00:00:00 IGIHE NETWORK KN KINYARWANDA EN ENGLISH FR FRANCAIS

Abanye-Congo bigaragambirije ku mipaka, bashaka kwinjira mu Rwanda ku ngufu

Yanditswe na Ntabareshya Jean de Dieu
Kuya 2 June 2022 saa 08:22
Yasuwe :

Abaturage bo muri Repubulika Iharanira Demokarasi ya Congo mu Mujyi wa Bukavu bigaragambije ku mipaka ya Rusizi I na Rusizi II basaba ko iki gihugu cyafunga imipaka yose igihuza n’u Rwanda by’umwihariko iyo mu Karere ka Rusizi.

Iyi mipaka yombi ikoreshwa n’Abanyarwanda bajya gukora ubucuruzi bwambukiranya imipaka muri Repubulika Iharanira Demokarasi ya Congo mu Mujyi wa Bukavu banyuze i Kadutu, ndetse n’Abanye-Congo by’umwihariko abava muri Uvila berekeza i Bukavu cyangwa abava Bukavu bagana Uvila.

Ku wa 1 Kamena 2022, Abanye-Congo biraye ku mipaka yombi bigaragambya mu mvugo zuje kugaragaza ko u Rwanda rufite uruhare mu biri kubera mu Majyaruguru y’iki gihugu aho ingabo za Leta, FARDC, zifatanyije na FDRL ziri kurwanira n’inyeshyamba za M23.

Aba baturage nubwo bigaragambirizaga ku butaka bwa Congo cyane ko ibihugu byombi bitandukanywa n’umugezi wa Rusizi, bagaragazaga umujinya n’urwango rukomeye bafiteye u Rwanda aho bumvikanaga mu mvugo z’uko ngo bashaka guhangana n’u Rwanda.

Ni imyigaragambyo bivugwa ko yahereye ahitwa Nyawera berekeza kwa Guverineri wa Bukavu ndetse bagera n’ahitwa Muramba mu gihe abandi bari bari ku mipaka ihuza u Rwanda na RDC.

Iki gikorwa cyitabiriwe n’abatwara abagenzi kuri moto, imodoka n’abagendaga n’amaguru aho bagaragaza ko bifuza kwambuka bagahangana n’u Rwanda ngo kuko rukomeje kugira uruhare mu biri kubera mu Burasirazuba bw’iki gihugu.

Abitabiriye iyo myigaragambyo basabye ubutegetsi bw’igihugu cyabo gufunga imipaka yose igihuza n’u Rwanda no gucana umubano uwo ari wo wose cyari gifitanye narwo cyane ko ari igihugu ngo cyigenga, gifite ubusugire bwacyo kandi budakwiye kuvongerwa.

Nubwo bimeze bityo ariko Abanye-Congo bakunze gukoresha iyi mipaka mu bikorwa by’ubushabitsi bwa buri munsi bushingiye ku biribwa birimo imbuto, inyama, amagi, amatungo magufi n’ibindi.

Umunyamabanga Nshingwabikorwa w’Umurenge wa Mururu, Ingabire Joyeux, yavuze ko nubwo aba banye-congo bigaragambije bitabujije abambuka gukomeza ingendo zabo ku mpande zombi.

Ati “Nibyo koko bigaragambije, ariko babikoreye ku ruhande rwa Congo ntabwo bigeze bagera mu Rwanda kandi nta n’umuntu wacu turamenya waba wabigiriyemo ikibazo.”

Meya w’Akarere ka Rusizi, Dr Kibirigi Anicet, yabwiye IGIHE ko nyuma yo kubona iyo myigaragambyo, Abanyarwanda basabwa kwitondera kwerekeza muri iki gihugu bakabanza kumenya niba umwuka mubi wahosheje.

Amakuru IGIHE yamenye ni uko mu Karere ka Rusizi hahise haterana inama y’umutekano igamije kurebera hamwe ibyo bikorwa by’abaturage b’Abanye-Congo bishobora gukura umutima Abanyarwanda.

Abigaragambyaga bari bitwaje ibyapa biriho Putin bamusaba ngo abatabare
Abanye-Congo bigaragambirije ku mupaka igihugu cyabo gihana n'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .