Uko dutera intambwe ntitubura ibitwitambika – Perezida Kagame

Yanditswe na Iradukunda Serge
Kuya 22 Ukwakira 2020 saa 03:37
Yasuwe :
0 0

Perezida Paul Kagame yibukije abayobozi guharanira kuzuza inshingano zabo n’ibibazo bihari bakabikemura, asaba abasenateri bashya kuzirikana ko abaturage babitezeho byinshi, bityo ko bakwiye kubahagararira neza.

Yabigarutseho kuri uyu wa 22 Ukwakira ubwo yakiraga indahiro z’abasenateri batandatu bashya, barimo bane yashyizeho nk’uko biteganywa n’itegeko na babiri batowe n’Ihuriro nyunguranabitekerezo ry’imitwe ya Politiki mu Rwanda.

Perezida Kagame yavuze ko aba basenateri bashya bazanye ubumenyi butandukanye, buzafasha mu gukomeza kubaka igihugu, abibutsa ko Abanyarwanda babona nk’ababereye aho batari.

Ati “Bazanye inararibonye, bazanye ibitekerezo, bazanye amaraso mashya kugira ngo dukomeze kubaka igihugu cyacu kandi ku ntambwe ikwiye. Abasenateri birazwi abanyarwanda bababonamo ababahagarariye, babanamo amaso yabo, bababonamo amatwi yabo, bababonamo umutima wabo, gukurikirana ibyangombwa byose bifuza ndetse harimo no kugenzura imikorere y’izindi nzego cyane cyane guverinoma.”

Perezida Kagame yibukije aba basenateri n’abandi bayobozi ko inshingano bafite zisaba ubwitange, kugira ngo babashe gukemura ibibazo bitandukanye abanyarwanda bafite, ahanini birimo n’ibikomoka ku mateka yabo bihariye.

Ati “Ntawabura kuvuga ko imirimo dukora twese mu nzego zitandukanye, ubusanzwe mu gihugu cyacu ni imirimo ishaka imyumvire, ishaka ubwitange, ishaka gukora neza uko bishoboka kandi uko bikwiye. Amateka yacu asanzwemo ibibazo, ibyo bibazo tugerageza kubikemura, ari ibibazo by’imibereho y’abanyarwanda ari ibibazo by’ubukungu, ari ibibazo by’ubutabera n’ibindi bishobora guteza imbere abantu bakagira amajyambere.”

“Kuri twe rero aho tuva ni kure n’aho tujya ni kure birumvikana, rero icyo bidutezeho, ukuntu dutera intambwe, ntitubura rero ibitwitambika imbere muri iyo nzira, haba hari by’umwihariko ku gihugu cyangwa se bya rusange ibihugu bisangiye, ubwo natwe tuba dufitemo umugabane wacu tugomba guhangana nabyo tukabikemura.”

Abasenateri barahiye ni Prof Dusingizemungu Jean Pierre, Uwizeyimana Evode, Kanziza Epiphanie na Twahirwa André bashyizweho na Perezida, na Mukakarangwa Clotilde na Mugisha Alexis bashyizweho n’Ihuriro ry’imitwe ya Politiki.

Sena y’u Rwanda igizwe n’abasenateri 26 barimo 12 batorwa mu Ntara, umunani bashyirwaho na Perezida wa Repubulika, bane bashyirwaho n’Ihuriro nyunguranabitekerezo ry’Imitwe ya politiki yemewe mu Rwanda na babiri baturuka muri za Kaminuza cyangwa ibigo by’ubushakashatsi.

Mu miterere y’Umutwe wa Sena, nta na rimwe ijya ihagarika imirimo, bitandukanye n’Umutwe w’Abadepite. Bituma Abasenateri bajyaho mu bihe bitandukanye, ku buryo no mu bihe by’amatora hari aba bagikomeje manda yabo.

Aba basenateri bashya batangiye imirimo nyuma y’umwaka bagenzi babo bari muri Sena, bivuze ko bazanasoza manda y’imyaka itanu nyuma y’abandi.

Perezida Kagame yasabye Abasenateri bashya kumenya ko bakwiye kubera abanyarwanda aho batari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .