Abanyarwanda baba muri Zambia batanze inkunga yo gufasha abahungabanyijwe na Coronavirus

Yanditswe na Habimana James
Kuya 22 Gicurasi 2020 saa 09:32
Yasuwe :
0 0

Abanyarwanda baba muri Zambia bakusanyije $5825, arenga miliyoni 5 Frw, yo gushyigikira gahunda ya Guverinoma yo gufasha abagizweho ingaruka n’ingamba zafashwe mu guhangana n’icyorezo cya Coronavirus.

Umurwayi wa mbere wa Coronavirus mu Rwanda yagaragaye tariki 14 Werurwe 2020. Kuva icyo gihe hagiye hafatwa ingamba zirimo izo kuguma mu rugo mu kwirinda ikwirakwira rya Coronavirus.

Ibi byaje kugira ingaruka ku buzima bwa bamwe babeshwagaho no kubona ibyo kurya bakoze, nyuma Guverinoma yaje gufata icyemezo cyo koroshya ingamba ku buryo abantu bamwe basubiye mu kazi.

Kuva ku wa 4 Gicurasi 2020, nibwo Guverinoma y’u Rwanda yafashe icyemezo ko ibikorwa bimwe na bimwe bifungurwa ariko hari imirimo igifunze irimo nko gutwara moto ku buryo abari batunzwe nayo bagikeneye ubufasha.

Leta yagiye yishakamo ubushobozi bwo gufasha abagizweho ingaruka ariko inakira inkunga zivuye mu bantu batandukanye barimo n’Abanyarwanda bari imbere mu gihugu no mu mahanga bazirikanye ubuzima bagenzi babo mu gihugu barimo bahitamo kubafasha.

Umuyobozi wungirije w’Abanyarwanda baba muri Zambia, Mutabazi Jean Baptiste, yabwiye IGIHE ko igitekerezo cyo gukusanya iyi nkunga cyavuye mu Banyarwanda bari muri iki gihugu, kugira ngo bafashe bagenzi babo bagizweho ingaruka na coronavirus.

Yagize ati “Nyuma y’ibi byose nibwo twavuze ko twakwifatanya na bene wacu b’Abanyarwanda bari aho ariko bagize ibyo bibazo, dufite ishyirahamwe ry’Abanyarwanda batuye muri iki guhugu, twishyira hamwe kugira ngo abantu bafatanye no kugira ngo bateze umuco Nyarwanda hano.”

“Hano muri Lusaka iyo tugize iminsi mikuru, umunsi w’intwari cyangwa kwibuka Jenoside yakorewe Abatutsi, igihe cyo kwibuka ku buryo usanga tugera kuri 600 iyo hari ibikorwa bya leta.”

Yavuze ko muri rusange Abanyarwanda bari muri Zambia bagera nko mu bihumbi bibiri, ariko ngo abitabira ibikorwa akenshi usanga bagera nko kuri 500.

Ati “Abakusanyije iyi nkunga bagera ku 100 kandi buri wese yakoraga uko ashoboye, Abanyarwanda baba muri Zambia ubutumwa bwa mbere nabaha ni uko twifatanyije n’Abanyarwanda, kuko iki ni ikiza kiri hose. Ikintu cya mbere ni ukumva ko twese twifatanyije kugira ngo dufashe abagize ibyo byago, ku buryo buri wese akora uko ashoboye.”

Kuva umuntu wa mbere wanduye Coronavirus abonetse ku butaka bw’u Rwanda, abanduye bamaze kuba 321 mu gihe abamaze gukira ni 222.

Abanyarwanda baba muri Zambia batanze inkunga ya miliyoni 5 Frw yo gufasha abahungabanyijwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .