Nyuma y’aho Urusengero rw’Abadivantisiti Mu murenge wa Gahunga, Akarere ka Burera rugwiriye abakirisitu bane bagapfa, abandi 15 bagakomereka, abapasiteri bari bayoboye amasengesho batawe muri yombi.

Abacumbikiwe na Polisi ni Pasiteri Ngerero Thadee na Pasiteri Rwasangabo Nicolas warimo kwigisha ubwo rwagwiraga abakirisitu.

Umuvugizi wa Polisi y’Igihugu mu Ntara y’Amajyaruguru, yabwiye igihe ko bitumvikana ukuntu abakirisitu basengesherejwe mu rusengero rutuzuye, rukarinda iyo rubagwira, ati “ Twabaye tubacumbikiye mu rwego rw’iperereza...Hagomba kugira ababiryozwa.”

Iyi mpanuka yo ku Bunani bwa 2015 yahitanye Ngarambe Naphtal w’imyaka 64, Uwimana Pelagie ufite 24 wari unatwite, Tumukunde Zawadi w’imyaka 9 na Umubyeyi Devocatie w’imyaka 5.

Muri aka Karere ka Burera no mu mwaka wa 2013 kabayemo indi mpanuka urusengero rwaguye mu murenge wa Cyeru rwica abantu batandatu.

[email protected]