00:00:00 IGIHE NETWORK KN KINYARWANDA EN ENGLISH FR FRANCAIS

Abanyamahanga muri Kaminuza ya UNILAK biyemeje kuba umusemburo w’amahoro no gukumira Jenoside

Yanditswe na Uwase Divine
Kuya 13 April 2022 saa 02:37
Yasuwe :

Urubyiruko rw’abanyamahanga biga muri Kaminuza ya UNILAK, biyemeje kuba umusemburo w’ubumwe, gukundana no kwamagana ko Jenoside yakongera ukundi. Ni nyuma yo gusura urwibutso rwa Jenoside yakorewe Abatutsi mu 1994 rwa Kigali, ruri ku Gisozi.

Kuwa 11 Mata 2022 nibwo urubyiruko rw’abanyamahanga biga muri kaminuza ya UNILAK barenga 220 baturuka mu bihugu 15 bya Afurika, bibutse ku nshuro ya 28 Jenoside yakorewe Abatutsi mu 1994. Basobanuriwe uko Jenoside yateguwe, uko yashyizwe mu bikorwa ndetse n’urugendo rwo kwiyubaka nyuma yayo.

Iki gikorwa cyari kigamije kwibuka no gusobanurira uru rubyiruko ruva mu mahanga atandukanye amateka mabi yaranze u Rwanda. Nyuma yo kunamira inzirakarengane zirenga ibihumbi 250 zishyinguye mu rwibutso rwa Gisozi, uru rubyiruko rwiyemeje guhashya ikibi no kwirinda amacakubiri.

Umuyobozi wungirije ushinzwe imyigire, amasomo n’ubushakashatsi muri Kaminuza ya UNILAK, Dr Hakizimana Emmanuel, yasobanuye ko byari ngombwa gusobanurira uru rubyiruko amateka mabi u Rwanda rwagize kuko abenshi baje kwiga muri iyi kaminuza mu bihe bya Covid-19, bakaba bari batarabona aya mahirwe.

Dr Hakizimana yavuze ko iki gikorwa cyihariye ku banyamahanga kizajya kiba buri mwaka ariko harimo gutegurwa n’umunsi wo kwibuka muri rusange n’abandi banyeshuri.

Ati "By’umwihariko aba banyeshuri baturuka mu bindi bihugu cyane mu bya Afurika, ni byiza ko basobanukirwa neza amahano yagwiririye igihugu cyacu. Jenoside yakorewe Abatutsi mu 1994 ni ikintu kibi cyane twifuzako nta kindi gihugu cya Afurika cyagira ingorane nk’izi”.

Dr Hakizimana yakomeje avuga ko nk’abantu bifuza Afurika nziza y’ahazaza, bahisemo ko abana baturutse mu bihugu by’abaturanyi n’ahandi bakwigira ku mateka y’u Rwanda, kugira ngo basubire mu bihugu byabo barusheho kwimakaza umuco w’amahoro no kubana neza.

Ati “Kugira ngo Jenoside tuvuga ngo ntizongere ukundi, uretse no mu Rwanda gusa no mu bindi bihugu ntizigere ihaba”.

Umwe mu banyeshuri ba Kaminuza ya UNILAK ukomoka muri Liberia, Isaac K. Dadzie, yavuze ko bitewe n’ibyo yabonye muri filime ya Hotel Rwanda akaza no mu Rwanda kubyirebera, byamweretse ko hari bibi byinshi byabaye mu Rwanda.

Avuga ko ibyo yabonye ari ibintu bibaho ku Isi hose ndetse no mu gihugu cyabo bafite ikibazo kimwe ariko ubuzima bugomba gukomeza. Yavuze ko isomo yakuyemo ari uko ijambo kwibuka bivuze ’kwibuka no kuba umwe’ kandi ikaba ari ari intambwe nziza igana iterambere.

Ati "Iyo ufitanye ikibazo n’umuvandimwe, uburyo bwo kugikemura no gukomeza ubuzima ni uguhuza mugasabana imbabazi, ni bwo buryo bwonyine bwo gukemura ikibazo".

Dadzie yavuze ko mu byo yabonye mu rwibutso rwa Kigali byamukoze ku mutima harimo icyumba yagezemo kirimo ifoto y’abanyeshuri hari umusirikare winjiye mu ishuri atandukanya abanyeshuri baranga bavuga ko bose ari abanyarwanda.

Ati “Ndasaba bagenzi banjye ngo twese dufatanye duhaguruke dusengerane, twubahane, waba ufitanye ikibazo na mugenzi wawe mukicara mukaganira.”

Mugenzi we Alrinica Minor, waturutse mu gihugu cya Liberia, yavuze ko isomo yakuyemo ari guha agaciro abantu bose kimwe, guharanira ubumwe, kubiba urukundo mu mitima no kuvuga ’oya’ kuri Jenoside. Yagiriye inama urubyiruko rukiga guhora rwiga gukundana no kuba umwe nka Afurika.

Aba banyeshuri bakomereje kuri kaminuza ya UNILAK aho baganirijwe na Mutangana Jean Bosco wabaye umushinjacyaha mu gihe cy’imyaka 20, ku rugendo rw’ubutabera bw’u Rwanda.

Yababwiye ko Jenoside ari kimwe mu byaha mpuzamahanga avuga ko nyuma ya Jenoside guhera mu 1995 bitari byoroshye gucira abantu bose imanza icyarimwe, hakaba harakoreshejwe inkiko Gacaca, nk’ubutabera bwunga. Izi zari inteko z’abaturage zifite inyangamugayo mu mwanya w’abacamanza.

Mutangana yavuze ko byari bigoye kuko mu gihugu hari abacamanza 50 gusa kandi abafunzwe bakeneye ubutabera ari benshi cyane. Yanagarutse kandi ku bufasha Leta yateguye Jenoside yahaye abakwirakwije urwango kuko iyo habaho uburyo bwo kubahana bitari bugere ku rwego rwa Jenoside nk’iyabaye mu 1994.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .