Abarangije Kaminuza bemerewe gupiganira akazi no mu gihe impamyabumenyi zabo zitarakorwa

Yanditswe na Evariste Nsengimana
Kuya 11 Mutarama 2020 saa 09:55
Yasuwe :
0 0

Minisiteri y’Abakozi ba Leta n’Umurimo (Mifotara) yemereye abanyeshuri barangije Kaminuza n’amashuri makuru, kuzajya bapiganira imyanya y’imirimo yo mu nzego za Leta mu gihe bagitegereje ko impamyabumenyi zabo zikorwa.

Ingingo ya munani y’Iteka rya Perezida no 144/01 ryo ku wa 13/04/2017 rigena uburyo bwo gushaka, gushyiraho no gushyira mu myanya abakozi ba Leta, igena uburyo bwo gusaba akazi, iteganya ko umuntu ushaka akazi aha kopi y’indangamuntu cyangwa ikiyisimbura n’iy’impamyabumenyi urwego rushaka umukozi.

Gusa inshuro nyinshi abarangije amasomo ya kaminuza bakunze kugaragaza ko impamyabumenyi zabo zitinda kuboneka, bikabagiraho ingaruka kuko batabasha gusaba akazi nta mpamyabumenyi ishuri barangijemo rirabashyikiriza.

Nko mu minsi ishize hari abanyeshuri barangije mu mashami atandukanye ya Kaminuza y’u Rwanda batangiye kuvuga ko babangamiwe n’uko impamyabumenyi zabo zatinze kubageraho, kandi ko bibangamiye uburyo bwo gushaka akazi kuko bazisabwa.

Kaminuza y’u Rwanda (UR) yatangaje ko mu gihe abanyeshuri barangije mu 2019 bagitegereje impamyabumenyi zabo zizatangira kubageraho mu mpera za Mutarama 2020, igiye kuba ibahaye ibyangombwa byerekana ko barangije ibyiciro barangijemo, mu rwego rwo kutabangamirwa mu gupiganira akazi.

UR yongeyeho ko iri kuvugana na Minisiteri y’Umurimo, ikazabyemera mu gihe bapiganira akazi binyuze mu buryo bwashyizweho bwo kwerekana amashuri umuntu yize.

Ibaruwa Minisitiri w’Abakozi ba Leta n’Umurimo, Rwanyindo Kayirangwa Fanfan, yandikiye abayobozi b’Uturere bose ku wa 9 Mutarama 2020, ibamenyesha ko abarangije amashuri makuru na Kaminuza bagitegereje impamyabumenyi zabo bemerewe gukora ibizamini by’akazi mu myanya ya Leta bakagaragaza ibyangombwa bahawe na Kaminuza.

Iyo baruwa igira iti “Maze kubona ko hari abanyeshuri barangiza amasomo yabo mu mashuri makuru na Kaminuza ariko nyuma y’umuhango wo guhabwa impamyabumenyi [Graduation] ntizihite ziboneka bigatuma batagira uburenganzira bwo kwitabira amapiganwa y’akazi mu nzego za Leta kandi kutaboneka kw’izo mpamyabumenyi bitabaturutseho.”

“Mu rwego rwo gukemura icyo kibazo, ibyangombwa by’abakandida basaba akazi bahawe nyuma y’uwo muhango wo guhabwa impmyabumenyi bikaba bigaragaza ko basoje amasomo ‘To Whom it may concern’ byatanzwe na Kaminuza cyangwa amashuri makuru ariko bakaba bategereje ko izo mpamyabumenyi zisohoka, ndabamenyesha ko ibyo byangombwa bigomba guhabwa agaciro, bakajya bahabwa uburenganzira bwo gusaba akazi no kugahabwa mu gihe batsinze.”

Minisitiri Kayirangwa yavuze ko gusa icyo cyangombwa kitagomba kurenza amezi atandatu uhereye igihe umuhango wo kubahera impamyabumenyi [Graduation] wabereyeho.

Ati “Iyo ayo mezi atandatu arangiye nyirubwite atarasimbuza icyo cyangombwa impamyabumenyi nyirizina, afatwa nk’utayifite akaba atacyemerewe gukoresha icyo cyangombwa mu gusaba akazi ndetse uwaba yarashyizwe mu mwanya akawukurwamo.”

Bamwe mu banyeshuri barangije Kaminuza umwaka ushize bagitegereje kubona izo mpanyabumenyi baganiriye na IGIHE bavuze ko iki cyemezo Mifotra yafashe kije ari igisubizo ku kibazo bari bamaranye iminsi.

Iradukunda Désiré urangije mu Ishuri ry’Itangazamakuru n’Itumanaho muri Kaminuza y’u Rwanda yagize ati “Icyo bigiye kudufasha ni ukutworohereza cyane cyane ababonaga amahirwe y’akazi ariko bakabogamirwa no kubura ibyangombwa kuko bitari byaboneka, cyane cyane ko muri Leta hari aho ujya gusaba akazi bakakubwira ko ugomba kuba ufite impamyabumenyi wakuye muri kaminuza…Urumva benshi biraza kutworohera kubyaza umusaruro ahari amahirwe hose.”

Mugenzi we witwa Rukundo Irène, yavuze ko atigeze agerageze gusaba akazi ngo abangamirwe no kuba atarabona impamyabumenyi ariko hari bagenzi be baganiraga bakamubwira ko babuze uko basaba akazi kubera ko batazifite.

Ati “Nk’abantu turangije hari igihe ugira amahirwe ukabona ahantu usaba akazi, iyo ushyizeho icyemezo baduha ‘To Whom it may concern’ ntabwo bacyemera, urumva biba bigukupiye amahirwe yo kuba wabona ako kazi ariko niba bafashe umwanzuro w’uko twabyifashisha, ni inkuru nziza.”

UR igaragaza ko kimwe mu bitanga icyizere ko ikibazo cy’itinda ry’impamyabumenyi cyaba kigiye gukemuka ni uko ubu ziri gukorerwa mu Rwanda, aho kuba ku mugabane w’i Burayi nk’uko byagendaga.

Mu 2019 muri Kaminuza y’u Rwanda, harangije abanyeshuri 9 382 mu byiciro bitandukanye; barimo abagore 2 488 n’abagabo 5 894 bose bategereje Impamyabumenyi zabo.

Abakirangiza Kaminuza batarabona impamyabumenyi bemerewe gukoresha icyangombwa gitangwa n'ishuri mu gushaka akazi

evarist[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .