Abantu bane baguye mu mpanuka zo mu muhanda kuri Noheli

Yanditswe na Ntabareshya Jean de Dieu
Kuya 26 Ukuboza 2020 saa 06:11
Yasuwe :
0 0

Polisi y’igihugu yatangaje ko ku munsi mukuru wa Noheli, abantu bane baguye mu mpanuka enye zo mu muhanda, iboneraho kwibutsa abakoresha umuhanda muri iyi minsi mikuru kurushaho kwitwararika.

Umuvugizi wa Polisi, CP John Bosco Kabera, yabwiye The NewTimes ko impanuka imwe yabereye mu Karere ka Rwamagana, aho imodoka yagenderaga ku muvuduko wo hejuru yagonze umunyamaguru wambukiranyaga umuhanda.

Indi yabereye mu Karere ka Karongi, aho ipine ry’imodoka ryacomotse rikagonga umwana w’imyaka 11 agahita yitaba Imana. Mu karere ka Kamonyi kandi naho habereye impanuka yahitanye umunyonzi wagonzwe n’imodoka itaramenyekana.
Impanuka ya Kane ni iyabereye mu Karere ka Rusizi.

N’ubwo umutekano kuri Noheli wari umeze neza muri rusange, CP Bosco Kabera yibukije Abanyarwanda ko batagomba kwirara ngo bibere mu munyenga w’ibirori by’iminsi mikuru gusa, yibutsa ko mu minsi mikuru nk’iyi aribwo hakunze kumvikana ibibazo by’ubujura, asaba abantu kuba maso.

Yibukije ko n’ubwo Polisi ihora iri maso, abantu na bo bakwiye kwitwararika ntibirare. Yagize ati “Turagira ngo tubabwire ko Polisi izacunga umutekano w’abantu n’ibintu, ariko Abaturarwanda barasabwa kuba maso nabo. Mu kwizihiza iyi minsi, ntibahe icyuho abantu bashaka kugira ngo babavogerere ingo zabo babibe cyangwa se babe bateza umutekano muke.”

Uyu Muvugizi kandi yanagarutse ku bufatanye bukwiye kurangwa hagati ya Polisi n’abaturage, abasaba kujya batangira amakuru ku gihe kuko ari byo bituma Polisi ishobora gushyira mu bikorwa inshingano zayo mu buryo bworoshye.

Ku bijyanye n’ingamba zo gukumira icyorezo cya Coronavirus, Kabera yavuze ko ingamba zikomeje gushyirwa mu bikorwa, asaba abantu gukomeza kwirinda.

Bagize bati “Kwizihiza iminsi mikuru ntibikuraho amabwiriza yo kwirinda Coronavirus, gukora ibinyuranyije n’amabwiriza n’ibyemezo byagiye bifatwa biha icyuho Coronavirus ikaba yanaguhitana”.

Mu ijoro rya Noheli Polisi yafashe abantu bagera kuri 368 barenze ku mabwiriza yo kwirinda Covid-19, harimo kurenza isaha ya saa mbili, kutambara agapfukamunwa no gukoranaho.

Polisi irashishikariza abantu gukomeza kwirinda muri ibi bihe bya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .