Abareganwa n’Umunyamakuru Phocas Ndayizera bahakanye ibyo baregwa: Uko iburanisha ryagenze

Yanditswe na Prudence Kwizera
Kuya 9 Nyakanga 2020 saa 10:37
Yasuwe :
0 0

Urugereko rwihariye rw’Urukiko Rukuru mu Rwanda ruburanisha ibyaha Mpuzamahanga n’ibyambukiranya imipaka, kuri uyu wa Kane tariki ya 9 Nyakanga 2020 rwasubukuye urubanza ruregwamo Umunyamakuru Phocas Ndayizera na bagenzi be.

Ni iburanisha ryabaye hifashishijwe uburyo bw’iyakure buzwi nka ‘Video Conference’ bwahuzaga impande ziburana kubera icyorezo COVID-19 cyugarije Isi. Abaregwa bose bari muri gereza ya Mageragere iri mu Mujyi wa Kigali.

Uko ari 13 bakurikiranyweho ibyaha by’iterabwoba bikubiye mu mugambi wo gukoresha ibiturika bagasenya inyubako za leta mu rwego rwo kwerekana ko igihugu kitarimo umutekano.

Ubushinjacyaha buvuga ko uyu mugambi abaregwa bateguraga wari ukuriwe na Cassien Ntamuhanga, uyu araburanishwa muri uru rubanza nk’uwatorotse ubutabera.

Mu iburanisha riheruka ku wa 9 Kamena 2020 hireguye batanu muri bo ku byaha byo kugambirira guhirika ubutegetsi. Ibyaha byose barabihakanye bavuga ko bahatiwe kubyemera.

Abo ni Byiringiro Gerno bakunze kwita Lingo; Bikorimana Bonheur; Bizimana alias Lazima; Munyensanga Martin alias Corbeau na Mushimiyimana Yves.

Mbere yo gutangira iburanisha kuri uyu wa Kane, ikoranabuhanga ryabanje kubatenguha n’umuriro ukajya ubura ku buryo byatumye iburanisha ritinda gutangira.

Uwabimburiye abandi kwiregura kuri uyu wa Kane ni Nshimirumuremyi Jean Claude Alias Kayima, yahakanye icyaha cy’ubwinjiracyaha cyo kugirira nabi ubutegetsi buriho avuga ko abeshyerwa kandi nta nama yitabiriye zo gucura umugambi wo kugirira nabi ubutegetsi.

Ku kijyanye n’ibyo ashinjwa ko yafatiwe i Nyagatare ashaka gutoroka, yavuze ko atigeze ashaka gutoroka kuko yafatiwe mu rugo iwe.

Ku cyaha aregwa cy’ubutasi bw’aho bari kuzatera ibisasu nacyo yagihakanye avuga ko atigeze abyemerera n’ubugenzacyaha. Yasobanuye ko uwitwa Patrick Niyihoza yamuhamagaye amubwira ko ashaka kumurangira akazi ariko ko azakamusobanurira nikaboneka. Yavuze ko nyuma yaho ngo yisanze afatwa n’inzego z’umutekano ashinjwa ibyaha atigeze agambirira gukora.

Umucamanza yamubajije ibyo yemereye ubugenzacyaha ko yari afite umugambi wo kujya mu gisirikare cy’umutwe urwanya u Rwanda ndetse no kuba baritabiriye inama ibitegura, arabihakana avuga ko nta na kimwe muri ibyo yigeze yemerera ubugenzacyaha.

Yasobanuye ko afatwa yahawe impapuro asinyaho abikoreshwa ku gahato abikora ku bwo kurengera ubuzima bwe.

Yabajijwe niba azi Ntamuhanga Cassien avuga ko atamuzi ariko yajyaga amwumva kuri Radio.

Yavuze ko mbere yo gufatwa yahamagawe na nimero ya telefone ya Patrick Niyihoza abwirwa ko akazi kabonetse, ageze i Jali aho yari asabwe ko bahurira ahasanga abantu bambaye imyenda ya gisivile bahita bamwambika amapingu bamupfuka no mu maso baramutwara. Icyo gihe ngo ntabwo yigeze abona Patrick Niyihoza.

Umucamanza yamubajije niba azi uburemere bw’ibyo avuga asubiza ko abizi kandi abihagazeho, asaba urukiko kumurenganura kuko ibyo ashinjwa ari ibinyoma yahimbiwe.
Nshimirumuremyi Jean Claude Alias Kayima yabwiye urukiko ko ibyo yavuze imbere y’ubushinjacyaha yari yabitegetswe ngo ashinje Patrick Niyihoza ko yashakaga kumujyana mu gisirikare.

Abajijwe icyo yongera ku byo yavuze, yagize ati “Icyo nongeraho ni ugusaba ko mwandenganura kuko ndengana.”

Rutaganda Bosco ni we wakurikiyeho yiregura ku cyaha cy’ubwinjiracyaha bwo kugirira nabi ubutegetsi buriho cyangwa kubuhirika hakoreshejwe intambara. Icyo cyaha yagihakanye avuga ko icyabaye ari uko yanditswe n’uwitwa Niyihoza Patrick amubwira ko ashaka kumurangira ikiraka kandi icyo kiraka atigeze amubwira icyo ari cyo.

Ku cyo ubushinjacyaha bumurega cyo gukangurirwa kujya mu mutwe wa gisirikare wa RNC ukuriwe na Faustin Kayumba Nyamwasa, yagihakanye avuga ko bitigeze bibaho.

Uyu musore uvuga ko yari umunyeshuri yisobanuye avuga ko yarinze asubira ku ishuri atarahabwa icyo kiraka cyangwa ngo abwirwe icyo ari cyo. Yavuze ko afatwa yakuwe ku ishuri ashinjwa ibyaha atigeze agambirira gukora.

Abajijwe niba yemera ibiri mu nyandiko yasinyiye imbere y’ubushinjacyaha yavuze ko yabihatiwe ategekwa kubyemera usibye imyirondoro ye n’aho yari ari.

Abajijwe ababimutegetse yavuze ko ari ‘abagabo babaga bambaye imyenda ya gisivile bafite imbunda’.

Abajijwe ku bantu barimo uwitwa Ukurikiwenimfura Théoneste alias Sergeant na Munyensanga Martin bavugwa ko bamuhamagaye yavuze ko bitigeze bibaho.

Abajijwe niba Ukurikiwenimfura Théoneste alias Sergeant amuzi yavuze ko yajyaga amubona ku mafoto ari muri telefone ya murumuna we ariko bataziranye. Naho kuri Munyensanga Martin yavuze ko amuzi nk’umuntu washatse umugore w’aho baturanye ariko atigeze avugana na we.

Yavuze ko mu bugenzacyaha yaterwaga ubwoba agasinyishwa ku ngufu naho mu bushinjacyaha hari ubwo yazaga kubazwa nijoro agategekwa gusinya inyandiko atabanje kuyisoma.

Abajijwe impamvu akeka yaba yaratumye aza gufatirwa ku ishuri, avuga ko ari uko uwitwa Niyihoza Patrick yamwanditse amwizeza ko azamurangira akazi. Uyu Niyihoza Patrick barafunganywe.

Rutaganda Bosco yabwiye urukiko ko ibikubiye mu nyandikomvugo yemereye mu bugenzacyaha yabihatiriwe ku gahato ndetse ageze no mu bushinjacyaha ategekwa kubyemera uko biri. Yavuze ko yahisemo kubyemera agamije kurengera ubuzima bwe kuko aho yari afungiwe atahazi kuko yahajyanwe apfutse amaso.

Yasobanuye ko kuba yaremereye mu rukiko ibyo aregwa ku ifungwa n’ifungurwa ry’agateganyo ari uko yabaga aherekejwe n’aba bantu bamufashe kandi bari baramuteye ubwoba ko natabyemera azagirirwa nabi.

Hakurikiyeho uwitwa Nshiragahinda Erneste na we yisobanura ku cyaha cy’ubwinjiracyaha bwo kugirira nabi ubutegetsi buriho, yagihakanye avuga ko icyo azi ari uko Niyihoza Patrick yamwanditse amwizeza ko azamurangira akazi.

Ku kijyanye n’inama ashinjwa kujyamo yo gucura umugambi wo guhirika ubutegetsi buriho yagihakanye avuga ko atigeze ayijyamo.

Urukiko rwamubajije niba ibikubiye mu nyandikomvugo yasinyiye imbere y’Ubushinjacyaha abyemera, avuga ko ibyanditsemo byiganjemo ibihimbano kuko yabisinyishijwe ku gahato.

Yasobanuye ko akazi yizezwaga kurangirwa yabwiwe kari ak’ubwubatsi ariko atari azi neza aho kazabera kuko atahabwiwe.

Yavuze ko ibyo ashinjwa ko yafatiwe i Rwamagana agiye i Nyagatare atorotse ashaka kujya muri Uganda, atari byo ahubwo yagiyeyo abibwiwe na Patrick Niyihoza kuko yari yamubwiye ko bahurirayo na ‘boss’ (umukoresha) ubaha akazi ko kubaka.

Akigera i Rwamagana ngo imodoka yarimo yarahagaritswe akurwamo yambikwa amapingu apfukwa mu maso ajya gufungirwa ahantu atazi mu gihe cy’iminsi 12 atareba hanze. Muri icyo gihe afunzwe ngo yazanirwaga impapuro agasinyishwa ku gahato atazi ibizanditsemo.

Umunyamakuru Phocas Ndayizera ufatwa nk’uwari uyoboye iryo tsinda mu mugambi wo gukora ibaha baregwa na we yamaze kwiregura ahakana ibyaha byose aregwa, avuga ko yabyemereye ubugenzacyaha kubera iyicarubozo yakorewe.

Ukurikiyimfura Théoneste ni we wakurikiyeho yiregura ku byaha birimo kujya mu nama no kugambirira kujya mu mutwe w’iterabwoba, avuga abeshyerwa ahubwo ko Patrick Niyihoza yamuhamagaye amubwira ko azamurangira akazi kandi ibijyanye no gutera ibisasu atabizi kuko nta byo yabwiwe.

Ku cyo kuba yaritabiriye inama zabahurizaga kuri WhatsApp zayoborwaga na Ntamuhanga Cassien, yagihakanye avuga ko bitigeze bibaho kandi uwo Ntamuhanga atamuzi usibye ko kera yamwumvaga kuri radio.

Ku nyandikomvugo yasinye ivuga ko yari azi ko agiye kujyanwa mu mutwe w’iterabwoba ugamije guhirika ubutegetsi bw’u Rwanda ndetse no kuba yaragiranye inama na Ntamuhanga Cassien kuri telefone, yabihakanye avuga ko atari byo. Yahakanye kandi ko yaba yarahawe ‘mission’ yo gukora ubutasi bw’ahazaterwa ibisasu avuga ko ntabyabayeho.

Yavuze ko ibikubiye mu nyandikomvugo imushinja ari ibihimbano kandi kuba yarabisinye ari uko yabanje guterwa ubwoba no gukorerwa iyicarubozo.

Yasabye ko ibikubiye munyandikomvugo zanditswe n’ubugenzacyaha ndetse n’ubushinjacyaha bitahabwa agaciro kuko ari ibinyoma, asaba ko hahabwa agaciro ubwiregure bwe akarenganurwa.

Kugaragaza ibimenyetso hifashishijwe ikoranabuhanga byakuruye impaka

Urukiko rumaze kumva ibisobanuro by’abaregwa, rwavuze ko hagiye gukurikiraho ubushinjacyaha bugaragaza ibimenyetso ku byaha bubashinja ariko bigaragara ko hari abireguye batunganiwe kuko ababunganira mu mategeko badahari, rusaba ubushinjacyaha n’abunganira abaregwa kugira icyo babivugaho.

Abunganira abaregwa bavuze ko urubanza rukwiye gukomeza ariko ubushinjacyaha buvuga ko bitashoboka kuko hari ibimenyetso birimo amajwi n’amashusho bushaka kugaragaraza imbonankubone impande zose zirikumwe mu cyumba kimwe.

Ubushinjacyaha bwavuze ko ibimenyetso bufite birimo amajwi n’amashusho bikwiye kugaragazwa ababuranyi bose bahari ndetse n’urukiko rukazumva, bityo hakwiye gushakwa umwanya impande zose zigahurira hamwe zikumva ayo majwi. Bwasobanuye ko kubikora batari hamwe bishobora kubangamira umwimerere w’urubanza.

Bwasabye ko bose bazahamagazwa mu rukiko imbonankubone bari mu cyumba kimwe bubahirije amabwiriza yo kwirinda COVID-19 ibyo bimenyetso bigasesengurwa bari kumwe.

Ubushinjacyaha bwagaragaje kandi ko uburyo bw’ikoranabuhanga buri gukoreshwa mu kuburanisha butari kugenda neza kubera ko mu majwi hari kuzamo ‘nyiramubande’ busaba ko hashakwa uko bahurizwa hamwe mu rukiko.

Abunganira abaregwa babibona ukundi

Uruhande rw’abunganira abaregwa rwo rwasabye ko ayo majwi n’amashusho bayagaragaza aka kanya akumvwa n’impande zose kugira ngo urubanza rukomeze.

Bavuze ko kujya gusaba ko ababurana bose bahurizwa mu rubanza bishobora gutinza urubanza kandi abaregwa bakeneye ko urubanza rwihutishwa bagahabwa ubutabera.

Bagaragaje kandi ko CD ziriho amajwi n’amashusho bo bazibonye ariko abaregwa batazibonye bityo bakwiye kubanza kuzibereka no kuzibumvisha kugira ngo zizasesengurwe bazizi.

Urukiko rumaze kumva uruhande rw’ubushinjacyaha n’urw’abunganira abaregwa, rwavuze ko rusanga uburyo bwo gusesengura ibimenyetso bari kumwe imbonankubone ari bwo bwiza kuko byafasha kwihutisha urubanza.

Urukiko rwavuze ko ibisabwa n’abunganira abaregwa bifite ishingira rutegeka ko abaregwa bagomba kubanza kwereaka ibyo bimenyetso by’amajwi n’amashusho bibashinja kugira ngo bizazanywe mu rukiko nabo babizi.

Uyoboye iburanisha yavuze ko umwanditsi w’urukiko aza kwandikira gereza ya Mageragere kugira ngo izabemerere kubyerekwa.

Urukiko rumaze kumva impande zombi rwanzuye ko urubanza ruzakomeza tariki ya 23 Nyakanga 2020.

Phocas Ndayizera na bagenzi be basubiye mu rukiko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .