Abanyarwanda bakuru baba mu mahanga basabye kujyanwa mu itorero ry’igihugu

Yanditswe na Nkurunziza Ferdinand
Kuya 24 Ukuboza 2019 saa 12:41
Yasuwe :
0 0

Bamwe mu banyarwanda baba mu mahanga, basabye Sena y’u Rwanda kubakorera ubuvugizi bagahabwa amahirwe yo gutorezwa mu Itorero ry’igihugu nubwo barengeje imyaka 35, ari yo ntarengwa yemerera umuntu kujya mu Itorero.

Niyibizi Edson, umwe mu bafite iki cyifuzo avuga ko batifuza gusaza bitwa intore zitoje, nyamara hari uburyo bw’Itorero ry’igihugu buteganya inyigisho ziboneye basanga zabafasha kubaho mu buzima bw’umunyarwanda nyawe.

Niyibizi waje mu nama y’umushyikirano ya 17 yasojwe mu cyumweru gishize; yaje ahagarariye abanyarwanda baba muri Afurika y’Epfo, aho amaze imyaka 29. Avuga ko ikifuzo cye agisangiye n’abandi banyarwanda batari bake baba mu mahanga, bose bavuga ko bifuza gutozwa indangagaciro za Kinyarwanda binyuze mu Itorero.

Ati “Hari abantu bari kwerekeza mu zabukuru, kandi bataratojwe, mwareba ukuntu mudukorera ubuvugizi, naho twazajya nyuma y’ubu buzima, tukajyana indangagaciro zirenze izo dufite z’uko twatojwe n’abatoza, tutari abatoza bitoje.”

Icyifuzo cya Niyibizi, Sena ivuga ko izaganira n’inzego bireba bagakora ubuvugizi.

Nubwo hatangwa icyizere ko abarengeje imyaka iteganywa n’itegeko bazashakirwa igihe cyabo cyihariye, hanagaragazwa inzitizi zirimo ko abarengeje imyaka 35 batatorezwa hamwe n’abakiri bato, ndetse n’umwanya wabo ukaba ari muto ahanini bitewe n’inshingano baba bafite.

Itorero ry’igihugu ryashyizweho mu rwego rwo kurushaho gutoza no kwigisha Abanyarwanda gukunda igihugu, kukiyobora neza, guharanira ubutwari, kwanga ubuhemu, gufatanya gukemura ibibazo no kwirinda ubutsimbanyi ariko byose bishingiye kuri kirazira n’indangagaciro z’umuco nyarwanda.

Zimwe mu ndangagaciro zigabwa abari mu itorero harimo; ubumwe, ubutwari, ubwitange, gukunda umurimo, kubaha no kumvira, kwanga umugayo, kubana neza na bose nta vangura, n’ibindi.

Abantu bemezaga ko umuntu wabaga ataranyuze mu Itorero yabaga afite byinshi atandukaniyeho n’Intore, cyane cyane mu rwego rw’imyumvire, imitekerereze, imyifatire, imyitwarire, imivugire n’imigenzereze, ikinyabupfura, n’ibindi.

Nyuma y’aho Jenoside yakorewe Abatutsi ihagarikiwe, inzego z’abayobozi zimaze gusesengura icyateye amahano yari amaze kugwirira u Rwanda, zimaze no kwitegereza ingaruka zatewe na Jenoside yakorewe abatutsi mu 1994, bamaze kandi no kongera gutekereza ku byiza byariho mbere y’uko Itorero ry’Igihugu risenywa, nibwo batekereje gusubizaho Itorero ry’Igihugu.

Byari ukugira ngo ryongere rirerere abanyarwanda, ribubakemo za ndangagaciro na kirazira z’umuco nyarwanda zatumye abakurambere bubahana, bagasobeka ubumwe, bakabana mu mahoro bakihesha ishema, icyubahiro n’igitinyiro.

Kuwa 12 Ugushyingo 2007 nibwo inama y’abaminisitiri yafashe icyemezo cyo gusubizaho Itorero ry’Igihugu, maze kuwa 16 Ugushyingo 2007, Perezida wa Repubulika Paul Kagame atangiza itorero ry’igihugu ku mugaragaro, imbere y’imitwe yombi y’Inteko Ishinga amategeko.

Niyibizi Edson, uvuga ko batifuza gusaza bitwa intore zitoje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza