Abanyarwanda baba mu mahanga batangiye gufasha Dasso watoraguye umwana akamurera

Yanditswe na Hakizimana Jean Paul
Kuya 18 Nzeri 2020 saa 06:51
Yasuwe :
0 0

Abanyarwanda baba mu mahanga bishyize hamwe bakusanya inkunga yo gufasha Uwihagurukiye Sylivia ukora mu rwego rwunganira uturere mu by’umutekano rwa Dasso watoraguye umwana wari umaze iminsi ine avutse akamurera, kuri ubu akaba yarongeye kumera neza.

Iyi nkunga iri gukusanywa n’abagore b’Abanyarwandakazi baba muri Amerika bakozwe ku mutima n’igikorwa cya Uwihagurukiye Sylivia w’imyaka 32.

Uwihagurukiye yatoraguye umwana tariki 20 Kamena 2020 amusanze mu Kagari ka Kabeza mu Murenge wa Kabarore; akimutoragura amaso y’umwana ngo yasaga icyatsi kubera kwicwa n’inzara n’imbeho, abantu bose bari batinye kumufata kugira ngo atabapfiraho bikabakururira ibibazo.

Uyu Dasso we yarahageze aramufata amujyana kwa muganga aramuvuza ndetse anakomeza kumwitaho aho kuri ubu uyu mwana ameze neza amaze kurenza amezi abiri. Akimutoragura ngo yamutangije amata agurwa muri farumasi igikombe akigura 9000 Frw, umwana yatangiye akinywa icyumweru n’igice none ngo ubu akinywa mu minsi ine.

Ibi nibyo byatumye umwe mu Banyarwandakazi baba muri Amerika witwa Cyusa Alice ashakisha uyu Dasso aramushimira ndetse anamugezaho inkunga ku giti cye.

Nyuma ngo yashatse abandi bagore abagezaho igitekerezo cyo gushakira Uwihagurukiye inkunga yatuma akomeza kurera abana be neza no kumushimira ku gikorwa cyiza yakoze.

Uwihagurukiye ngo bamubajije umushinga yumva yakora arawubabwira niko gutangira gukusanya inkunga yo kumufasha ngo bamwumwuganire mu kurera wa mwana.

Cyusa Alice yakomeje agira ati “Muri iyi minsi hari abakobwa b’abangavu baterwa inda, njye numva gushimira, kuremera no gushyigikira uriya mubyeyi, ari ibintu by’ingirakamaro, bitanga ubutumwa ku muntu wese watekereza kujugunya umwana yabyaye.”

Uwihagurukiye Sylivia we yabwiye IGIHE ko ashimira abo Banyarwandakazi baba mu mahanga bishyize hamwe kugira ngo bamufashe. Ntiyatangaje ingano y’inkunga bamuhaye.

Ati “Bariya ba mama barakoze cyane, bashatse kunkorera umushinga muto wakomeza kumfasha mu kurera umwana wanjye. Twaraganiriye mbabwira icyo ntekereza nakora barabyumva ndetse banangira inama, inkunga barayohereje ubu ayo mafaranga ari kuri konti. Ndabashimira cyane kuko banangira inama nyinshi, bananguriye telefoni nziza.”

Uwihagurukiye yavuze ko umushinga yifuza gukora ari uwatuma uwo mwana niyuzuza amezi atandatu yabona ibimutunga byiza kugira ngo akomeze agire ubuzima bwiza.

Yashimiye Abanyarwanda baba mu mahanga bamutekerejeho bakamufasha n’abandi bakomeje kumuhamagara bamubwira ko yakoze igikorwa cyiza.

Uwihagurukiye aherutse kuzamurwa mu ntera mu kazi ke aho yasimbukijwe ipeti rimwe akagirwa umwofisiye bikaba byarakozwe n’inama y’umutekano itaguye y’Akarere ka Gatsibo; icyo gihe Umuyobozi w’Akarere ka Gatsibo, Gasana Richard, yabwiye IGIHE ko babikoze mu rwego rwo kumushimira no kugira ngo amafaranga yahembwaga yiyongere abone icyo gutungisha uwo mwana.

Meya Gasana yavuze ko ubundi mu rwego rw’umutekano iyo umuntu akoze igikorwa cyiza cy’ubutwari ngo ingororano ya mbere ni uguhabwa ipeti bakaba ari nabyo bamukoreye. Yasabye n’abandi bakozi bose kugira umutima wa kimuntu ufasha abaturage.

Uwihagurukiye Sylivia ni umugore wari usanzwe ufite abana batatu hakiyongeraho n’uwo yatangiye kurera wa kane aho yamwise Ishimwe Ganza Sylvan.

Abanyarwanda baba mu mahanga bakusanyije inkunga yo gufasha Dasso uherutse gutora umwana akamurera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .