Abarangije amashuri abanza batangiye guhabwa ibyangombwa bibyemeza

Yanditswe na Mugabo Jean d’Amour
Kuya 28 Kanama 2018 saa 02:24
Yasuwe :
0 0

Ku nshuro ya mbere mu burezi bw’u Rwanda, abarangije amashuri abanza bahawe icyemezo cy’amashuri bize.

Ubwo yamurikaga diplôme za mbere zakorewe mu Rwanda kuri uyu wa Kabiri, Umuyobozi Mukuru w’Ikigo cy’Igihugu gishinzwe Uburezi (REB), Dr Ndayambaje Irenée yerekanye n’ibyangombwa bigenewe abarangije amashuri abanza mu 2017 bangana na 237,181.

Yagize ati “Ikindi kintu cy’ingenzi twashoboye gukora kitari kinasanzwe ni uko abana barangiza umwaka wa Gatandatu w’amashuri abanza twabageneye icyemezo.”

Dr Ndayambaje yavuze ko ko umuntu warangije amashuri abanza yakeneraga kwiga andi masomo cyangwa kujya hanze y’igihugu agasabwa icyemezo cy’amashuri yize ariko akagorwa no kukibona kuko byasabaga kugisaba muri REB.

Diplôme zimaze gukorerwa mu Rwanda zirimo 44,037 z’abarangije mu masomo y’ubumenyi rusange mu 2017 bari baturutse mu bigo cy’amashuri 763.

Hakozwe na diplôme 1,172 z’abakoze ibizamini hagati ya 2008 na 2015 batari bakazibonye.

Diplôme zikorerwa mu Rwanda ntizigaragaraho amafoto ya nyirayo nk’uko byari bimeze ku z’abarangije amashuri yisumbuye zatanzwe mu myaka yashize.

Dr Ndayambaje yavuze ko aya mafoto yatezaga urujijo kuko isura y’abantu igenda ihindagurika uko imyaka ihita bityo abantu bareba ifoto ntibemere ko ugaragaraho ari nyirayo.

Icyakora amafoto yashyizwe kuri diplôme 1,172 z’abarangije kera batari bakazibonye kugira ngo zibe zisa n’iz’abo bigiye mu gihe kimwe.

REB kandi yatangije uburyo bwo gusuzuma ko diplôme ari umwimerere binyuze mu gushyira nomero iyiranga ku rubuga rwa interinet ku buryo bizakumira abagerageza kuzigana.

Dr Ndayambaje yavuze ko ibyangombwa by’abarangije amashuri bitazongera gutinda nk’uko byajyaga bibaho bitewe no kujya kubikoreshereza i Burayi.

Yavuze ko Misiteri y’Uburezi yiyemeje ko diplôme zizajya zitangwa mu gihe kitarenze amezi atandatu kuva amanota atangajwe ariko intego ikaba ari uko iki gihe kigabanywa kikagera ku mezi atatu.

Dr Ndayambaje yavuze ko bitewe n’uko benshi barangiza amashuri abanza batarafata ibyangombwa bindi nk’indangamuntu ndetse bakagenda bahindura amazina, icyemezo cyabo kizajya kigaragaraho n’amazina y’ababyeyi babo kugira ngo byorohe kubamenya.

Abayobozi b'ibigo by'amashuri bashyikirijwe diplôme za mbere zakorewe mu Rwanda
Umuyobozi Mukuru w’Ikigo cy’Igihugu gishinzwe Uburezi (REB), Dr Ndayambaje Irenée yavuze ko n'abarangije amashuri abanza bazajya bahabwa ikibyemeza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza