kuya 7 Ukuboza 2018 saa 08:48
Yasuwe :
0 0

Abarenga 1500 biganjemo urubyiruko rwasoje za Kaminuza, bitabiriye igikorwa cya Job Net gihuza abashaka akazi n’abagatanga, abarenga 234 bose bagaragaza ko bifuza gukora mu Kigo Inyange Industries Ltd.

Iki gikorwa ngarukamwaka gitegurwa n’Umujyi wa Kigali ubinyujije mu Ishami ryawo rihuza abashaka akazi n’abagatanga.

Ku nshuro Gatandatu cyabaye kuri uyu wa Kane muri ‘Kigali Conference and Exhibition Village’ hasanzwe hazwi nka Camp Kigali, aho abitabiriye iki gikorwa bahujwe n’ibigo bitanga akazi 50.

Abenshi muri aba ni urubyiruko rwarangije amasomo ya kaminuza rukaba nta kazi rufite, icyakora hakaba n’abakiga kaminuza bifuza kubona aho bimenyereza mu biruhuko cyangwa bakahakora nk’abakorerabushake.

Umuyobozi wungirije w’Umujyi wa Kigali ushinzwe Imibereho myiza y’Abaturage, Muhongerwa Patricie, yavuze ko Job Net iheruka muri Gicurasi uyu mwaka abashakaga akazi bari 1219 nyuma biciye muri bo abantu 510 babonye akazi.

Bamwe muri bo babonye amahirwe yo kwimereza umwuga mu gihe abandi bakora nk’abakorerabushake.

Muhongerwa yabwiye abashakaga akazi ko ikigamijwe atari ukubafasha kubona aho bakora bakorera abandi gusa, ahubwo ko banifuza ko bagira ubumenyi buhagije bwo kwihangira imirimo.

Yagize ati “Buriya icyiza kiba ari ukwihangira imirimo kuko wikoresha ugaha abandi akazi bwa bushomeri bukagabanuka bityo igihugu kigatera imbere.”

Muhongerwa yavuze ariko no gusaba akazi cyangwa kumenya aho kari atari ikintu cyoroshye, akaba ari yo mpamvu Kigali Employment Service Centre iriho kugira ngo imenye ababifitiye ubushobozi ijye ibahuza n’abakoresha, inabafashe kumenya icyo bakora ngo babe babona akazi.

Babyiganiye gusaba gukorera Inyange Industries

Guhera saa mbili za mugitondo kugeza saa kumi n’imwe, abashaka akazi baganaga ahakorera ibigo 50 bitanga akazi bakabaza amakuru kuri byo bitewe n’icyo buri umwe muri bo yize cyangwa se yumva yakora.

Mu gihe hari ibigo byagaragaraho umuntu umwe ubaza amakuru cyangwa yewe nta n’umwe uretse abakozi babyo, byari uruvunganzoka ahari abakozi b’Uruganda rw’Ibiribwa n’Ibinyobwa rwa Inyange Industries, kuko abiyandikaga bagaragaza ko bifuza akazi muri urwo ruganda batonze umurongo kuva mu gitondo kugeza ubwo igikorwa kirangiye bamwe bataha batiyanditse.

Ku rutonde rw’abifuza akazi muri uru ruganda hariho abagera kuri 234.

Umuyobozi Ushinzwe Abakozi mu Kigo Inyange Industries Ltd, Mugisha Rwanguha James, yavuze ko kuba baganwe n’abashaka akazi ari ukubera igihe bamaze bakorera mu Rwanda kuva mu 1997. Gusa ngo nta myanya y’akazi iri muri iki kigo.

Ati “Twaje muri Job Net kugira ngo tugire abo twandika mu gihe wenda hazaba hari imyanya tuzaba twabatumaho dukurikije ibyo bize ndetse n’akazi kazaba gahari.”

Igikorwa cyasojwe abifuza gukora mu Inyange bakiri ku murongo bagera nko kuri 50.

Abantu 510 babonye akazi binyuze muri Job Net

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza