Abanyarwanda ibihumbi 200 bamaze kwizigamira miliyari 2Frw mu kigega ‘Ejo Heza’

Yanditswe na Habimana James
Kuya 23 Gicurasi 2020 saa 09:57
Yasuwe :
0 0

Minisiteri y’Imari n’Igenamigambi, yatangaje ko abanyarwanda bagera ku bihumbi 200, ari bo bamaze kwizigamira amafaranga yabo mu kigega Ejo Heza.

Minisitiri w’Imari n’Igenamigambi, Dr Uzziel Ndagijimana, yatangaje ibi ubwo yagezaga ku nteko Ishinga Amategeko, imitwe yombi, imbanzirizamushinga y’ingengo y’imari izakoreshwa mu mwaka wa 2020/2021.

Mu 2018 nibwo Guverinoma y’u Rwanda yatangije ubwizigame bw’igihe kirekire bwiswe ‘Ejo Heza’ buri mu cyerekezo cy’igihugu cyo kwihutisha iterambere.

‘Ejo Heza’ ni gahunda y’igihe kirekire iha buri Munyarwanda wese uko amikoro ye angana, uburyo bwo kwizigamira bworoshye buzamugirira akamaro.

Ndagijimana yagize ati “Abantu hafi ibihumbi 400 bamaze kwiyandikisha muri Ejo Heza naho abandi ibihumbi 200 bamaze gutangamo umusanzu wabo wa miliyari ebyiri z’amanyarwanda.”

Depite Marie Therese Murekatete yashimiye iki gikorwa, ariko asaba ko hakomeza gushyirwamo ingufu kugira ngo abanyarwanda bakomeze kwitabira iki kigega bashyiramo amafaranga.

Depite Mutesi Anitha we avuga ko hakwiye kumenyekana niba hari uburyo burambye, burimo no kuba kwizigamira muri iki kigega byaba itegeko, cyane cyane ku babona amafaranga bavanye mu bucuruzi buto.

Yagize ati “Umuco wo kuzigama mu Rwanda uracyari hasi, ariko biramutse bibaye itegeko ku buryo haba amafaranga make avanwa ku mushahara ukabikwa muri iki kigega, hari icyo byafasha.”

Minisitiri Ndagijimana avuga ko ibyo biganiro byakozwe ariko nta cyemezo kirabifatwaho.

Ati “Kugeza ubu abantu bashishikarizwa ku bitsamo ku bushake, ariko ibiganiro bizakomeza harebwa niba abantu bahembwa bafashwa kugera ku rwego rwiza rwo kwizigamira.”

Imibare igaragaza ko 8% by’abantu bagera kuri miliyoni 5.4 bari mu myaka yo gukora, aribo bashobora kwizigamira.

Abenshi muri aba usanga bakora mu bigo bya leta, cyangwa bakaba bafite amasezerano mu bigo byigenga.

Abandi bagera kuri 92% usanga bakora ahantu hatandukanye barimo abamotari, abashoferi, abahinzi n’abandi aba bo bakaba batagaragaramo.

Minisitiri Ndagijimana avuga ko gahunda ihari ni uko abanyarwanda bagera kuri miliyoni ebyiri aribo bazaba bamaze kwizigamira mu myaka itanu, bakazaba bamaze kuzigamira miliyari 195 Frw.

Gufungura konti muri ‘Ejo Heza’ bikorerwa kuri telefoni. Umuntu akanda *506# ku mirongo ya MTN na Airtel &Tigo.

U Rwanda rufite kandi intego yo kuzamura ubukungu bwarwo bukava ku rwego rw’ibihugu bikennye rukagera mu biyingayinga ibikize mu 2035 no kugera mu bikize mu cyerekezo cya 2050.

Ubwizigame fatizo ku bari mu cyiciro cya mbere n’icya kabiri ni ibihumbi 15 Frw ku mwaka, abo mu cya gatatu ni ibihumbi 18 Frw ku mwaka ariko n’utayagezeho ntabuzwa kuzigama, abo mu cya kane ni ibihumbi 72 Frw, kandi umuntu yihitiramo uko azajya ayatanga.

Minisitiri Ndagijimana avuga ko abanyarwanda bamaze gutanga imisanzu muri Ejo Heza ari ibihumbi 200

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .