Iki gikorwa cyateguwe n’ubuyobozi bw’Akarere ka Palma, kibera ku Ishuri ryisumbuye rya Palma mu rwego rwo kwizihiza Umunsi Mpuzamahanga ngarukamwaka w’Isuku. Cyahuje abaturage, abayobozi b’inzego z’ibanze, abafatanyabikorwa batandukanye ndetse n’inzego z’umutekano z’u Rwanda ziri muri ako gace.

Mu bikorwa byakozwe, abari bitabiriye iki gikorwa bakoranye isuku hirya no hino, hagamijwe kubungabunga ibidukikije no guteza imbere imibereho myiza y’abaturage.

Uretse ibikorwa by’isuku, Inzego z’umutekano z’u Rwanda zanatanze inkunga ku Ishuri ryisumbuye rya Palma, zirishyikiriza ibitabo ndetse n’ibikoresho by’imikino. Iyi nkunga igamije gufasha abanyeshuri mu myigire yabo no kubatera imbaraga mu bikorwa by’imikino.

Umuyobozi w’Akarere ka Palma, João Agostinho Buchili, yashimiye iki gikorwa, agaragaza ko ibikorwa byo guteza imbere isuku n’isukura bifite uruhare mu gukumira indwara no guteza imbere imibereho y’abaturage.

Yashimiye kandi Inzego z’umutekano z’u Rwanda ku nkunga zikomeje gutanga ku baturage bo muri ako gace ndetse n’umusanzu wazo mu bikorwa byo kubungabunga amahoro n’umutekano.

Iki gikorwa cyabaye mu gihe Inzego z’umutekano z’u Rwanda zikomeje ibikorwa by’ubufatanye n’abaturage bo muri Cabo Delgado, aho usibye inshingano z’umutekano, zinagira uruhare mu bikorwa bigamije guteza imbere imibereho y’abaturage.

Abapolisi n’abasirikare b’u Rwanda bakoze isuku rusange i Cabo Delgado

Iki gikorwa cyahuje abaturage, abayobozi b’inzego z’ibanze, abafatanyabikorwa batandukanye

Uretse ibikorwa by’isuku, Inzego z’umutekano z’u Rwanda zanatanze inkunga ku Ishuri ryisumbuye rya Palma