Ni amahugurwa yasojwe ku wa 12 Kamena 2026 muri RP Kigali. Uru rubyiruko rwerekanye imishinga rwakoze rwifashishije ubumenyi rwakuye mu mahugurwa yo gukora amakarita y’ikoranabuhanga no kuyakoresha ibizwi nka ‘Digital Mapping and Geospatial Skills’.

Aya mahugurwa yatanzwe n’ikigo kigamije guteza imbere ibijyanye n’amakarita y’ikoranabuhanga n’amakuru ajyanye nayo, Eco Mappers OSM Rwanda, ku bufatanye na Urugaga Nyarwanda rw’Abikorera, mu Rwego rw’Ikoranabuhanga (ICT Chamber), ndetse na International Labour Organization (ILO) ku nkunga ya na Luxembourg Aid & Development, hagamijwe kugabanya ubushomeri mu rubyiriko ndetse no kongera ubumenyi mu ikoranabuhanga.

Aya mahugurwa y’amezi atandatu yateguwe mu rwego rwo guha urubyiruko ubumenyi bukenewe ku isoko ry’umurimo mu nzego zirimo gukora amakarita y’ikoranabuhanga, igenamigambi ry’imijyi no gusesengura amakuru ajyanye n’ahantu n’uduce twaho.

Umuyobozi Mukuru wa ICT Chamber, Alex Ntale yagaragaje ko ikoranabuhanga mu bijyanye no gukoresha amakarita ari rumwe mu nzego ziri gukura ndetse zikeneye kwitabwaho.

Ati “Ikoranabuhanga rishingiye ku makuru y’ahantu ni rumwe mu nzego ziri gukura vuba cyane, ariko akenshi zititabwaho uko bikwiye. Buri wese mu Rwanda akoresha porogaramu cyangwa ibisubizo bishingiye ku hantu umuntu aherereye, kandi imikoreshereze yabyo igenda yiyongera buri munsi.”

Muri aya amahugurwa abanyeshuri bahawe ubumenyi mu gukoresha ikoranabuhanga rya GIS (Geographic Information Systems) mu gukora amakarita y’ikoranabuhanga, gusesengura amakuru ajyanye n’imiterere y’imijyi n’ibindi.

Aya mahugurwa ntiyongereye gusa ubushobozi abayitabiriye, kuko yanabafunguriye inzira zo kubona amahirwe y’imenyerezamwuga n’akazi mu nzego za leta, iz’abikorera n’imiryango itandukanye.

Umuyobozi Mukuru wa EcoMappers, Rebecca Jeannette Nyinawumuntu, yagaragaje ko haguwe abanyeshuri 40 baturutse mu nzego zitandukanye zirimo abakora ibijyanye n’igenamigambi ry’imijyi (urban planning), ubuhinzi, ubucukuzi bw’amabuye y’agaciro, imari, ubuzima no gukusanya amakuru (data collection).

Ati “Rwari urugendo rwo gukora cyane ndetse no kwiyemeza. Nshimishijwe n’uko abahuguwe bose bazabona ubufasha butandukanye mu bigo bitandukanye ndetse yewe bamwe batangiye kubona imirimo kandi bari gukora neza imirimo bashinzwe ijyanye n’ibyo bize.”

International Labour Organization (ILO) yagaragaje ko gushyigikira iyo gahunda byari mu murongo w’intego zayo zo guteza imbere umurimo no kwagura amahirwe yo kubona imirimo ku rubyiruko.

Umuyobozi muri Ambasade ya Luxembourg mu Rwanda, Charlotte Helminger, yagaragaje ko gushyigikira iyi gahunda biri mu gahunda yabo ngari ya Innovate4DigiJobs Initiative igamije guha urubyiruko ubumenyi bukenewe mu mirimo y’ikoranabuhanga.

Ati “Ambasade ya Luxembourg yishimiye gushyigikira EcoMappers. Iyi ni imwe mu musaruro wa mbere ugaragara wavuye mu batsinze irushanwa rya Innovate4DigiJobs Challenge, twafatanyije na ILO.”

Umwe mu banyeshuri basoje aya mahugurwa, Faustin Nsengiyumva yavuze ko aya mahugurwa yamufashije kongera ubumenyi kubyo yize.

Ati “Muri kaminuza nize kuhira, ariko nari nkeneye ubumenyi ku bijyanye no gukoresha amakuru y’ahantu no kuyasesengura kugira ngo noze umushinga wanjye. Ibice bitandukanye bigira ikirere gitandukanye, ubu umushinga wanjye ushobora kubanza kugenzura ubushyuhe n’ikirere mbere y’uko duhitamo ibihingwa byo gutera.”

Ibirori byo gusoza aya mahugurwa byitabiriwe n’abahagarariye inzego za leta, abafatanyabikorwa batandukanye, abikorera ndetse n’abari mu rwego rw’ikoranabuhanga.

Umuyobozi Mukuru wa ICT Chamber, Alex Ntale yagaragaje ko ikoranabuhanga mu bijyanye no gukoresha amakarita ari rumwe mu nzego ziri gukura ndetse zikeneye kwitabwaho

Umuyobozi muri Ambasade ya Luxembourg mu Rwanda, Charlotte Helminger, yagaragaje ko gushyigikira iyi gahunda biri mu gahunda yabo ngari ya Innovate4DigiJobs Initiative igamije guha urubyiruko ubumenyi bukenewe mu mirimo y’ikoranabuhanga

Aba banyeshuri 40 ni bo basoje amasomo ya ‘geospatial’