Abanyarwanda bafite amashanyarazi biyongereyeho hafi 12% mu mwaka umwe

Yanditswe na Mugabo Jean d’Amour
Kuya 11 Nzeri 2018 saa 06:47
Yasuwe :
0 0

Guverinoma y’u Rwanda ikomeje guteza imbere inzego zitandukanye hitabwa cyane ku bikorwaremezo, by’umwihariko urwego rw’ingufu rukaba mu ziri ku isonga mu gutera imbere mu buryo bwihuta.

Urwego rw’ingufu rufite uruhare rukomeye mu iterambere ry’ubukungu n’imibereho myiza y’abaturage kuko ahageze amashanyarazi havuka ibikorwa bibyara inyungu ndetse na serivise zitandukanye harimo iz’ubuvuzi, uburezi n’izindi nyinshi zigatangwa neza.

Kuri ubu, imibare y’abagezwaho umuriro urazamuka byihuse kuko ubu Abanyarwanda bafite umuriro barabarirwa ku ijanisha risaga 46,46%.

Ni mu gihe bari 34,5% muri Kamena 2017, bivuze ko hiyongereyeho hafi 12% mu mwaka umwe gusa mu gihe mu myaka irindwi yabanje ingo zifite umuriro zari ziyongereyeho 23,7% zivuye ku 10,8% mu 2010.

Mu gihe intego za Guverinoma ari ukugeza umuriro ku Banyarwanda bose bitarenze mu 2024, uyu muvuduko wa 12% ukomeje, byazatwara imyaka ine n’igice gusa uhereye ubu.

Nk’uko imibare ya Sosiyete y’u Rwanda Ishinzwe Ingufu (REG) ibigaragaza, muri 46,46% bafite umuriro, 35.13% bakoresha umuriro ufatiye ku muyoboro mugari (on-grid) naho 11,33% bakoresha ukomoka ku mirasire y’izuba.

Mu bindi byagezweho mu rwego rw’ingufu muri uyu mwaka, ubwinshi bw’amashanyarazi u Rwanda rushobora gutunganya wavuye kuri megawati 208 zigera kuri 218, naho uburebure bw’imiyoboro ikwirakwiza amashanyarazi mu gihugu iyavanye ku ngomero buva kuri kilometero 574 bugera kuri 744.

Intego ni uko mu 2024 u Rwanda ruzaba rufite megawati 517 n’imiyoboro y’amashanyarazi ya kilometero 1491.

Mu ntangiriro z’uyu mwaka, Umuyobozi Mukuru wa REG, Eng. Ron Weiss yabwiye IGIHE ko umuriro uzagenda wongerwa bitewe n’uko abaturage biyongera ku muyoboro kandi ko guteza imbere inganda ari ingenzi cyane ku iterambere ry’urwego rw’ingufu kuko ari zo zikoresha umuriro mwinshi.

Kicukiro iri imbere y’utundi turere

Akarere ka Kicukiro kari ku isonga mu kugira ingo nyinshi zifite amashanyarazi mu gihugu hose kuko gafite 95%.

Hakurikiraho Gasabo ifite 79% na Nyarugenge ifite 78% mu gihe uturere dutanu tukiri munsi ya 30% harimo tune two mu Ntara y’Amajyepfo ari two Gisagara iza inyuma na 23%, Nyanza na Nyaruguru zinganya 25%, Nyamagabe ifite 26% na Gakenke yo mu Mujyaruguru ifite 29%.

Hanze y’Umujyi wa Kigali, Akarere ka Rubavu kaza imbere na 53% kagakurikirwa na Musanze ifite 51% naho Rusizi ikagira 50%.

Utundi turere dutandatu dufite umuriro ku kigero kiri hagati ya 40% na 49% naho 13 dufite hagati ya 30% na 40%.

Ibice bitandukanye bikomeje kwiteza imbere kubera amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza