00:00:00 IGIHE NETWORK KN KINYARWANDA EN ENGLISH FR FRANCAIS

Abanyamategeko bunganira abahoze muri FDLR bakuriweho ibihano

Yanditswe na Ntabareshya Jean de Dieu
Kuya 27 Ukwakira 2022 saa 10:09
Yasuwe :

Urukiko rukuru Urugereko rwa Nyanza ruburanisha ibyaha Mpuzamahanga n’Ibyambukiranya imipaka rwakuyeho ibihano byari byarafatiwe abavoka batatu bunganira abahoze mu mutwe w’inyeshyamba wa FDLR.

Aba bavoka batatu bari bahanishijwe gutanga amande angana n’ibihumbi 200 Frw buri umwe bashinjwa gushaka gutinza urubanza nyuma y’uko umwe mu baregwa agaragaje inzitizi zo kuba atarabonye umwanzuro w’urukiko ndetse akabona iminota itanu gusa yo kuvugana n’umwunganizi we mu mategeko.

Aba banyamategeko boherejwe n’Urugaga rw’abavoka ni Me Felix Nkundabatware, Me Ndagijimana Ignace na Me Mbanziriza Adiel bunganira abahoze muri FDLR nk’abatishoboye.

Mu iburanisha riheruka Me Felix Nkundabatware yahawe umwanya ngo asobanure neza iby’iyo nzitizi yemeza ko habayeho ikibazo cy’ubushobozi bigendanye n’uko boherejwe kubunganira n’Urugaga rw’Abavoka bakabikora nk’abunganira abantu batishoboye bityo ko bahura n’imbogamizi z’amikoro.

Urukiko rwari rwafashe umwanzuro ko aba banyamategeko batatu bashaka gutinza urubanza ku bushake bahanishwa ihazabu y’ibihumbi 200 Frw kuri buri umwe kandi bategekwa kutagira urundi rubanza baburana batarayishyura.

Kuri uyu wa Gatatu tariki ya 27 Ukwakira 2022, nibwo Perezida w’Urukiko Muhima Antoine yasomye umwanzuro kuri iki kibazo kuko nyuma yo guhanwa bari bitabaje perezida w’urukiko ngo bahabwe imbabazi bamugaragariza n’imbogamizi bahuye nazo.

Yavuze ko mu isesengura ry’urukiko rwasanze bagaragaza imbogamizi zumvikana bahuye nazo kuruta gutinza urubanza ku bushake nk’uko inteko iburanisha yari yabigaragaje, ategeka ko ibyo bihano bikurwaho.

Aba banyamategeko mu ibaruwa bandikiye Perezida w’urukiko bamutakambira bagaragaje ko bagihura n’imbogamizi z’amikoro yo kugera kuri gereza ya Mageragere iri mu Karere ka Nyarugenge abaregwa bafungiyemo no gusohora inyandiko z’umwanzuro w’urubanza kuko ari nyinshi.

Bemeje ko hari ubufasha basabye urugaga rw’abavoka mu Rwanda kandi bakibutegereje.

Aba banyamategeko bunganira Mujyambere Leopord alias Musenyeri, Habyarimana Joseph, Habimana Marc, Ruzindana Felicien, Habimana Emmanuel na Mpakaniye Emelien bahoze mu mutwe w’iterabwoba wa FDLR ari abasirikare bakuru b’uwo mutwe uvuga ko urwanya Leta y’u Rwanda.

Umukuru muri bo yari afite ipeti rya General, umuto afite ipeti rya Lieutenant Colonel.

Baregwa ibyaha bitatu ari byo, kuba mu mitwe y’iterabwoba y’ingabo zitemewe, kurema umutwe w’ingabo utemewe, n’icyaha cyo kuba mu mitwe y’iterabwoba n’ubugambanyi.

Bagiye bafatwa mu bihe bitandukanye muri Repubulika iharanira Demokarasi ya Congo bamwe bakabanza koherezwa i Kinshasa muri Congo mbere yo kugezwa mu Rwanda.

Umuyobozi Mukuru w’Urugaga rw’Abavoka mu Rwanda, Me Nkundabarashi Moise aherutse kubwira IGIHE ko hakenewe kongerwa ingengo y’Imari kuri aba bavoka bunganira abatishoboye kuko hari igihe bahura n’ibibazo by’amikoro bikaba byatinza urubanza.

Yasobanuye ko amafaranga bahabwa ari make kubera ko usanga ashobora guhabwa imanza 30 mu kwezi kandi ziri mu bice bitandukanye by’igihugu bityo ko hakenewe ko Guverinoma yakongera ingengo y’imari itangwa.

Ati “Ni inshingano y’urugaga na Leta ko igihe cyose hari umuntu ufite urubanza cyangwa ikibazo cyo mu nkiko akeneye umwavoka agomba kumuhabwa amaze kugaragaza ko abarizwa mu cyiciro cya mbere cy’ubudehe. Icyo dushaka kunoza ni uburyo bwo gufasha aba bantu babikora.”

Biteganyijwe ko uru rubanza ruzasubukurwa ku wa 29 Ugushyingo 2022.

Ibihano byari byafatiwe aba banyamategeko byakuweho
Abaregwa bose bahoze mu mutwe w'iterabwoba wa FDLR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .