00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda baba mu mahanga bashoye imari mu Rwanda bashimiwe

Yanditswe na Ntabareshya Jean de Dieu
Kuya 27 August 2022 saa 10:33
Yasuwe :

Ikigo gisanzwe gitegura ibirori bitandukanye cya Bella Vita Entertainment gifatanyije na Lotus Bleu Ltd, byatangije igikorwa cyo gushimira abanyarwanda baba mu mahanga ariko bakoze ishoramari mu Rwanda.

Ni igikorwa cyateguwe mu kuzirikana umusanzu w’abanyarwanda baba mu mahanga ariko bagahoza ku mutima igihugu bavukamo mu birebana n’ishoramari.

Ni gahunda yatangijwe n’umunyarwanda usanzwe utuye muri Canada, Razia Uwimana mu rwego rwo kurushaho gukundisha abanyarwanda baba mu mahanga u Rwanda no kugira uruhare mu iterambere ryarwo.

Uwimana yabwiye IGIHE ko bahisemo gutangiza iyi gahunda mu rwego guhamagarira abanyarwanda baba mu mahanga gushora imari mu gihugu cyabo.

Ati “Iyi gahunda igamije gukangurira abanyarwanda bo muri Diaspora gushora imari mu gihugu cyabo. Nibyo tarwagiye turahaha rero dukwiye kugira guhaha kwiza tuniyubakira igihugu.”

Yakomeje ati “Imbogamizi kuri bamwe mu banyarwanda batuye mu mahanga usanga bigoye kubona amakuru y’ishoramari. Turashima akazi gakorwa na za ambasade z’u Rwanda ariko usanga rimwe na rimwe hari amakuru amwe n’amwe baba badafite.”

Ni igikorwa kizajya gikorwa buri mwaka aho iki kigo kizagira ubufatanye na za ambasade z’ u Rwanda hirya no hino ku Isi kikanakorana n’ibigo by’imari byo mu Rwanda mu kubona amakuru ku ishoramari ry’aba-diaspora.

Abazajya bashimirwa ni abashoye imari mu bikorwa bitandukanye birimo ubukerarugendo, ubuhinzi, imari, uburezi, ubuzima, ikoranabuhanga, ubukorikori n’ibindi bitandukanye.

Josephine Murphy Bukuru wafatanyije n’impanga ye Christine Bukuru bakubaka ishuri ryita ku bana bavuka mu miryango itishoboye mu Karere ka Bugesera ku butaka bemerewe na Perezida wa Repubulika mu 2015 ubwo yari i Toronto muri Canada, yabwiye IGIHE ko igikorwa cyo gushimira abagize uruhare mu ishoramari kizarushaho kubahamagarira gushora imari.

Ati “Twari dukeneye umuntu wo kudushyigikira, kuzirikana uruhare rwacu nk’aba-diaspora natwe biratwubaka. Twishimira kugira uruhare mu bikorwa by’iterambere ry’igihugu cyacu kuko bidutera ishema. Nasaba aba-diaspora bagenzi banjye gutinyuka bagashora imari mu rwababyaye.”

Biteganyijwe ko ibikorwa byo kuzirikana uruhare rw’aba-diaspora hazagenderwa ku mubare w’akazi ishoramari ryabo ryatanze, imisoro yishyuwe, impinduka nziza kuri sosiyete n’ibindi bigamije kuzamura imibereho myiza y’umuturage.

Mu gutangiza iki gikorwa hashimiwe batanu ari bo; Green Staples Collective iri mu buhinzi bwibanda ku bihingwa by’imitako ariko binaribwa, ni ubuhinzi bukorerwa ku butaka buto kandi butangiza ibidukikije.

Aba bahinga imboga zishobora gukoreshwa nk’imitako ariko kandi zikanakoreshwa mu gutunganya amafunguro kandi bikaba bitangiza ibidukikije kuko ari ubuhinzi buteye imbere (Eco-Urban Agriculture).

Hashimiwe kandi ikigo cya TCC [Trust Counselling Center], gitanga ubuvuzi n’ubujyanama ku bibazo by’ubuzima bwo mu mutwe. Ubujyanama butangwa bwibanda cyane ku ndwara zo mu mutwe, gukemura amakimbirane, kureka ibiyobyabwenge n’ibindi.

Mu bandi bashimiwe harimo ikigo cya Imane Ltd, ikigo cya Age Fighting cyatangije gahunda yo gukora amavuta yo kwisiga ndetse hanagaragajwe ko bifuza gukora uruganda nibura mu myaka ibiri rukazaba rwatangiye gukorera mu Rwanda.

Ikigo gikodesha amazu n’imodoka cya Dova Business Company nacyo cyashimiwe ku ruhare kimaze kugira mu iterambere ry’u Rwanda, umukozi muri Dova, Agabe Jermiah, yagaragaje ko bagize urahare ku gutanga akazi ku bantu batandukanye, bakanashimira ubuyobozi bwabahaye ayo mahirwe.

Undi washimiwe ni uwitwa Rutsobe Nsengiyumva wanasabye abanyarwanda baba mu mahanga gusigasira umuco w’u Rwanda, kuruteza imbere no kurubera abaranga beza.

Ati “Twifuza ko abantu bafata u Rwanda nk’ikibaranga. Burya iyo ufite igihugu uba ugomba kukirinda no kugisigasira.”

Raporo za Banki Nkuru y’u Rwanda zigaragaza ko abanyarwanda baba mu mahanga bagira uruhare rukomeye mu iterambere ry’igihugu aho nibura mu myaka itandatu ishize mu Rwanda hinjiye miliyari 1100Frw zivuye muri Diaspora.

Age Fighting yatangije gahunda yo gukora amavuta yo kwisiga yashimiwe
Umukozi muri Dova, Agabe yashimiwe ku ruhare iki kigo kigira
Green Stapple nabo bashimiwe gushora imari mu buhinzi butangiza ibidukikije
Bagaragaje ko gushimirwa ari ibintu bizakomeza kubaherekeza
Iki gikorwa bacyishimiye cyane kandi biyemeje gukangurira abandi gushora imari mu Rwanda
Bukuru Josephine Murphy yafatanyije n’impanga ye Butoyi Joselyne Alexandre bakubaka ishuri ryita ku bana bavuka mu miryango itishoboye
Joselyne Butoyi yashimye amahirwe abanyarwanda bo muri diaspora bahabwa
Uwimana yagaragaje ko iki gikorwa cyo gushimira aba-diaspora bizahoraho
Kabagire Christelle ni we wayoboye ibi birori
DJ Brianne ni we wasusurukije ibi birori
Butoyi Joselyne Alexandre yasabye bagenzi be kugira uruhare mu iterambere ry'u Rwanda

Amafoto: Rwema Derrick


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .