Abanyarwanda basabwe gufata ingamba zabafasha kwirinda ibiza

Yanditswe na Twarabanye Venuste
Kuya 15 Ukwakira 2019 saa 10:37
Yasuwe :
0 0

Minisiteri y’ibikorwa by’ubutabazi (Minema) yasabye inzego zitandukanye zirimo, izifata ibyemezo, abafatanyabikorwa n’abaturage muri rusange, gufatanya gukumira no kurwanya ibiza bikomeza kwibasira igihugu.

Minema igaragaza ko kuva muri Mutarama kugeza mu mpera za Nzeri 2019, abantu 70 bahitanywe n’ibiza, abagera ku 177 barakomereka naho amatungo 267 arapfa. Mu minsi ine ishize kandi abantu batanu bishwe n’imvura nyinshi n’umuyaga.

Kuri uyu wa Kabiri iyi minisiteri yakoranyije inama nyunguranabitekerezo yitabiriwe n’abafatanyabikorwabatandukanye, haganirwa ku ngamba zo kwirinda no kurwanya n’ibiza.

Mu ngamba zagarutsweho harimo imikoreshereze inoze y’ubutaka, kubahiriza ibishushanyo mbonera, kunoza imiturire no kwirinda ihumana ry’ikirere.

Mu mikoreshereze y’ubutaka n’imiturire, abantu basabwa kubahiriza icyo ubutaka bwagenewe, uwubaka akubaka ahabigenewe, uhinga agahinga ahagenewe guhingwa kandi agakurikiza inama zitangwa n’urwego rubishinzwe.

Minisitiri ushinzwe ibikorwa by’ubutabazi, Kamayirese Germaine yatangaje ko ibiza byibasira Abanyarwanda ahanini usanga biterwa n’ubwirinzi budahagije, asaba inzego zose gufatanya gushaka umuti w’icyo kibazo.

Ati “Mu Rwanda iyo turebye ibiza byinshi tugenda duhura nabyo n’ingaruka bitera, ubona ko haburamo ubwirinzi. Haraburamo ubwirinzi yaba mu bikorwa by’abantu ku giti cyabo, inzu bubaka, ariko n’ibindi bikorwa binini by’igihugu, ibikorwaremezo bindi bini nabyo, bikeneye kubakwa ku buryo bibasha guhangana n’ibiza bigenda bitera Isi.”

Yavuze ko iyo nama yitabiriwe n’abarimu muri Kaminuza, abashakashatsi n’abandi bahanga, yitezweho kuba umusemburo wo gutekereza ku nzira yo kugera ku bisubizo birambye.

Kaminuza y’Abalayiki b’Abadivantisite (UNILAK) ifite isomo ryo kurwanya ibiza mu, itangaza ko ibyo ikora ibihera ku bushakashatsi kandi ikora ibishoboka byose ngo bigere no ku baturage.

Umuyobozi wa UNILAK, Dr. Jean Ngamije, avuga ko nyuma yo gukora ubushakashatsi bareba n’uko ibyabuvuyemo bigera ku baturage kugira ngo bamenye uko bitwara.

Ati “Dukora ubushakashatsi, ariko nubundi dufite no kwegera abaturage, kugira ngo tubigishe uko bahangana na byo. Ibiza bimaze kuba byinshi, gaz mu gihugu irimo iratwika abantu, ibyo byose rero biri muri gahunda zacu kugira ngo dukore ubushakashatsi, ariko noneho tubugeze ku bantu benshi bashoboka.”

Umunyamabanga Mukuru wa komisiyo y’ishami ry’umuryango w’abibumbye ryita ku burezi mu Rwanda (UNESCO-CNRU) Mutesa Albert, yacyeje icyemezo cy’u Rwanda cyo guhamagarira inzego zose gufatanya kuko aribyo bizatanga umusaruro.

Ati “Hagomba ubufatanye bw’abantu bose, kuko leta ishyiraho politiki ariko ntabwo ari na yo izayishyira mu bikorwa, na wa mugenerwabikorwa ari we muturage aba agomba kubigiramo uruhare.”

Minema igira abatuye mu manegeka inama zo kuhimuka mu bihe by’imvura nyinshi n’umuyaga nk’iri kugwa muri iyi minsi.

Ibindi byangijwe n’ibiza kuva uyu mwaka watangira ni inzu 4095 zasenyutse, imyaka ihinze kuri ha 6.708, ibyumba by’amashuri 163 imihanda itandatu, insengero 49 n’ibiraro 11.

Minema yahurije inzego zitandukanye mu biganiro ku gukumira ibiza
Abanyarwanda basabwe gufata ingamba ku biza bikomeje guhitana ubuzima
Minisitiri Kamayirese yasabye Abanyarwanda kwitwararika ku biza biterwa n'imvura
Abitabiriye iyi nama bafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza