00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri ba Kaminuza y’u Rwanda mu gihirahiro cy’imyaka itatu bategereje mudasobwa basinyiye

Yanditswe na Prudence Kwizera
Kuya 12 July 2022 saa 08:22
Yasuwe :

Abanyeshuri biga muri Kaminuza y’u Rwanda binubira ko bamaze imyaka itatu badahabwa mudasobwa zigendanwa kandi barazisinyiye bikaba bituma batiga neza nk’uko babyifuza.

Ubusanzwe mu masezerano abanyeshuri ba Kaminuza y’u Rwanda basinyana na Banki y’Amajyambere y’u Rwanda (BRD) yo guhabwa inguzanyo y’amafaranga yo kwiga kaminuza harimo ko buri munyeshuri ahabwa mudasobwa igendanwa.

Kugeza ubu imyaka itatu irashize abanyeshuri batazihabwa ndetse bavuga ko n’iyo bageragaje kubaza badahabwa igisubizo kibanyuze.

Abaganiriye na IGIHE bagaragaje impungenge batewe n’uko bakomeje kwiga nabi no gukora imikoro isaba mudasobwa bikaba bikomeje kubagiraho ingaruka mbi.

Ikindi kibateye impungenge ni uko bashobora kurangiza kwiga kaminuza izo mudasobwa batazihawe ariko bakazazishyuzwa mu nguzanyo bahawe kuko bamaze kuzisinyira.

Nayituriki Elie wiga muri Kaminuza y’u Rwanda, Ishami rya Huye yavuze ko agorwa no gukora ubushakashatsi n’imikoro yo mu ishuri bitewe n’uko nta mudasobwa agira.

Ati “Ngerageza gukoresha telefone ariko biragoye; mu minsi mike turitegura kwandika ibitabo ariko nta mashini dufite. Ingaruka ya mbere bitugiraho ni ukwiga nabi no gutsindwa kuko imikoro baduha hari igihe tuyitanga itarangiye bitewe n’uko twayikoze nabi.”

Mugenzi we witwa Iyakaremye Deogratias yasabye ko amasezerano basinye yakubahirizwa.

Ati “Turasaba ko batwumva bakabyihutisha kuko biri kutugiraho ingaruka mbi mu myigire kandi twasinye amasezerano ariko tugiye kurangiza kwiga izo mudasobwa tutazibonye kandi ayo mafaranga ntabwo bazayakataho.”

Shema Olivier na we yavuze ko iyo bagerageje kubaza Ubuyobozi bwa Kaminuza y’u Rwanda badahabwa igisubizo kibanyuze.

Ati “Icyifuzo ni uko baduha igisubizo kizima batubwire ngo mudasobwa muzazihabwa iki gihe naho ibyo batubwira ngo byararangiye ntabwo byumvikana.”

Kaminuza y’u Rwanda ntizi neza igihe ikibazo kizakemukira

Ubwo muri Kaminuza y’u Rwanda Ishami rya Huye haberaga ibiganiro bigamije kwigisha urubyiruko gahunda ya Ndi Umunyarwanda, bamwe mu banyeshuri bahawe umwanya wo kubaza ibibazo no gutanga ibitekerezo. Mu byo bagaragaje bibangamiye imyigire yabo harimo icya mudasobwa batahawe.

Umuyobozi Mukuru wungirije ushinzwe Igenamigambi muri Kaminuza y’u Rwanda, Dr Musafiri Papias Malimba, yavuze ko ikibazo cyabo gifite ishingiro.

Yavuze ko kugeza ubu bafite ikibazo cya mudasobwa zo guha abanyeshuri kuko ubwo basinyanaga amasezerano na BRD, Uruganda rwa Positivo rukora mudasobwa rwari rufitanye amasezerano na Leta y’u Rwanda yo kuziha abanyeshuri ariko kuri ubu yarangiye.

Ati “Ayo masezerano yararangiye ntiyasubirwamo kubera ibindi bibazo byari bihari mu mashini za positivo kandi biturutse muri bagenzi banyu bagaragaje ko zifite ibibazo.”

Yakomeje avuga ko Leta yahise itekereza ubundi buryo abanyeshuri ba Kaminuza y’u Rwanda bashakirwa mudasobwa zimeze neza kandi bikaba mu buryo burambye.

Ati “Hariho rero itsinda rigizwe na Minisiteri y’Uburezi ni yo iriyobora ariko na Kaminuza y’u Rwanda turirimo nk’abagenerwabikorwa duhagarariye abanyeshuri, ndetse namwe mwabitanzeho ibitekerezo biciye mu buyobozi bwanyu. Iryo tsinda noneho ubu rigeze ku cyiciro cyo kuvugana n’abatanga mudasobwa kugira ngo bazazizane.”

Dr Malimba yavuze ko kuba byaratinze byatewe n’ingaruka z’icyorezo cya Covid-19 cyakomye mu nkokora ubucuruzi ku Isi.

Yavuze ko kuri ubu hari gushakwa aho izo mudasobwa zizava ku giciro cyiza, hakaboneka izihagije kandi zidafite ibibazo nk’ibyagaragaye ku zatanzwe mbere za Positivo.

Dr Malimba yabwiye abanyeshuri ba Kaminuza y’u Rwanda ko hagikorwa inyigo bityo bitazwi neza igihe ikibazo kizakemukira.

Ati “Iyo rero ni inyigo igikorwa ariko mu by’ukuri ntabwo nababwira ngo iratanga igusubizo mu cyumweru gitaha cyangwa mu kwezi gutaha.”

Yemera ko umunyeshuri wese agomba kwiga neza akigira ahantu heza afite n’ibikoresho bibimufashamo ariko imbogamizi zitabura.

Yavuze ko bafite gahunda yo guteza imbere kwiga hakoreshejwe ikoranabuhanga kandi bitashoboka badafite ubumenyi ku ikoranabuhanga, ibikoresho by’ikoranabuhanga na internet.

Intore ntikwiye kuganya

Dr Malimba yabwiye abanyeshuri ko agendeye ku kiganiro cyatanzwe, mu itorero bigishwa ko ntawe ukwiye guheranwa n’ikibazo ngo ananirwe kwishakamo ibisubizo.

Ati “Ubundi mu ndangagaciro z’Itorero batwigisha iki? Batwigisha ko iyo uri intore nziza ntubana n’ikibazo ugaheranwa na cyo. Ugomba kureba uburyo ugisohokamo kandi ukagera ku kigamijwe n’ubwo mu by’ukuri ya mbogamizi wahuye na yo.”

Yakomeje agira avuga ko nk’umuco w’ubutore hari inzira ebyiri bagerageza gukora nka kaminuza ariko n’abanyeshuri na bo bakwiye kubigiramo uruhare. Icya mbere ni ukubashyiriraho murandasi noneho bagakoresha telefone zabo [Smart phones] naho iya kabiri ni ukujya bakoresha mudasobwa za kaminuza.

Yavuze ko bagiye kureba uburyo ahari mudasobwa za kaminuza hajya hafungurwa amasaha menshi kugira ngo abanyeshuri bazikeneye bazikoreshe, izapfuye zikorwe kandi bakwirakwize murandasi mu nyubako zose zirimo n’aho barara.

Gusa Dr Malimba ntacyo yavuze ku bafite impungenge z’uko bashobora kuzarangiza kwiga badahawe izo mudasobwa, bakazazishyuzwa kandi batarazihawe kuko bazisinyiye.

Abanyeshuri biga muri Kaminuza y’u Rwanda bagaragaje ko kudahabwa mudasobwa basinyiye bikomeje kugira ingaruka mbi ku myigire yabo
Umuyobozi Mukuru wungirije ushinzwe Igenamigambi muri Kaminuza y’u Rwanda, Dr Musafiri Papias Malimba, yavuze ko ikibazo cyabo gifite ishingiro kandi kiri kwigwaho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .